ദുബൈയിൽ കൂറ്റൻ ഗ്രന്ഥശാല തുറന്ന്​ ശൈഖ്​ മുഹമ്മദ്

ദുബൈ: ഗൾഫ്​ മേഖലയിലെ ഏറ്റവും വലിയ ഗ്രന്ഥശാലയായ മുഹമ്മദ്​ ബിൻ റാശിദ്​ ലൈബ്രറി ദുബൈയിൽ തുറന്നു. യു.എ.ഇ വൈസ്​ പ്രസിഡന്റും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമാണ്​ 10 ലക്ഷത്തിലേറെ പുസ്തകങ്ങളുള്ള ലൈബ്രറി ഉദ്​ഘാടനം ചെയ്​തത്​. 100 കോടി ദിർഹം ചെലവിട്ടാണ്​ വിജ്ഞാനദാഹികളുടെ ആഗ്രഹം സഫലീകരിച്ചത്​.

ദുബൈ ജദഫ്​ പ്രദേശത്ത്​ ക്രീക്കിന്​ സമീപത്തായാണ്​ ലൈബ്രറി ഒരുക്കിയത്​. ഏഴ്​ നിലകളിലായി ഒരു ദശലക്ഷം ചതുരശ്ര അടിയിൽ നിർമിച്ച കെട്ടിടത്തിൽ പുസ്തകങ്ങൾക്ക്​ പുറമെ ലക്ഷക്കണക്കിന്​ ഗവേഷണ പ്രബന്ധങ്ങളും ഒമ്പത്​ പ്രത്യേക വിഷയങ്ങളിലെ സബ്​ ലൈബ്രറികളുമുണ്ട്​.

വാനലോകത്ത്​ നിന്ന് ഭൂമിയിലേക്ക് ഇറക്കിയ ആദ്യ വാക്ക് 'ഇഖ്‌റഅ്​' (വായിക്കുക) എന്നായിരുന്നെന്നും സമ്പദ്‌വ്യവസ്ഥക്ക്​ അറിവ് അനിവാര്യമാണെന്നും ലൈബ്രറി ഉദ്​ഘാടന ചിത്രങ്ങൾ ട്വിറ്ററിൽ പങ്കുവെച്ച്​ ശൈഖ്​ മുഹമ്മദ്​ ട്വിറ്ററിൽ കുറിച്ചു.