ശൈഖ് മുഹമ്മദ് എത്തി, ആഗോള ഗ്രാമം കാണാന്‍

ദുബൈ: ലോകത്തി​​​​െൻറ വിവിധ കോണുകളിൽ നിന്നുള്ള ജനതക്ക്​ ആതിഥ്യമരുളുന്ന യു.എ.ഇയുടെ വൈസ്​​പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമി​​​​െൻറ ഗ്ലോബൽ വില്ലേജ്​ സന്ദർശനം ​ശ്രദ്ധേയമായി. മുന്നറിയിപ്പുകളില്ലാതെ വെളളിയാഴ്​ച ഉച്ച തിരിഞ്ഞ്​ ഗ്ലോബൽ വില്ലേജിലെത്തിയ ശൈഖ്​ മുഹമ്മദ്​ ഒാരോ പവലിയനുകളും കയറിയിറങ്ങി കരകൗശല വസ്​തുക്കളും കലാപരിപാടികളും ആസ്വദിച്ചു. വിവിധ നാടുകളിൽ നിന്നെത്തിയ കച്ചവടക്കാരുടെ വർത്തമാനങ്ങളും അവരുടെ ഉൽപന്നങ്ങളെക്കുറിച്ചുള്ള വിശേഷണങ്ങളും സാകൂതം കേട്ടു നിന്നു. ദേശങ്ങളുടെ സംസ്​കാരം സംഗമിക്കുന്ന ഗ്ലോബൽ വില്ലേജ്​ ആശയത്തെയും അദ്ദേഹം പ്രകീർത്തിച്ചു.  

കുവൈത്ത്​ പവലിയനിലാണ്​ ശൈഖ്​ മുഹമ്മദ്​ ആദ്യമെത്തിയത്​. യമൻ, സൗദി, ഇന്ത്യ, തായ്​, ആഫ്രിക്കൻ പവലിയനുകളിലും സന്ദർശിച്ചു. ഭക്ഷ്യ വിഭവങ്ങൾ ഒരുക്കുന്ന സ്​റ്റാളുകളും അദ്ദേഹം എത്തി വിലയിരുത്തി. യു.എ.ഇയുടെ തനതു പലഹാരമായ ലുഖീമിയത്ത്​ തയ്യാറാക്കുന്ന സ്​റ്റാളും സന്ദർശിച്ചു. കലാ സാംസ്​കാരിക പൈതൃക പ്രവർത്തനങ്ങളുടെ കേന്ദ്രമായ ഹംദാൻ ബിൻ മുഹമ്മദ്​ ഹെറിറ്റേജ്​ സ​​​െൻററും സന്ദർ​ശിച്ചാണ്​ അദ്ദേഹം മടങ്ങിയത്​.  ​ദുബൈ പ്രോ​േട്ടാക്കോൾ ഹോസ്​പിറ്റാലിറ്റി വിഭാഗം ഡി.ജി ഖലീഫ സഇൗദ്​ സുലൈമാൻ, ദുബൈ ഹോൾഡിങ്​സ്​ ചെയർമാൻ അബ്​ദുല്ലാ അഹ്​മദ്​ അൽ ഹബ്ബാഇ എന്നിവരും ഒപ്പമുണ്ടായിരുന്നു. 

ദുബൈ ഷോപ്പിങ്​ ഫെസ്​റ്റിവലിനോടനുബന്ധിച്ച്​ ഗ്ലോബൽ വില്ലേജ്​ നടപ്പിലാക്കാൻ നിർദേശിച്ച്​ രണ്ടു പതിറ്റാണ്ട്​ പിന്നിടവെ ഇവിടം കുട്ടികൾക്കും കൂടുംബങ്ങൾക്കും ഒരുപോലെ ആനന്ദകരമായ ഇടമായി മാറിയതിൽ അദ്ദേഹം സന്തുഷ്​ടി പ്രകടിപ്പിച്ചു. ഷോപ്പിങ്​ ഫെസ്​റ്റിവൽ കാലയളവിൽ മാത്രം നടന്നുവന്ന ഗ്ലോബൽ വില്ലേജ്​ ആറു മാസമായി ദീർഘിപ്പിച്ചതും ശൈഖ്​ മുഹമ്മദി​​​​െൻറ നിർദേശാനുസരണമായിരുന്നു.