അൽ സുബൈഹിയ ഉപനഗര കൗൺസിൽ ശൈഖ് സുൽത്താൻ ഉദ്ഘാടനം ചെയ്തു

ഷാർജ: ഖോർഫക്കാനിലെ അൽസുബൈഹിയ ഉപനഗര കൗൺസിലി​െൻറ ഉദ്ഘാടനം സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി നിർവഹിച്ചു. ഉദ്ഘാടനശേഷം ശൈഖ് സുൽത്താൻ കൗൺസിലിലെ സൗകര്യങ്ങൾ വിലയിരുത്തി.

ജില്ലയിലെ ജനങ്ങൾക്കിടയിൽ സാമൂഹിക പരിചയവും ആശയവിനിമയവും പ്രോത്സാഹിപ്പിക്കുകയാണ് ഇതി​െൻറ മുഖ്യ ലക്ഷ്യം. കെട്ടിടത്തി​െൻറ വിസ്തീർണ്ണം 1037 ചതുരശ്ര മീറ്ററും പദ്ധതിയുടെ വിസ്തീർണ്ണം 3500 ചതുരശ്ര മീറ്ററുമാണ്. രണ്ട് മജ്​ലിസുകൾ, ഒരു റിസപ്ഷൻ ഹാൾ, അഞ്ച്​ ഓഫിസ് മുറി, ഒരു സ്​റ്റോർ, ഒരു പ്രിപ്പറേറ്ററി കിച്ചൻ, ശുചിമുറി സൗകര്യങ്ങൾ, പാർക്കിങ്​ സ്ഥലങ്ങൾ, സേവന മുറികൾ എന്നിവയുണ്ട്.

ഗ്രാമകാര്യ വകുപ്പ് ഡയറക്ടർ ശൈഖ് മാജിദ് ബിൻ സുൽത്താൻ അൽ ഖാസിമി, ഗ്രാമകാര്യ വകുപ്പ് ചെയർമാൻ ഖാമിസ് ബിൻ സേലം അൽ സുവൈദി, പ്രോട്ടോക്കോൾ മേധാവി മുഹമ്മദ് ഉത്​ബത്​ അൽ സാബി എന്നിവരും പങ്കെടുത്തു.