സംസ്ഥാന സ്കൂൾ ഒളിമ്പിക്സ്: പ്രവാസി വിദ്യാർഥികൾക്ക്​ ക്ഷണം

ദുബൈ: കേരള പൊതുവിദ്യാഭ്യാസ വകുപ്പ്​ സംഘടിപ്പിക്കുന്ന പ്രഥമ കേരള സ്കൂൾ ​ഒളിമ്പിക്സിൽ പ​ങ്കെടുക്കാൻ യു.എ.ഇയിലെ സ്കൂളുകൾക്ക്​ ക്ഷണം. കേരള സ്​റ്റേറ്റ്​ ബോർഡിന്​ കീഴിൽ കേരള സിലബസ് പാഠ്യപദ്ധതി പിന്തുടരുന്ന​ സ്കൂളുകൾക്കാണ്​ അവസരം.

ഇതാദ്യമായാണ്​ കേരള സർക്കാർ സംഘടിപ്പിക്കുന്നൊരു സ്കൂൾ സ്​പോർട്​സ്​ മീറ്റിൽ പ​ങ്കെടുക്കാൻ യു.എ.ഇയിലെ സ്കൂളുകൾക്ക്​ അവസരം ലഭിക്കുന്നത്​​. ജി.സി.സി രാജ്യങ്ങളിൽ കേരള സിലബസ്​ പിന്തുടരുന്ന ഏക രാജ്യം യു.എ.ഇ ആണ്​. ഇത്​ പരിഗണിച്ചാണ്​ സ്​പോർട്​സ്​ മീറ്റിൽ യു.എ.ഇക്ക്​ അവസരം നൽകുന്നത്​. കേരളത്തിലെ 15ാമത്തെ യൂനിറ്റ്​ എന്ന നിലയിലായിരിക്കും യു.എ.ഇയിലെ സ്കൂളുകളെ പരിഗണിക്കുക. നവംബർ നാല്​ മുതൽ 11 വരെ കൊച്ചിയിലാണ് മത്സരങ്ങൾ. ഒളിമ്പിക്സ്​ മാതൃകയിൽ നാലുവർഷം കൂടുമ്പോൾ​ സ്കൂൾ ഒളിമ്പിക്സ് സംഘടിപ്പിക്കാനാണ് തീരുമാനം.

സ്കൂൾതലത്തിൽ നടത്തുന്ന മത്സരങ്ങളിൽനിന്ന്​ തെരഞ്ഞെടുക്കപ്പെടുന്ന കുട്ടികളെ ആയിരിക്കും​ യു.എ.ഇയെ പ്രതിനിധീകരിച്ച്​ നാട്ടിലേക്ക്​ അയക്കുക. പ​ങ്കെടുക്കുന്ന കുട്ടികളുടെ യാത്ര ചെലവുകൾ അതത്​ സ്കൂൾതന്നെ വഹിക്കണം.

താമസം, ഭക്ഷണം ഉൾപ്പെടെയുള്ള സൗകര്യങ്ങളായിരിക്കും പൊതുവിദ്യാഭ്യാസ വകുപ്പ് വഹിക്കുകയെന്നാണ്​ സർക്കുലറിൽ അറിയിച്ചിരിക്കുന്നത്​. നവംബർ നാലിന്​ കൊച്ചി ജവഹർ ലാൽ നെഹ്​റു അന്താരാഷ്ട്ര സ്​റ്റേഡിയത്തിലാണ്​​ ഉദ്​ഘാടന മത്സരം. സർക്കാർ ക്ഷണം ലഭിച്ചതോടെ പരിശീലനങ്ങൾക്കും മറ്റുമായി അടുത്ത ഞായറാഴ്ച യു.എ.ഇയിലെ സ്കൂളുകളുടെ ക്ലസ്റ്റർ മീറ്റിങ്​ ഇന്ത്യൻ മോഡൽ സ്കൂളിൽവെച്ച്​ നടത്താനാണ്​ സ്കൂൾ മാനേജ്​മെന്‍റ്​ കമ്മിറ്റികളുടെ തീരുമാനം. വോളിബാൾ, ഫുട്​ബാൾ, അത്​ലറ്റിക്​ മത്സരങ്ങളിൽ യു.എ.ഇയിലെ കുട്ടികളെ പ​ങ്കെടുപ്പിക്കാനാണ്​ ആലോചന. ഇതിനായുള്ള പരിശീലനങ്ങൾ ഉടൻ ആരംഭിക്കുമെന്നാണ്​ സ്കൂൾ മാനേജ്​മെന്‍റ്​ അറിയിച്ചിരിക്കുന്നത്​.

അതേസമയം, കേരളത്തിൽ നടന്നുവരുന്ന കായിക അധ്യാപകരുടെ പരിശീലനത്തിൽ അവസരം ലഭിക്കുമെന്ന പ്രതീക്ഷയിലാണ്​ യു.എ.ഇയിലെ സ്കൂൾ അധ്യാപകർ. ഏറെ കാലത്തെ കാത്തിരിപ്പിനൊടുവിലാണ്​ പ്രവാസികളായ മലയാളി വിദ്യാർഥികൾക്ക്​ കേരളത്തിൽ നടക്കുന്ന സ്​പോർട്​സ്​ ഇവന്‍റിൽ പ​ങ്കെടുക്കാൻ അവസരം ലഭിക്കുന്നത്​.

കേരള സ്​റ്റേറ്റ്​ സ്കൂൾ സ്​പോർട്​സ്​ മീറ്റിൽ വിജയിക്കുന്നവർക്ക്​ സ്കൂൾ ഗെയിംസ്​ ഫെഡറേഷൻ ഓഫ്​ ഇന്ത്യ (എസ്​.ജി.എഫ്​.ഐ) സംഘടിപ്പിക്കുന്ന സ്കൂൾ നാഷനൽ ഗെയിംസിൽ അവസരം ലഭിക്കുമെന്നതിനാൽ പ്രവാസി വിദ്യാർഥികൾക്ക്​ സർക്കാർ തീരുമാനം വലിയ പ്രതീക്ഷയാണ്​ സമ്മാനിക്കുന്നത്​.