യു.എ.ഇയിൽ മൂന്നു​ വയസ്സുമുതലുള്ള കുട്ടികൾക്ക്​ സിനോഫാം വാക്​സിൻ

ദുബൈ: യു.എ.ഇയിൽ മൂന്നു​ മുതൽ 17 വരെ പ്രായമുള്ള കുട്ടികൾക്ക്​ സിനോഫാം വാക്​സിൻ നൽകാൻ ആരോഗ്യ, രോഗപ്രതിരോധ മന്ത്രാലയം അനുമതി നൽകി.

രണ്ടു മാസ പരീക്ഷണങ്ങൾക്കു ശേഷമാണ്​ അനുമതി​. ജൂണിലാണ്​ പഠനം തുടങ്ങിയത്​. 900ത്തോളം കുട്ടികൾ ഇതിൽ പങ്കാളികളായി. രക്ഷിതാക്കളുടെ സമ്മതത്തോടെയായിരുന്നു കുട്ടികളിൽ പഠനം നടത്തിയത്​. വാക്​സിൻ നൽകിയ ശേഷം കുട്ടികളെ നിരീക്ഷിക്കുകയായിരുന്നു. ഇതു​ വിജയകരമാണെന്ന്​ കണ്ടെത്തിയതോടെയാണ്​ മന്ത്രാലയം അനുമതി നൽകിയത്​.

കുട്ടികൾക്ക്​ വാക്​സിൻ നൽകുന്നത്​ പഠിച്ച മിഡിൽ ഇൗസ്​റ്റ്​^ ​േനാർത്ത്​ ആഫ്രിക്ക മേഖലയിലെ ആദ്യരാജ്യമാണ്​ യു.എ.ഇ. യു.എസ്​, യു.കെ, ഇന്ത്യ, ചൈന എന്നീ രാജ്യങ്ങളും സമാന പഠനം നടത്തുന്നുണ്ട്​. യു.എ.ഇയിൽ വിവിധ രാജ്യങ്ങളിൽനിന്നുള്ള കുട്ടികൾ പരീക്ഷണഘട്ടത്തിൽ സിനോഫാം സ്വീകരിക്കാൻ സന്നദ്ധരായിരുന്നു. കോവിഡിനെതിരായ മുന്നണിപ്പോരാളികൾ എന്നാണ്​ ആരോഗ്യ മന്ത്രാലയം ഇവരെയും കുടുംബാംഗങ്ങളെയും വിശേഷിപ്പിച്ചത്​. നേരത്തേ 12 വയസ്സിനു​ മുകളിലുള്ള കുട്ടികൾക്ക്​ ഫൈസർ വാക്​സിൻ നൽകാൻ യു.എ.ഇ അനുമതി നൽകിയിരുന്നു.

സ്​കൂളുകളിൽ പുതിയ അധ്യയന വർഷം തുടങ്ങാനിരിക്കെയാണ്​ എല്ലാ കുട്ടികളിലേക്കും​ വാക്​സിൻ എത്തിക്കുന്നത്​. ഇതോടെ കുട്ടികൾക്ക്​ സുരക്ഷിതമായി സ്​കൂളുകളിൽ എത്താൻ കഴിയുമെന്ന്​ കരുതുന്നു. മാ​ത്രമല്ല, വാക്​സിനെടുക്കാത്ത കുട്ടികൾക്ക്​ യാത്രവിലക്ക്​ നേരിടേണ്ടിവരുമോ എന്ന രക്ഷിതാക്കളുടെ ആശങ്കക്കും പരിഹാരമാകും.

യു.എ.ഇ ആദ്യമായി അംഗീകാരം നൽകിയ വാക്​സിനാണ്​ ​സിനോഫാം. കഴിഞ്ഞ വർഷം ഡിസംബറിൽ യു.എ.ഇ അംഗീകരിച്ചിരുന്നു.

ആദ്യ ഡോസ്​ എടുത്ത്​ 21 ദിവസം കഴിഞ്ഞാണ്​ രണ്ടാം ഡോസ്​ എടുക്കേണ്ടത്​. ചൈനയിലെ നാഷനൽ ബയോടെക്​ ഗ്രൂപ്പാണ്​ സിനോഫാം നിർമിക്കുന്നത്​.