ഷാർജ ഭരണാധികാരി നട്ടത് അറിവി​െൻറ വിത്തുകൾ -ശൈഖ ജവാഹിർ

ഷാർജ: രാജ്യത്തി​െൻറ ഭാവി മുൻനിർത്തി സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി നട്ടുപിടിപ്പിച്ചത്​ അറിവി​െൻറ വിത്തുകളാണെന്ന്​ ഭാര്യയും സുപ്രീം കൗൺസിൽ ഫോർ ഫാമിലി അഫയേഴ്സ് ചെയർപേഴ്‌സനുമായ ശൈഖ ജവാഹിർ ബിൻത്​ മുഹമ്മദ് അൽ ഖാസിമി. ഷാർജ കുട്ടികളുടെ വായനോത്സവം സന്ദർശിക്കാനെത്തിയതായിരുന്നു അവർ. മകൾ ശൈഖ ബിൻത്​ ബുദൂർ അൽ ഖാസിമിയും കൂടെയുണ്ടായിരുന്നു.

എമിറേറ്റി​െൻറ സാംസ്കാരിക പദ്ധതിയുടെ ലക്ഷ്യങ്ങൾ സാക്ഷാത്കരിക്കാൻ പുസ്തകങ്ങളെയും വായനയെയും അദ്ദേഹം കൂട്ടുകാരാക്കിയെന്നും ശൈഖ ജവാഹിർ പറഞ്ഞു. ഷാർജയുടെ സാംസ്കാരിക പദ്ധതിയുടെ പ്രധാന ഘടകമാണ് ഷാർജ കുട്ടികളുടെ വായന ഉത്സവം. ലോകോത്തര രചയിതാക്കളുമായും കലാകാരൻമാരുമായും ഇടപഴകുന്നതിലൂടെ കുട്ടികൾക്ക്​ ലോകം വിശാലമാക്കാൻ കഴിയുന്നു. യുവതലമുറയുടെ ധാർമിക മൂല്യങ്ങൾ ഉയർത്താൻ​ കുട്ടികളെ പുസ്തകങ്ങളിലേക്കും വിജ്ഞാന സ്രോതസ്സുകളിലേക്കും അടുപ്പിക്കാൻ പുസ്​തകമേളകൾ സഹായിക്കുന്നു. പഠന അവസരങ്ങൾ പൂർണമായി പ്രയോജനപ്പെടുത്താൻ എല്ലാ വിദ്യാഭ്യാസ, അക്കാദമിക് സ്ഥാപനങ്ങളോടും ശൈഖ ജവാഹിർ അഭ്യർഥിച്ചു.