കളറിലുണ്ട്​ കാര്യം

ഹോട്ടൽ ജീവനക്കാരുടെ വസ്​ത്രങ്ങൾക്ക്​ മാത്രമല്ല, ഉപകരണങ്ങൾക്കും കളർ കോഡ്​ ഉണ്ടെന്ന കാര്യം എത്ര പേർക്കറിയാം. ഏറ്റവും ലളിതമായി ചെയ്യാവുന്ന ഇൗ കാര്യങ്ങൾ പോലും അറിയാത്തതിനാൽ ഫൈൻ വാങ്ങുന്നവർ നിരവധിയാണ്​. ആവശ്യമായും അനാവശ്യമായും നിറങ്ങൾ വാരിപൂശുന്നവർ പോലും ഉപകരണങ്ങളെ അവഗണിക്കുകയാണ്​ പതിവ്​.

അണുസംക്രമണം തടയാനാണ്​ വിവിധ നിറത്തിലുള്ള കത്തികളും അതേനിറത്തിലുള്ള കട്ടിങ്​ ബോർഡുകളും ഉപയോഗിക്കണമെന്ന് മുനിസിപ്പാലിറ്റി​ പറയുന്നത്​. ഇതിന്​ കൃത്യമായ നിയമങ്ങളുമുണ്ട്​. പച്ചക്കറികളും പഴവർഗങ്ങളും അരിയാൻ പച്ച കത്തിയും കട്ടിങ്​ ബോർഡുമാണ്​ ഉപ​േയാഗിക്കേണ്ടത്​. വേവിക്കാത്ത ഇറച്ചി മുറിക്കാൻ ചുവപ്പ്​ കട്ടിങ്​ ബോർഡും കത്തിയും വേണം. കോഴി, കാട, താറാവ്​ എന്നിവ മുറിക്കാൻ മഞ്ഞ ഉപകരണങ്ങൾ ഉപ​യോഗിക്കണം. ഇനി വേവിച്ച്​ കഴിഞ്ഞാലോ, ബ്രൗൺ നിറത്തിലുള്ള കത്തി ഉപയോഗിച്ചായിരിക്കണം മുറിക്കേണ്ടത്​. മത്സ്യങ്ങൾ മുറിക്കാൻ നീല ഉപകരണങ്ങളെ ആശ്രയിക്കണം.

കത്തിക്കും കട്ടിങ്​ ബോർഡിനും വെറുതെ നിറം നൽകിയിട്ട്​ കാര്യമില്ല. അത്​ കൃത്യമായി ഉപയോഗിക്കുകയും ചെയ്യണം. ഇല്ലെങ്കിൽ അണുസംക്രമണം ഉണ്ടാകും. അത്യാവശ്യ ഘട്ടങ്ങളിലാണെങ്കിൽ പോലും നിശ്​ചിത കളറിലുള്ള കട്ടിങ്​ ബോർഡുകളും കത്തിയും പരസ്​പരം മാറി ഉപയോഗിക്കരുത്​. അണുവിമുക്​തമാക്കുകയും ചെയ്യണം. അതിനായി പ്രത്യേകം നിർമിച്ച അണുനാശിനിയാണ്​ (disinfectant) ഉപയോഗിക്കേണ്ടത്​. കൃത്യമായി അടയാളപ്പെടുത്തിയ (ലേബൽ ചെയ്​ത) സ്​ഥലത്തായിരിക്കണം അത്​ സ്​റ്റോർ ചെയ്യേണ്ടത്​.

ഒരുപക്ഷെ, ഹോട്ടൽ, കഫ്​റ്റീരിയ, റസ്​റ്റാറൻറ്​ ജീവനക്കാർ ഇതേകുറിച്ച്​ ബോധവാൻമാരായിരിക്കണമെന്നില്ല. ഇൗ നിയമങ്ങൾ പാലിച്ചില്ലെങ്കിലുള്ള ദൂഷ്യ ഫലങ്ങളെ കുറിച്ച്​ അവർക്ക്​ ബോധവത്​കരണവും പരിശീലനവും നൽകണം.