41 അഫ്​ഗാൻ അഭയാർഥികളെ കൂടി യു.എ.ഇ സ്വീകരിച്ചു

ദുബൈ: താലിബാൻ അധികാരത്തിലേറിയ അഫ്​ഗാനിൽ നിന്നുള്ള 41 അഭയാർഥികളെ കൂടി യു.എ.ഇ സ്വീകരിച്ചു.

അഫ്​ഗാൻ ഗേൾസ്​ സൈക്ലിങ്​ ആൻഡ്​ റോബോട്ടിക്​ ടീമിലെ അംഗങ്ങളടക്കമുള്ളവരാണ്​ എത്തിയത്​. മനുഷ്യാവകാശ പ്രവർത്തകരും കുടുംബാംഗങ്ങളും സംഘത്തിലുണ്ട്​.

അബ​ൂദബിയിലെ എമിറേറ്റ്​സ്​ ഹ്യുമാനിറ്റേറിയൻ സിറ്റിയിലാണ്​ ഇവരെ താമസിപ്പിക്കുക. ഇവർ അനുവാദം ലഭിക്കുന്ന മുറക്ക്​ കാനഡയിലേക്ക്​ താമസം മാറ്റാൻ ഉദ്ദേശിക്കുന്നവരാണ്​. സെൻറർ ഫോർ ഇസ്രായേൽ ആൻഡ്​ ജൂയിഷ്​ അഫയേഴ്​സും ഇസ്ര എയ്​ഡും ചേർന്നാണ്​ ഇവരെ കാബൂളിൽനിന്ന്​ താജികിസ്​താൻ വഴി ഒഴിപ്പിച്ചത്​.

അന്താരാഷ്​ട്ര സംവിധാനങ്ങളുമായി സഹകരിച്ച്​ അഫ്​ഗാനിൽനിന്നുള്ളവർക്ക്​ അഭയമൊരുക്കുന്നതിൽ അഭിമാനമുണ്ടെന്ന്​ യു.എ.ഇ അധിക​ൃതർ പറഞ്ഞു. താലിബാൻ അധികാരമേറ്റ ശേഷം വിവിധ രാജ്യങ്ങളിലേക്ക്​ പുറപ്പെട്ട 9000ത്തോളം പേരെ ഇതിനകം യു.എ.ഇ മാനുഷിക പരിഗണനയിൽ സ്വീകരിച്ചിട്ടുണ്ട്​. നാൽപതിനായിരത്തിലേറെ പേരെ ഒഴിപ്പിക്കാൻ​ ഇതിനകം യു.എ.ഇ സഹായം നൽകി​.

അതിനിടെ അഫ്​ഗാൻ ജനതക്ക്​ സഹായവുമായി യു.എ.ഇയുടെ നാലാമത്തെ വിമാനം കാബൂളിലെത്തി. ഭക്ഷ്യവസ്​തുക്കൾ, മരുന്ന്​ എന്നിവയാണ്​ പ്രധാനമായും കയറ്റിയയച്ചിട്ടുള്ളത്​. അബൂദബി കിരീടാവകാശിയും സായുധസേന ഡെപ്യൂട്ടി സുപ്രീം കമാൻഡറുമായ ശൈഖ്​ മുഹമ്മദ്​ ബിൻ സായിദ്​ ആൽ നെഹ്​യാ​െൻറ നിർദേശപ്രകാരമാണ്​ സഹായം എത്തിക്കുന്നത്​. രാഷ്​ട്രീയ പ്രതിസന്ധി ആരംഭിച്ച ശേഷം ഏറ്റവും ആദ്യം കാബൂളിലേക്ക്​ സഹായമെത്തിച്ച രാജ്യങ്ങളിലൊന്നാണ്​ യു.എ.ഇ. വരുംദിവസങ്ങളിൽ കൂടുതൽ സഹായ വിമാനങ്ങൾ അഫ്​ഗാനിലേക്ക്​ പറക്കുമെന്നും അധികൃതർ അറിയിച്ചു.