കോവിഡിനിടയിലും നിക്ഷേപം ഉയർത്തി യു.എ.ഇ

ദുബൈ: മഹാമാരി തീർത്ത പ്രതിസന്ധിക്കിടയിലും തലയുയർത്തി യു.എ.ഇ.കഴിഞ്ഞവർഷം രാജ്യത്ത്​ എത്തിയ വിദേശനിക്ഷേപത്തിൽ 44 ശതമാനമാണ്​ വർധന​ രേഖപ്പെടുത്തിയത്​.

ലോകമെമ്പാടും വിദേശനിക്ഷേപത്തി​െൻറ തോത് കുത്തനെ ഇടിഞ്ഞ സാഹചര്യത്തിലാണ് യു.എ.ഇയുടെ മുന്നേറ്റമെന്ന് യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം ചൂണ്ടിക്കാട്ടി.

ഐക്യരാഷ്​ട്രസഭയുടെ കണക്കുകൾപ്രകാരം ലോകമെമ്പാടും കഴിഞ്ഞവർഷം വിദേശനിക്ഷേപത്തിൽ 42 ശതമാനം ഇടിവാണ് രേഖപ്പെടുത്തിയത്. കോവിഡ് പ്രതിസന്ധി സൃഷ്​ടിച്ച ഇക്കാലത്തും യു.എ.ഇയിലേക്ക് 19.88 ശതകോടി ഡോളർ (73 ശതകോടി ദിർഹ) നേരിട്ടുള്ള വിദേശനിക്ഷേപമെത്തി എന്നാണ് കണക്ക്​. 2019നെ അപേക്ഷിച്ച്​ 44 ശതമാനം കൂടുതലാണ്. യു.എ.ഇയുടെ മികച്ച ക്രൈസിസ് മാനേജ്മെൻറാണ് വിദേശനിക്ഷേപം വർധിക്കാൻ കാരണമെന്ന് ശൈഖ് മുഹമ്മദ് ട്വീറ്റ് ചെയ്തു. അബൂദബിയിലെ എണ്ണ കമ്പനിയായ അഡ്നോക്ക് ഏർപ്പെട്ട വൻതുകയുടെ കരാറുകളാണ് വിദേശനിക്ഷേപത്തിൽ വൻ കുതിപ്പിന് കാരണമായത്​.

നിക്ഷേപകരിൽ ആത്മവിശ്വാസം പകരുന്നതും സാമ്പത്തിക സുസ്ഥിരതക്ക് ഊർജം പകരുന്നതുമാണ് ഈ കണക്കുകളെന്ന് സാമ്പത്തികകാര്യമന്ത്രി അബ്​ദുല്ല അൽ മർഇ പറഞ്ഞു.