നാളെ ഉത്രാടം: വിപണികളില്‍ ഓണം നിറഞ്ഞു

ഷാര്‍ജ: തിരുവോണത്തെ വരവേല്‍ക്കാൻ മലയാളികള്‍ വെള്ളിയാഴ്​ച ഉത്രാടപ്പാച്ചിലിനിറങ്ങും. വിപണികളില്‍ സദ്യക്കും പൂക്കളത്തിനുമുള്ള സാധനങ്ങൾ നിറഞ്ഞു. കാശിത്തുമ്പ, മല്ലിക പൂക്കൾ ഇന്ത്യയിൽ നിന്നാണ് എത്തിയത്. ഒമാനിൽ വിനോദസഞ്ചാരത്തിന് പോകുന്നവർ സലാലയിൽ നിന്ന് ധാരാളം കാശിത്തുമ്പകളുമായാണ് ഓണത്തിനു മടങ്ങാറ്​.

എന്നാൽ കോവിഡ് കാരണം യാത്ര മുടങ്ങിയത് പൂക്കളങ്ങളുടെ വട്ടം കുറക്കും. കസവ് വസ്ത്രങ്ങളുടെ വൻ ശേഖരമാണ് മാര്‍ക്കറ്റുകളിൽ നിരത്തിയിരിക്കുന്നത്. മുണ്ട്, ജുബ്ബ, ചുരിദാര്‍, സാരി എന്നിവയിൽ കസവി‍െൻറ ചന്തം. പായസ വസ്​തുക്കളും എത്തിക്കഴിഞ്ഞു. മുടിയില്‍ ചൂടാനുള്ള മുല്ലപ്പൂവും ഉത്രാടത്തിന് പൂക്കളവട്ടം പരമാവധി കൂട്ടാന്‍ വിവിധയിനം പൂക്കളും വിപണികളിലെത്തി. കേരളത്തില്‍നിന്ന് പച്ചക്കറികള്‍ ധാരാളം എത്തിയിട്ടുണ്ട്.

എന്നാല്‍ മുന്‍വര്‍ഷങ്ങളെ അപേക്ഷിച്ച് ഇത്തവണ വരവ് കുറവാണെന്ന് ഈ മേഖലയില്‍ പ്രവര്‍ത്തിക്കുന്നവർ പറഞ്ഞു. ഓണസദ്യ മുന്‍കൂട്ടി ഓര്‍ഡര്‍ ചെയ്​ത്​ കാത്തിരിക്കുകയാണ് ബാച്ച്ലർ ലോകം.

വിഭവങ്ങളുടെ തോതനുസരിച്ചാണ് വില. 22 ഇനങ്ങളുള്ള സദ്യയുടെ വില 24.50 ദിര്‍ഹമാണ്. നല്ല നാക്കിലയും ഇതി‍െൻറ കൂടെ കിട്ടും. അടപ്രഥമനും പാല്‍ പായസവും ഇതിലുണ്ട്. തിരുവോണം പ്രമാണിച്ച് ഓണസദ്യ തയാറാക്കാന്‍ ഉപയോഗിക്കുന്ന ചേരുവകള്‍ക്കും വിലക്കുറവുണ്ട്. കേരളത്തി​െൻറ തനത് കലകളും കളികളും വരച്ചുവെച്ചാണ് സ്ഥാപനങ്ങള്‍ ആളുകളെ ആകര്‍ഷിക്കുന്നത്.