ഡ്രൈവിങ് പഠിതാക്കൾ‌ക്ക് ഇനി പരിശീലകർക്ക് മാർക്കിടാം!

ദുബൈ: ദുബൈയിൽ ഡ്രൈവിങ്​ പഠിക്കുന്ന വിദ്യാർഥികൾക്ക് അവരുടെ പരിശീലകരുടെ പ്രകടനം വിലയിരുത്തി മാർക്കിടാനുള്ള അവസരമൊരുങ്ങുന്നു. പ്രത്യേക ആപ് ഉപയോഗിച്ചാണ് റേറ്റിങ് നടത്താൻ കഴിയുന്നത്. പാഠം പൂർത്തിയാക്കുമ്പോൾ പഠിതാക്കൾക്ക് പരിശീലകരെ വിലയിരുത്താം. ദുബൈ റോഡ് ആൻഡ്​ ട്രാൻസ്പോർട്ട് അതോറിറ്റിയാണ് ഇതു സംബന്ധിച്ച വിവരങ്ങൾ വെളിപ്പെടുത്തിയത്.

'പഠനം മെച്ചപ്പെടുത്താനും അന്തർ‌ദേശീയ നിലവാരങ്ങളുമായി പൊരുത്തപ്പെടാനുമുള്ള ആർ‌.ടി.‌എയുടെ നിരന്തര ശ്രമഫലമാണ് ഈ സംരംഭം. ഈ സ്​റ്റാർ അധിഷ്ഠിത റേറ്റിങ്ങും വിദ്യാർഥികളുടെ അഭിപ്രായങ്ങളും പരിശീലന നിലവാരം ഉയർത്താൻ പരിശീലകർക്ക്​ പ്രോത്സാഹനമാകും. ഡ്രൈവിങ്​ ഇൻസ്ട്രക്ടറുടെ വാർഷിക വിലയിരുത്തലിലും ഇത് പ്രതിഫലിപ്പിക്കും. റേറ്റിങ്​ സംവിധാനം എമിറേറ്റിലെ റോഡ് സുരക്ഷ മെച്ചപ്പെടുത്താൻ സഹായകമാകും- ആർ.‌ടി‌.എയിലെ ലൈസൻസിങ്​ ഏജൻസിയിലെ ഡ്രൈവേഴ്സ്​ പരിശീലന ഡയറക്ടർ മൻ‌സൂർ അൽ ഫലാസി പറഞ്ഞു.

ജനുവരി മുതൽ ഈ വർഷം മൂന്നാം പാദം വരെ 73,627 പേരാണ് ഡ്രൈവിങ്​ ലൈസൻസിനായി പരിശീലനം തുടരുന്നത്. 16,84,650 മണിക്കൂർ സമയമാണ് സൈദ്ധാന്തികവും പ്രായോഗികവുമായ പരിശീലനം നൽകാൻ വിവിധ ഡ്രൈവിങ്​ സ്ഥാപനങ്ങൾ ഇതിനകം ചെലവഴിച്ചത്. ദുബൈയിലെ ഡ്രൈവിങ്​ ഇൻസ്​റ്റിറ്റ്യൂട്ടുകളിൽ രണ്ടായിരത്തോളം പരിശീലന വാഹനങ്ങളുണ്ട്. 2300ഓളം ഇൻസ്ട്രക്ടർമാരും ട്രയൽ എക്സാമിനർമാരും സേവനമനുഷ്ഠിക്കുന്നതായും മൻ‌സൂർ അൽ ഫലാസി പറഞ്ഞു.