അഞ്ചുവർഷ വിസക്കാർക്കും യാത്രക്ക്​ അനുമതി

ദുബൈ: യാത്രാവിലക്ക്​ നിലവിലുള്ള ഇന്ത്യ അടക്കമുള്ള രാജ്യങ്ങളിൽ നിന്നുള്ള ചാർട്ടർ വിമാനങ്ങളിൽ സിൽവർ വിസ (അഞ്ചുവർഷ വിസ)ക്കാർക്കും വരാമെന്ന്​ വ്യോമയാന വകുപ്പ്.

ചാർട്ടർ വിമാനയാത്രക്ക്​ ഉപാധികൾ കർശനമാക്കി വകുപ്പ്​ പുറത്തിറക്കിയ സർക്കുലറിലാണ്​ ഇക്കാര്യം പറയുന്നത്​. ഗോൾഡൻ, സിൽവർ വിസക്കാരായ​ യാത്രക്കാർക്കടക്കം ട്രാക്കിങ്​ ഉപകരണം നിർബന്ധമാണെന്നാണ്​ പുതിയ ഉത്തരവിലെ പ്രധാന നിർദേശം. നിലവിൽ ഗോൾഡൻ വിസക്കാർക്കും ബന്ധുക്കൾക്കും നയതന്ത്ര ഉദ്യോഗസ്​ഥർക്കും മാത്രമാണ്​ യാത്രാവിലക്കുള്ള രാജ്യങ്ങളിൽ നിന്ന്​ വരാൻ അനുമതിയുണ്ടായിരുന്നത്​. പുതിയ സർക്കുലർ അനുസരിച്ച്​ അഞ്ചുവർഷ വിസക്കാർക്കും വരാൻ കഴിയുമെന്നാണ്​ വ്യക്​തമായിരിക്കുന്നത്​.

അന്താരാഷ്​ട്ര യാത്രക്കാർ‌ക്ക് റിസ്​റ്റ്​ബാൻഡ് ട്രാക്കിങ്​ ഉപകരണം‌ കഴിഞ്ഞ സെപ്റ്റംബർ മുതൽ‌ അബൂദബിയിൽ നിർബന്ധമാക്കിയിരുന്നു. റാസൽഖൈമയിലും ഷാർജയിലും ഇറങ്ങുന്ന യാത്രക്കാർക്കും റിസ്​റ്റ്​ബാൻഡ്​ നൽകിവന്നിരുന്നു.

ദുബൈയിൽ ഇറങ്ങുന്ന യാത്രക്കാർക്ക് പത്തുദിവസത്തെ നിർബന്ധിത ക്വാറൻറീനും ഒന്നാമത്തെയും നാലാമത്തെയും എട്ടാമത്തെയും ദിവസങ്ങളിൽ പി.സി.ആർ പരിശോധനയും നിലവിലുണ്ട്​. എന്നാൽ, ദുബൈയിൽ ട്രാക്കിങ്​ ഉപകരണം വേണ്ടിയിരുന്നില്ല. പുതിയ ഉത്തരവോടെ ദുബൈയിൽ ഇറങ്ങുന്നവരും ഇത്​ ധരിക്കണമെന്നാണ്​ സർക്കുലറിൽ വ്യക്​തമാക്കിയിരിക്കുന്നത്​. ഈ രാജ്യങ്ങളിൽ നിന്ന് വരുന്ന വിമാനങ്ങളിലെ ക്രൂ അംഗങ്ങൾക്കും ഈ നിയമം ബാധകമാണ്.