യു.എ.ഇയിലെ നാല്​ വിമാനക്കമ്പനികൾ ദോഹ സർവീസ്​ നിർത്തിവെച്ചു

അബൂദബി: യു.എ.ഇ ആസ്​ഥാനമായി പ്രവർത്തിക്കുന്ന നാല്​ വിമാനക്കമ്പനികൾ ജൂൺ ആറ്​ മുതൽ ദോഹയിലേക്കുള്ള സർവീസുകൾ നിർത്തിവെച്ചു. ഖത്തറുമായുള്ള നയതന്ത്രം ബന്ധം വിച്​ഛേദിച്ചതായി യു.എ.ഇ പ്രഖ്യാപിച്ചതിനെ തുടർന്ന്​ എമിറേറ്റ്​സ്​, ഇത്തിഹാദ്​ എയർവേസ്​, എയർ അറേബ്യ, ഫ്ലൈ ദുബൈ എന്നിവയാണ്​ സർവീസ്​ നിർത്തിവെച്ചത്​. ജൂൺ ആറ്​ മുതലുള്ള സർവീസുകളാണ്​ റദ്ദാക്കുന്നത്​. ഇനിയൊരു അറിയിപ്പുണ്ടാകുന്നത്​ വരെ സർവീസുകൾ ഉണ്ടായിരിക്കില്ല. അതേസമയം, ജൂൺ അഞ്ചിന്​ ഷെഡ്യൂൾ പ്രകാരം വിമാന സർവീസുകൾ നടക്കും.

ദോഹയിലേക്കോ ദോഹയിൽനിന്നോ ടിക്കറ്റ്​ ബുക്ക്​ ചെയ്​തവർക്ക്​ മുഴുവൻ പണവും തിരിച്ചു നൽകുകയോ ഏറ്റവും അടുത്തുള്ള മറ്റു വിമാനത്താവളങ്ങളിലേക്ക്​ സൗജന്യമായി ടിക്കറ്റ്​ അനുവദിക്കുകയോ ചെയ്യുമെന്ന്​ ഇത്തിഹാദ്​ എയർവേസ്​ വ്യക്​തമാക്കി. ദുബൈക്കും ദോഹക്കുമിടയിലെ എല്ലാ സർവീസുകളും റദ്ദാക്കിയതായി ഫ്ലൈ ദുബൈ അറിയിച്ചു. ദുബൈ^ദോഹ റൂട്ടിൽ ടിക്കറ്റെടുത്തവർ ട്രാവൽ ഏജൻറുമാരുമായി ബന്ധപ്പെടണമെന്ന്​ ഫ്ലൈ ദുബൈ അധികൃതർ പറഞ്ഞു. പണം മടക്കിക്കിട്ടാൻ ദോഹയിലെ ​ൈഫ്ല ദുബൈ ട്രാവൽ ഷോപ്പുമായി 00974 4 4227350/51 നമ്പറിലും ദുബൈയിലെ ഷോപ്പുമായി (00971) 600 544445 നമ്പറിലും ബന്ധപ്പെടാമെന്നും അവർ അറിയിച്ചു.

ജൂൺ ആറിന്​ രാവിലെ മുതൽ ദോഹയിലേക്കും തിരിച്ചുമുള്ള എല്ലാ സർവീസുകളും റദ്ദാക്കിയതായി ദുബൈ ആസ്​ഥാനമായ എമിറേറ്റ്​സ്​ അറിയിച്ചു. ദുബൈയിൽനിന്ന്​ ദോഹയിലേക്കുള്ള അവസാനത്തെ വിമാനം ആറിന്​ പുലർച്ചെ 2.30ന്​ ദുബൈയിൽനിന്ന്​ പുറപ്പെടും. ദോഹയിൽനിന്ന്​ ദുബൈയിലേക്കുള്ള അവസാന വിമാനം അതേ ദിവസം പുലർച്ചെ 3.50നാണ്​ പുറപ്പെടുക. ജൂൺ അഞ്ചിന്​ പതിവ്​ പോലെ സർവീസ്​ നടക്കും. യാത്ര മുടങ്ങുന്നവർക്ക്​ മുഴുവൻ പണം തിരിച്ചു നൽകുകയോ ​െതാട്ടടുത്ത വിമാനത്താവളങ്ങളിലേക്ക്​ സൗജന്യ ബുക്കിങ്​ അനുവദിക്കുകയോ ചെയ്യും. യാത്രക്കാർ 600 555555 നമ്പറിലോ വെബ്​സൈറ്റ്​ വഴിയോ ബന്ധപ്പെടണമെന്നും എമിറേറ്റ്​സ്​ അധികൃതർ പറഞ്ഞു. 

ഷാർജക്കും ദോഹക്കുമിടയിലെ യാത്രക്ക്​ ടിക്കറ്റെടുത്തവർക്ക്​ തുക മുഴുവനായി തിരിച്ചുനൽകകുയോ സമീപ വിമാനത്താവളങ്ങളിലേക്ക്​ സൗജന്യ ബുക്കിങ്​ അനുവദിക്കുകയോ ചെയ്യുമെന്ന്​ എയർ അറേബ്യയും വ്യക്​തമാക്കി. ഷാർജയിൽനിന്ന്​ ദോഹയിലേക്കുള്ള അവസാന വിമാനം ജൂൺ അഞ്ചിന്​ യു.എ.ഇ സമയം വൈകുന്നേരം 6.30നും ദോഹയിൽനിന്ന്​ ഷാർജയിലേക്കുള്ള അവസാന വിമാനം ഖത്തർ സമയം രാത്രി 7.25നും പുറപ്പെടും. ജൂൺ അഞ്ചിലെ മറ്റു വിമാനങ്ങളെല്ലാം പതിവ്​ പോലെ സർവീസ്​ നടത്തും. റാസൽഖൈമയിൽനിന്ന്​ ദോഹയിലേക്കുള്ള വിമാനങ്ങളും ജൂൺ ആറ്​ മുതൽ റദ്ദാക്കിയതായി എയർ അറേബ്യ വ്യക്​തമാക്കി.