ഗ്രീൻ, ഫ്രീലാൻസ്​ വിസകൾ പ്രഖ്യാപിച്ച്​ യു.എ.ഇ

ദുബൈ: രാജ്യത്തി​െൻറ സുവർണജൂബിലി ആഘോഷത്തോടനുബന്ധിച്ച്​ ഈ മാസം ​ആരംഭിക്കുന്ന 50പദ്ധതികളിലെ ആദ്യഘട്ടം പ്രഖ്യാപിച്ചു. ഗ്രീൻ, ഫ്രീലാൻസ്​ എന്നീ പേരുകളിൽ പുതിയ വിസ സേവനങ്ങൾ ഏർപ്പെടുത്തിയതാണ്​ ഏറ്റവും പ്രധാനപ്പെട്ട പ്രഖ്യാപനം. യു.എ.ഇ വിദേശ വ്യാപാര വകുപ്പ് സഹമന്ത്രി​ ഡോ. ഥാനി അൽ സയൂദിയാണ്​ പുതിയ വിസ സംവിധാനം മാധ്യമങ്ങൾക്ക്​ വെളിപ്പെടുത്തിയത്​. വിദ്യാർഥികൾ, നിക്ഷേപകർ, ബിസിനസുകാർ, പ്രത്യേക വൈദഗ്ധ്യമുള്ളവർ എന്നിവരുൾപ്പെടെ ഉന്നത നേട്ടങ്ങൾ കരസ്​ഥമാക്കിയവർക്കാണ്​ ഗ്രീൻ വിസ അനുവദിക്കുക. ഇത്​ ലഭിക്കുന്നവർക്ക്​ രക്ഷിതാക്കളെയും 25വയസുവരെ മക്കളെയും സ്​പോൺസർ ചെയ്യാൻ കഴിയും. കലാവധി കഴിഞ്ഞാൽ വിസ പുതുക്കുന്നതിന്​ 90മുതൽ 180ദിവസം വരെ ഗ്രേസ്​ പിരിയിഡും ലഭിക്കും.

പതിവ്​ താമസ വിസകളിൽ നിന്ന്​ വ്യത്യസ്​തമായ ആനുകൂല്യങ്ങളും പദവികളും ​ഗ്രീൻ വിസക്കാർക്കുണ്ടാകും. ഏതെങ്കിലും കമ്പനിയുടെ ഭാഗമല്ലാതെ, സ്വന്തം നിലക്ക്​ നിലനിൽക്കാൻ ഇത്​ സഹായിക്കും. കൂടുതൽ ഗ്രേസ്​ പിരിയിഡ്​ ലഭിക്കുന്നതിനാൽ വിസ കാലാവധി കഴിഞ്ഞാലും ആറുമാസം വരെ രാജ്യത്ത്​ തങ്ങാനാകും. സാധാരണ വിസ കാലാവധി കഴിഞ്ഞാൽ 30ദിവസമാണ്​ ഗ്രേസ്​ പിരിയിഡ്​. വർക്ക് പെർമിറ്റിൽ നിന്ന് റസിഡൻസ് പെർമിറ്റിനെ വേർതിരിക്കുന്ന പുതിയ റസിഡൻസ് സംവിധാനമെന്ന നിലയിൽ ​ഗ്രീൻ വിസ കൂടുതൽ പേരെ ആകർഷിക്കുന്നതാണ്​. സ്വതന്ത്ര ബിസിനസുകാർക്കും സ്വയം തൊഴിൽ ചെയ്യുന്നവർക്കും ലഭിക്കുന്ന വിസയാണ്​ ഫ്രീലാൻസ്​ വിസ. വിവാഹമോചിതരായ സ്ത്രീകൾക്കും ജോലി ചെയ്യാൻ ആഗ്രഹിക്കുന്ന 15 വയസ്​ പിന്നിട്ട വിദ്യാർത്ഥികൾക്കും​ വിസ നൽകും.

നിലവിൽ മൂന്ന്​ ലയറുകളിലായി ഗോൾഡൻ, റെസിഡൻസി, ടൂറിസ്​റ്റ്​ വിസകളാണ്​ രാജ്യത്ത്​ അനുവദിക്കുന്നത്​. പ്രതിഭകളെ രാജ്യത്ത്​ തുടരാൻ പ്രേരിപ്പിക്കുന്നതാണ്​ കൂടുതൽ ഇളവുകൾ ലഭിക്കുന്ന പുതിയ വിസ സേവനങ്ങൾ.