സാഹസ സെൽഫിയെടുക്കുന്നവർ കുടുങ്ങും, സഹായം ചെയ്യുന്നവരും VIDEO

ദുബൈ: സാമൂഹിക മാധ്യമങ്ങളിൽ വൈറലാവാൻ അപകടകരമായ സാഹസിക സെൽഫി എടുക്കുന്നവർ സൂക്ഷിച്ചോളുക. നിങ്ങളെ നിരീക്ഷിക്കാനും ആവശ്യമെങ്കിൽ കർശന നടപടി സ്വീകരിക്കാനും  സംവിധാനങ്ങൾ തയ്യാറായി കഴിഞ്ഞു. കൂറ്റൻ കെട്ടിടങ്ങളിൽ വലിഞ്ഞു കയറി കാണുന്നവർക്ക്​ നെഞ്ചിടിപ്പുണ്ടാക്കുന്ന ചിത്രങ്ങളും വീഡിയോയും എടുത്ത്​ സാമൂഹിക മാധ്യമങ്ങളിൽ പ്രചരിപ്പിച്ച്​ പ്രശസ്​തി നേടാൻ ശ്രമിക്കുന്നത്​ പതിവായതോടെയാണ്​ അധികൃതർ വിഷയത്തിൽ ഇടപെടുന്നത്​.

കെട്ടിടങ്ങൾ ഇത്തരം അപകടകരമായ പ്രവർത്തികൾക്ക്​ വേദിയായാൽ പടമെടുത്തവർ മാത്രമല്ല, കെട്ടിടങ്ങളുടെ  ഉടമയും നടത്തിപ്പുകാരും കുടുങ്ങും. ജീവൻ അപകടപ്പെടുത്തുന്ന പ്രവർത്തികൾ കെട്ടിടങ്ങളിൽ നടക്കുന്നില്ലെന്ന്​ ഉടമസ്​ഥർ ഉറപ്പുവരുത്തണമെന്ന്​ ദുബൈ നഗരസഭാ ഡയറക്​ടർ ജനറൽ ഹുസൈൻ നാസർ ലൂത്ത നിർദേശിച്ചു.

 മേൽക്കൂരകളിൽ ഉൾപ്പെടെ ആളുകൾ അനധികൃതമായി പ്രവേശിക്കുന്നത്​ തടയാൻ നിരീക്ഷണ സംവിധാനം ഏർപ്പെടുത്തണമെന്ന്​ പരിസ്​ഥിതി വിഭാഗം അസി. ഡി.ജി ഖാലിദ്​ മുഹമ്മദ്​ ശരീഫ്​ പറഞ്ഞു. 2003ൽ ഇറങ്ങിയ ഉത്തരവിൽ തന്നെ അനുവാദമില്ലാതെ ആളുകൾ കെട്ടിടങ്ങളിൽ കയറുന്നത്​ തടയാൻ സി.സി.ടി.വി, ഇലക്​ട്രോണിക്​ സെൻസർ തുടങ്ങിയ സുരക്ഷാ ക്രമീകരണങ്ങൾ ഏർപ്പെടുത്തണമെന്ന്​ നിഷ്​കർഷിച്ചിട്ടുണ്ട്​ എന്ന്​ അദ്ദേഹം ഒാർമപ്പെടുത്തി. നിയമം ലംഘിക്കുന്നവരെക്കുറിച്ച്​ ഉടനടി അധികൃതർക്ക്​ വിവരം നൽകണം.

ഇൗ വർഷം തന്നെ അപകടകരമായ സാഹസ പ്രകടനങ്ങൾ ചർച്ചാ വിഷയമായിരുന്നു. കെട്ടിടത്തിൽ വലിഞ്ഞു കയറി പടമെടുത്ത ഒരാളെ ദുബൈ പൊലീസ്​ അറസ്​റ്റു ചെയ്​തിരുന്നു. മറ്റൊരാൾ നിയമനടപടി ഭയന്ന്​ ഇംഗ്ലണ്ടിലേക്ക്​ മടങ്ങുകയും ചെയ്​തു. 
അപകടകരമായ ​ചിത്രമെടുത്ത റഷ്യൻ മോഡലിനെക്കൊണ്ട്​ ഇനി മേൽ ഇത്തരം ചെയ്​തികളുണ്ടാവില്ലെന്ന്​ ഉറപ്പെഴുതിക്കുകയുമുണ്ടായി.