വഴിയരികിൽ സുഭാഷ്​ തങ്കം കണ്ടു, യൂണിഫോമണിഞ്ഞ മാലാഖയെ

അബൂദബി: നാട്ടിലേക്ക്​ പോകുന്നതിനിടെ ഗതാഗതകുരുക്കിൽ കുടുങ്ങിയ മലയാളി യുവാവിനെ കൃത്യസമയത്ത്​ വിമാനത്താവള​ത്തിലെത്തിച്ച പൊലീസ്​ സേനയുടെ നൻമ വായിച്ചതോർക്കുന്നില്ലേ, ഇപ്പോഴിതാ യു.എ.ഇ സൈനികനും തുണയായിരിക്കുന്നു വാഹനം തകരാറിലായി റോഡിൽപെട്ടു​േപായ ഒരു ഇന്ത്യൻ കുടുംബത്തെ. 

അബൂദബിയിൽ താമസിക്കുന്ന തമിഴ്​നാട്​ നാഗർ കോവിൽ സ്വദേശികളായ സുഭാഷ്​ തങ്കം^ഗ്രേസ്​ ദമ്പതികൾ മക്കളുമൊത്ത്​ അവധിക്ക്​ നാട്ടിൽ പോകുന്നതിനിടെയാണ്​ കുഴപ്പത്തിൽപ്പെട്ടത്​. അബൂദബിയിൽ നിന്ന്​ നാട്ടിലേക്ക്​ നേരിട്ട്​ വിമാനമില്ലാത്തതിനാൽ ഷാർജയിലേക്ക്​ പോവുകയായിരുന്നു  നാഷനൽ പെട്രോളിയം കൺസ്​ട്രക്​ഷൻ കമ്പനിയിൽ സേവനമനുഷ്​ഠിക്കുന്ന സുഭാഷും കുടുംബവും.  കൂടുതൽ ലഗേജുകൾ കൊണ്ടുപോകാനുള്ള സൗകര്യത്തിന്​ സ്വന്തം കാർ വീട്ടിലിട്ട്​ കൂട്ടുകാര​​​െൻറ വാഹനമെടുത്താണ്​ പുറപ്പെട്ടത്​. നാട്ടിലേക്ക്​ പോകുന്നതി​​​െൻറ ആഹ്ലാദത്തിൽ  കളിച്ചും കഥപറഞ്ഞും പോകുന്നതിനിടെയാണ്​ ദുബൈ അതിർത്തിക്കരികിൽ വെച്ച്​ കാറി​​​െൻറ ടയർ പൊട്ടിയത്​. വാഹനം ഒതുക്കിയിട്ട സുഭാഷ്​ ഇനിയെന്തു ചെയ്യണം എന്ന്​ ധാരണയില്ലാതെ നിന്നുപോയി. ഭാര്യയും കുട്ടികളും കരയാനുള്ള ഒരുക്കത്തിലുമായി. 
ടാക്​സി വിളിച്ച്​ പോയാലും കേടായ വാഹനം എന്തു ചെയ്യുമെന്നും മറ്റുമായി ചിന്ത.

അതിനിടെയാണ്​ റോഡിലൂടെ പോയ വാഹനങ്ങളിലൊന്ന്​ അടുത്തു വന്ന്​ നിർത്തിയത്​. യൂനിഫോമണിഞ്ഞ ഒരു യു.എ.ഇ സായുധ സേനാംഗമായിരുന്നു അത്​. കാര്യമെന്തെന്ന്​ മനസിലായതും അദ്ദേഹമാദ്യം ചെയ്​തത്​ കുടുംബാംഗങ്ങളെ സമാധാനപ്പെടുത്തുകയായിരുന്നു. നാമെല്ലാം സഹോദരങ്ങളാണെന്നും എല്ലാ പ്രശ്​നങ്ങളും നമ്മളൊരുമിച്ചു നേരിടുമെന്നും പറഞ്ഞതോടെ ​വല്ലാത്ത ഒരു ധൈര്യം ലഭിച്ചതു പോലെയായി സുഭാഷിന്​. പൊട്ടിയ ടയറിനു പകരം ഘടിപ്പിക്കാൻ സ്വന്തം കാറിൽ നിന്നൊരു സ്​പെയർ  ടയർ നൽകാൻ പോലും അദ്ദേഹം മനസുകാട്ടി.

കേടായ വാഹനത്തിൽ നിന്ന്​ ഒരു ടയർ ലഭിച്ചതോടെ അതു ഘടിപ്പിക്കാനും സൈനികൻ മുൻകൈയെടുത്തു. ടയർ ഘടിപ്പിക്കുന്ന നേരമത്രയും ഗ്രേസിനെയും കുട്ടികളെയും സ്വന്തം വാഹനത്തിനുള്ളിലിരുത്തി കടുത്ത ചൂടിൽ നിന്ന്​ കാത്തു നിർത്തിയതും സുഭാഷ്​ ഏറെ നന്ദിയോടെ സ്​മരിക്കുന്നു.  ദുർഘടാവസ്​ഥയിൽ തന്നെയും കുടുംബത്തെയും സഹായിക്കാൻ ദൈവം അയച്ച മാലാഖ എന്നാണ്​ അദ്ദേഹം ഇൗ സൈനിക​​​െൻറ പ്രവർത്തിയെ വിശേഷിപ്പിച്ചത്​. ആ സഹായം ഒന്നു കൊണ്ടു മാത്രമാണ്​ വഴിയിൽ ദുരിതപ്പെട്ട്​ കുടുങ്ങിപ്പോകുമായിരുന്ന തനിക്കും കുടുംബത്തിനും യാത്ര തുടരാനും ക​ൃത്യ സമയത്ത്​ വിമാനത്താവളത്തിൽ റിപ്പോർട്ട്​ ചെയ്​ത്​ നാട്ടിലേക്ക്​ തിരിക്കാനും കഴിഞ്ഞതെന്ന്​ അദ്ദേഹം കൂട്ടിച്ചേർത്തു.