അഫ്ഗാനിലേക്ക്​ യു.എ.ഇ സഹായം അയച്ചു

അബൂദബി: സ്ത്രീകൾ, കുട്ടികൾ, പ്രായമായവർ ഉൾപ്പെടെ ആയിരക്കണക്കിന് അഫ്ഗാൻ കുടുംബങ്ങൾക്കായി യു.എ.ഇ സഹായം അയച്ചു. അടിയന്തര വൈദ്യ-ഭക്ഷണ സഹായ വസ്തുക്കളാണ്​ വിമാനത്തിൽ അയച്ചത്​.

രാഷ്​ട്രപിതാവ് ശൈഖ് സായിദ് ബിൻ സുൽത്താൻ ആൽ നഹ്‌യാ​െൻറ മാനവികത, സഹിഷ്ണുത, സേവനം എന്നീ മൂല്യങ്ങൾ പ്രോത്സാഹിപ്പിക്കുന്ന യു.എ.ഇ ഭരണാധികാരികളുടെ നയത്തി​െൻറ ഭാഗമായാണ് സഹായം നൽകിയത്​.ഇതിൽ മാത്രം പരിമിതപ്പെടുന്നതല്ല യു.എ.ഇ സഹായം. അബൂദബി കിരീടാവകാശിയും യു.എ.ഇ സായുധ സേനയുടെ ഡെപ്യൂട്ടി സുപ്രീം കമാൻഡറുമായ ശൈഖ് മുഹമ്മദ് ബിൻ സായിദ് ആൽ നഹ്‌യാ​െൻറ നിർദേശാനുസരണം ആയിരക്കണക്കിന് അഫ്ഗാൻ കുടുംബങ്ങൾക്കാണ് അബൂദബിയിലെ എമിറേറ്റ്‌സ് ഹ്യുമാനിറ്റേറിയൻ സിറ്റിയിൽ ആതിഥ്യം നൽകിയത്.

അവർക്ക് താൽക്കാലിക പരിചരണത്തോടൊപ്പം മരുന്നും ഭക്ഷണവും ചികിത്സയും നൽകുന്നു. കഴിഞ്ഞ ദിവസം ശൈഖ് മുഹമ്മദ് ബിൻ സായിദ് ഹ്യുമാനിറ്റേറിയൻ സിറ്റിയിൽ നേരിട്ടെത്തി ആശയവിനിമയം നടത്തിയിരുന്നു.