കുട്ടിത്താരങ്ങളേ, ഇതിലേ...

കുരുന്നുപ്രായം മുതൽ കുട്ടികളിൽ കായിക താൽപര്യം വളർത്തിയെടുക്കുന്ന കാര്യത്തിൽ മുമ്പിലാണ്​ യു.എ.ഇ. സകല കായിക ഇനങ്ങളിലും കുട്ടികൾക്ക്​ പരിശീലിക്കാൻ അക്കാദമികൾ യു.എ.ഇയിലുണ്ട്​. ലോകോത്തര ഫുട്​ബാൾ ക്ലബ്ബുകളുടെ അക്കാദമികൾ പോലും ഏറെ മുൻപേ യു.എ.ഇയിൽ ഇടംപിടിച്ചിരുന്നു. സ്കൂൾ കുട്ടികൾക്കായി യു.എ.ഇ ആവിഷ്കരിച്ച പദ്ധതിയാണ്​ സ്​കൂൾ ഗെയിംസ്​. ഇതിന്‍റെ ഭാഗമായി കുട്ടികൾക്ക്​ പരിശീലന പദ്ധതിയുമായി എത്തിയിരിക്കുകയാണ്​ യു.എ.ഇ സ്​പോർട്​സ്​ ഫെഡറേഷൻ. ഇമാറത്തി പൗരൻമാർക്കും പ്രവാസികൾക്കും ഉപകാരപ്പെടുന്നതാണ്​ പദ്ധതി. എട്ട്​ കായിക ഇനങ്ങളാണ്​ ഇതിൽ ഉൾപെടുത്തിയിരിക്കുന്നത്​.

ജൂഡോ, ഷൂട്ടിങ്​, ഫെൻസിങ്​, അത്​ലറ്റിക്സ്​, അമ്പെയ്ത്ത്​, നീന്തൽ, തൈക്വാണ്ടോ, ബാഡ്​മിന്‍റൺ എന്നിവയിലാണ്​ പരിശീലനം. മികച്ച കോച്ചുമാരുടെ കീഴിലാണ്​ പരിശീലനം. വിവിധ കായിക ഇനങ്ങളുടെ പരിശീലനം തുടങ്ങിക്കഴിഞ്ഞു. സ്​പോർട്​സ്​ ഫെഡറേഷനുകളും എമിറേറ്റ്​സ്​ സ്കൂൾ എസ്റ്റാബ്ലിഷ്​മെൻറ്​ എന്നിവയുമായി സഹകരിച്ചായിരിക്കും പരിശീലനം.

കായിക ഇനങ്ങളെ രണ്ടായി തിരിച്ചാണ്​ പരിശീലനം നൽകുന്നത്​. ആദ്യ ഗ്രൂപ്പിൽ ജൂഡോ, ഷൂട്ടിങ്​, ഫെൻസിങ്​, അത്​ലറ്റിക്സ്​, അമ്പെയ്ത്ത്​ എന്നിവയുണ്ട്​. ഈ ഗ്രൂപ്പിനായിരിക്കും കൂടുതൽ പ്രാധാന്യം. രണ്ടാം ഗ്രൂപ്പിൽ തൈ​ക്വോണ്ടോ, നീന്തൽ, ബാഡ്​മിന്‍റൺ എന്നിവയുണ്ട്​. എല്ലാ കുട്ടികൾക്കും തുല്യ അവസരമായിരിക്കും ലഭിക്കുക. പരിശീലന കേന്ദ്രങ്ങൾ മൂന്ന്​ മാസം പ്രവർത്തിക്കും. യു.എ.ഇയിൽ നടക്കുന്ന സ്കൂൾ ഗെയിംസുമായി ചേർത്താണ്​ പരിശീലനം നൽകുന്നത്​. ഇതിൽ വിവിധ എമിറേറ്റുകൾ തമ്മിലും സ്കൂളുകൾ തമ്മിലും മത്സരങ്ങളുണ്ട്​. മെയിലാണ്​ ഈ മത്സരങ്ങൾ തുടങ്ങുക.