യു.എ.ഇയുടെ വൺ ബില്യൺ മീൽസ്​; എം.എ. യൂസുഫലി 22 കോടി രൂപ സംഭാവന നൽകും

ദുബൈ: ലോകത്തിന്‍റെ വിവിധ ഭാഗങ്ങളിൽ പട്ടിണിയിലകപ്പെട്ട സമൂഹങ്ങളിലേക്ക്​ അന്നമെത്തിക്കുന്നതിന്​ യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം പ്രഖ്യാപിച്ച ‘വൺ ബില്യൺ മീൽസ്​’ പദ്ധതിയിലേക്ക്​ ലുലു ഗ്രൂപ്പ്​ ചെയർമാൻ എം.എ. യൂസുഫലി 10 ദശലക്ഷം ദിർഹം (ഏകദേശം 22.4 കോടി രൂപ) സംഭാവന ചെയ്യും. മുഹമ്മദ്​ ബിൻ റാശിദ്​ ആൽ മക്​തൂം ഗ്ലോബൽ ഇനിഷ്യേറ്റീവ്​ നടപ്പാക്കുന്ന പദ്ധതിയിൽ അഞ്ച്​ വർഷത്തേക്കാണ്​ യൂസുഫലി സംഭാവന പ്രഖ്യാപിച്ചത്​.

മനുഷ്യത്വത്തിന്‍റെ ആഗോള കേന്ദ്രമെന്ന നിലയിൽ യു.എ.ഇ നടത്തുന്ന എല്ലാ ജീവകാരുണ്യ പ്രവർത്തനങ്ങളെയും പിന്തുണക്കുക എന്ന പ്രതിബദ്ധതയുടെ ഭാഗമായാണ്​ സംഭാവന നൽകുന്നതെന്ന്​ യൂസുഫലി പറഞ്ഞു. മനുഷ്യത്വപരമായ പ്രവർത്തനങ്ങളിൽ എപ്പോഴും മുൻപന്തിയിൽ നിൽക്കുന്ന രാജ്യമാണ്​ യു.എ.ഇ. അർഹരായവരെ പിന്തുണക്കാനും അശരണർക്ക്​ ഭക്ഷണം നൽകാനുമുള്ള ശ്രമങ്ങളെ പിന്തുണക്കാൻ കഴിയുന്നത്​ അഭിമാനകരമാണെന്നും ​അദ്ദേഹം കൂട്ടിചേർത്തു.

റമദാൻ ഒന്നുമുതൽ ആരംഭിച്ച പദ്ധതി നൂറു കോടി പേർക്ക്​ ഭക്ഷണമെത്തിക്കാനുള്ള സംഖ്യ കണ്ടെത്തുന്നത്​ വരെ തുടരും. റമദാന്‍റെ ആദ്യ ആഴ്ച പിന്നിടും മുൻപേ 25 കോടി ദിർഹമാണ്​ സംഭാവനയായി ലഭിച്ചത്​. കഴിഞ്ഞ വർഷം 50 രാജ്യങ്ങളിലേക്കാണ്​​ സഹായമെത്തിച്ചത്​. 2030ഓടെ പട്ടിണി തുടച്ച നീക്കാനുള്ള യു.എന്നിന്‍റെ ലക്ഷ്യത്തെ പിന്തുണക്കുകയെന്നതും പദ്ധതിയുടെ ലക്ഷ്യമാണ്​. സ്വകാര്യ സ്ഥാപനങ്ങളും വ്യക്​തികൾക്കും പദ്ധതിയിലേക്ക്​ സംഭാനകൾ നൽകാനാവും. ഭക്ഷണപൊതികളായും വൗച്ചറുകളായുമാണ്​ അർഹരിലേക്ക്​​ എത്തുക.

എങ്ങിനെ സംഭാവന നൽകാം:

1billionmeals.ae എന്ന വെബ്​സൈറ്റ്​ വഴിയാണ്​ തുക കൈമാറേണ്ടത്​. അല്ലെങ്കിൽ എമിറേറ്റ്​സ്​ എൻ.ബി.ഡിയുടെ പ്രത്യേക ബാങ്ക്​ അക്കൗണ്ടിലേക്ക്​ പണം അയച്ചും സംഭാവന ചെയ്യാം. മൊബൈൽ ഫോണിലെ ബാലൻസിൽ നിന്ന്​ തുക അടക്കാനുള്ള സൗകര്യവും ഏർപെടുത്തിയിട്ടുണ്ട്​. ഇതിനായി ഇത്തിസാലാത്ത്​, ഡു ഉപഭോക്​താക്കൾ Meal എന്ന്​ ടൈപ്പ്​ ​ചെയ്ത ശേഷം മെസേജ്​ അയച്ചാൽ മതി. 10ദിർഹം 1034 എന്ന നമ്പറിലേക്കും 50ദിർഹമാണെങ്കിൽ 1035ലേക്കും 100ദിർഹമാണെങ്കിൽ 1036ലേക്കും 500ആണെങ്കിൽ 1038 എന്ന നമ്പറിലേക്കും എസ്​.എം.എസ്​ അയച്ചാൽ മതി. മാസത്തിൽ സംഭാവന ​​ചെയ്യാനുള്ള ഒപ്​ഷനിൽ കുറഞ്ഞ തുക 30ദിർഹമാണ്​​. 8009999 നമ്പറിൽ വിളിച്ച്​ സഹായം തേടാം.