ഒന്നിലേറെ വാഹനമുള്ളവർക്ക്​ പിഴ അടക്കാൻ സാവകാശം

ദ​ുബൈ: ഗതാഗത നിയമലംഘനത്തിനുള്ള പിഴ അടക്കുന്നതില്‍ ദുബൈ റോഡ്​ ഗതാഗത അതോറിറ്റി (ആർ.ടി.എ) ഇളവ് പ്രഖ്യാപിച്ചു. ഒന്നിലേറെ വാഹനമുള്ളവര്‍ക്കാണ് ഇളവ് ആശ്വാസമാവുക. ദുബൈയില്‍ ഒന്നിലേറെ വാഹനമുള്ളവര്‍ക്ക് ഏതെങ്കിലുമൊരു വാഹനത്തി​​െൻറ പേരിലുള്ള പിഴ മറ്റു വാഹനങ്ങളുടെ രജിസ്ട്രേഷന്‍ പുതുക്കുന്നതിന് തടസമാവില്ല എന്നാണ് പുതിയ തീരുമാനം. നേരത്തെ എല്ലാ വാഹനങ്ങളുടെയും പിഴ അടച്ചാല്‍ മാത്രമേ ഉടമയുടെ പേരില്‍ പുതിയ വാഹനം രജിസ്​റ്റര്‍ ചെയ്യാനും പുതുക്കാനും കഴിയുമായിരുന്നുള്ളു.

പിഴ കാരണം റജിസ്ട്രേഷന് കാലതാമസം വരുത്തുന്നവരുടെ എണ്ണം വര്‍ധിച്ച സാഹചര്യത്തിലാണ് നടപടിയെന്ന് ആർ.ടി.എ ലൈസന്‍സിങ് ഏജന്‍സി സി.ഇ.ഒ അഹ്മദ് ബഹ്റൂസിയാന്‍ പറഞ്ഞു. പിഴ കുന്നുകൂടി ഉടമകള്‍ മുങ്ങുന്ന സംഭവങ്ങളും റിപ്പോര്‍ട്ട് ചെയ്തിട്ടുണ്ട്​. പുതിയ തീരുമാനമനുസരിച്ച് അതത് വാഹനത്തിന്‍റെ പിഴ മാത്രം അടച്ച് രജിസ്ട്രേഷന്‍ പുതുക്കാം.

മറ്റു വാഹനങ്ങളുടെ പിഴ അടയ്ക്കാന്‍ അവയുടെ രജിസ്ട്രേഷന്‍ സമയം വരെ സമയം ലഭിക്കും. www.rta.ae എന്ന സൈറ്റ്​, ആപ്പ്​, ഉപഭോക്​തൃ സന്തോഷ കേന്ദ്രങ്ങൾ എന്നിവ വഴി നടപടി പൂർത്തിയാക്കാം.