വിസ നിയമ ഭേദഗതി: റിയൽ എസ്​റ്റേറ്റ്​ മേഖല കരുത്താർജിക്കും

അബൂദബി: വിദഗ്​ധ പ്രഫഷനലുകൾക്കും അന്താരാഷ്​ട്ര നിക്ഷേപകർക്കും പത്ത്​ വർഷ കാലാവധിയുള്ള വിസ അനുവദിക്കുന്നതിന്​ നിയമ ഭേദഗതി വരുത്താനുള്ള യു.എ.ഇ മന്ത്രിസഭയുടെ തീരുമാനം രാജ്യത്തെ റിയൽ എസ്​റ്റേറ്റ്​ മേഖ​ലയെ ശക്​തിപ്പെടുത്തുമെന്ന്​ വിലയിരുത്തൽ. ദീർഘകാല വിസ ലഭ്യമാകുന്നതോടെ യു.എ.ഇയെ സ്​ഥിരം ജോലി സ്​ഥലമായി കാണാനും വിരമിച്ചതിന്​ ശേഷവും ഇവിടെ തന്നെ തുടരാനും പലരും തയറാറായേക്കും. അതിനാൽ, യു.എ.ഇയിൽ ഫ്ലാറ്റുകൾക്കും വില്ലകൾക്കും ആവശ്യക്കാരേറും. ഇത്​ റിയൽ എസ്​റ്റേറ്റ്​ മേഖലയെ തുണക്കുമെന്നാണ്​ പ്രതീക്ഷ. ഫ്ലാറ്റുകളും വില്ലകളും വില കൊടുത്ത്​ സ്വന്തമാക്കുന്നവരും ഏറെയുണ്ടാകുമെന്ന്​ മേഖലയിലുള്ളവർ കരുതുന്നു.

​അതേസമയം, നിയഭേദഗതി സംബന്ധിച്ച പൂർണ ചിത്രം ഇനിയും ലഭ്യമാകാനുണ്ട്​. പത്ത്​ വർഷത്തെ താമസ വിസയാണ്​ പ്രഖ്യാപിച്ചിരിക്കുന്നതെങ്കിലും രാജ്യത്ത്​  ഭൂരിപക്ഷവും ഒരു തൊഴിലുടമക്ക്​ കീഴിൽ ജോലി ചെയ്യുന്ന സംവിധാനം നിലനിൽക്കെ വിസാമാറ്റം ജോലി നഷ്​ടപ്പെടുത്തിയേക്കുമെന്ന്​ ആശങ്കയുണ്ട്​. എന്നാൽ, തൊഴിലുടമയിൽനിന്ന്​ സ്വതന്ത്രമായി നിലനിൽക്കാനും ആവശ്യാനുസൃതം രാജ്യത്തുനിന്ന്​ പുറത്തുപോയി വരാനും സാധിക്കുന്ന തരത്തിൽ യു.എസിലെ ഗ്രീൻ കാർഡ്​ രീതിയിലുള്ള താമസ വിസയാണ്​ അനുവദിക്കുന്നതെങ്കിൽ അത്​ വലിയ മാറ്റമായിരിക്കും ഉണ്ടാക്കുക. പത്ത്​ വർഷ കാലാവധിയുള്ള വിസ അനുവദിക്കുന്നതിനുള്ള കൃത്യമായ മാനദണ്ഡം, പുതുക്കുന്നതിനുള്ള ഫീസ്​ തുടങ്ങിയ വിവരങ്ങളും പുറത്തുവരാനുണ്ട്​. ഇക്കാര്യങ്ങൾ ഉടൻ അറിയാൻ സാധിച്ചേക്കും. 

ഇൗ വർഷം അവസാനിക്കുന്നതിന്​ മുമ്പ്​ ഇതു സംബന്ധിച്ച നടപടികൾ പൂർത്തിയാക്കാനാണ്​ നിർദേശം നൽകിയിരിക്കുന്നത്​. 
വിദഗ്​ധ ഡോക്​ടർമാർ, എൻജിനീയർമാർ, കോർപറേറ്റ്​ നിക്ഷേപകർ അവരുടെ കുടുംബം തുടങ്ങിയവർക്കാണ്​ പത്ത്​ വർഷത്തെ വിസ അനുവദിക്കാൻ യു.എ.ഇ മന്ത്രിസഭ അനുമതി നൽകിയത്​. ഉന്നത നേട്ടം കൈവരിച്ച വിദ്യാർഥികൾക്ക്​ സാഹചര്യങ്ങൾ പരിശോധിച്ച്​ അഞ്ച്​ മുതൽ പത്ത്​ വർഷം വരെയുള്ള വിസയും അനുവദിക്കും. കൂടാതെ അന്താരാഷ്​ട്ര നിക്ഷേപകർക്ക്​ യു.എ.ഇയിലെ ബിസിനസിൽ 100 ശതമാനം വിദേശ ഉടമസ്​ഥത അനുവദിക്കാനുള്ള മന്ത്രിസഭ തീരുമാനവും രാജ്യത്തെ വിവിധ ബിസിനസ്​ മേഖലകളിൽ ക്രിയാത്​മകമായ മാറ്റം കൊണ്ടുവരും. ഫ്രീസോണിൽ മാത്രമേ നിലവിൽ 100 ശതമാനം വിദേശ നിക്ഷേപം അനുവദിക്കുന്നുള്ളൂ. അല്ലാത്തിടങ്ങളിൽ 51 ശതമാനം സ്വദേശി പങ്കാളിത്തത്തോടെ മാത്രമേ വിദേശികൾക്ക്​ ബിസിനസ്​ ചെയ്യാൻ ഇപ്പോൾഅനുമതിയുള്ളൂ.

മന്ത്രിസഭാ തീരുമാനം തിങ്കളാഴ്​ച റിയൽ എസ്​റ്റേറ്റ്​ ഒാഹരികളിലും പ്രതിഫലിച്ചു. ദുബൈയിലെ ഇമാർ പ്രോപർട്ടീസിന്​ 2.9 ശതമാനവും ഡമാക്​ പ്രോപർട്ടീസിന്​ 4.8 ശതമാനവും ഒാഹരി വിലയിൽ വർധനയുണ്ടായി. അബൂദബിയുടെ അൽദാർ പ്രോപർട്ടീസ്​ ഒാഹരി വില 1.4 ശതമാനവും ഉയർന്നു.