ജൈടെക്​സ്​ ആഗോള സാ​േങ്കതിക വാരാഘോഷത്തിന്​ ഇന്ന് തുടക്കം: ഇന്നറിയാം നാളെയുടെ ജീവിതം

ദുബൈ: സ്മാർട്ടാവാൻ വെമ്പുന്ന ലോകത്തി​െൻറ സ്പന്ദനങ്ങൾ പകർത്തി ജൈടെക്​സി​െൻറ 40ാം പതിപ്പിന് ഇന്ന് മുതൽ ദുബൈ നഗരം വേദിയാവുന്നു.ദുബൈ വേൾഡ് ട്രേഡ് സെൻററിൽ തുടങ്ങുന്ന ജൈടെക്സ് ആഗോള സാങ്കേതിക വാരാഘോഷം ഇൗ മാസം 10 വരെ തുടരും. ഗതാഗതം, ആരോഗ്യപരിപാലനം, പൊലീസിങ്, ഫുഡ്​, സുരക്ഷ സംവിധാനങ്ങൾ​, ബാങ്കിങ് തുടങ്ങിയ സകല മേഖലകളിലും സാ​േങ്കതികവിദ്യയുടെ ചിറകിലേറി വരാനിരിക്കുന്ന മാറ്റങ്ങളുടെ കണ്ണാടിയാവും​ ജൈടെക്​സ്​ പ്രദർശനം. ഒപ്പം ദുബൈ പൊലീസ്, ദുബൈ റോഡ് ട്രാൻസ്പോർട്ട് അതോറിറ്റി, ദുബൈ മുനിസിപ്പാലിറ്റി, വിവിധ എമിറേറ്റുകളിലെ സർക്കാർ ഡിപ്പാർട്​മെൻറുകൾ എന്നിവയുടെ പവലിയനുകളും പ്രദർശനങ്ങളും ഉണ്ടാകും.

ലോകം അടഞ്ഞുപോയ നാളുകളിൽനിന്ന്​ ഉയർന്നുവരുന്ന ദുബൈ നഗരം ഇത്തവണ ഏറെ വൈവിധ്യങ്ങളുമായാണ് ജൈടെക്സിന് കാത്തിരിക്കുന്നത്.ഇൗ വർഷത്തെ പ്രധാനപ്പെട്ടതും യാഥാർഥ്യ ബോധമുള്ളതുമായ ആഗോള സാങ്കേതിക ഇവൻറായിരിക്കും ജൈടെക്സ് എന്ന്​ യു.എ.ഇ വൈസ് പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്​തൂം വ്യക്തമാക്കി.

60 രാജ്യങ്ങളിൽ നിന്നുള്ള 1,200 കമ്പനികൾ നവീന സാങ്കേതികവിദ്യ പ്രദർശിപ്പിക്കും. നിർമിത ബുദ്ധി, സ്മാർട്ട് സിറ്റികൾ, സാമ്പത്തിക സാങ്കേതികവിദ്യ, വിദ്യാഭ്യാസ- ആരോഗ്യ ഭാവി, വിദൂരജോലിയുടെ ഭാവി എന്നിവയിൽ 200 പ്രധാന സാങ്കേതിക നിക്ഷേപ കമ്പനികളുടെയും 350 പ്രഭാഷകരുടെയും പങ്കാളിത്തമുണ്ടാകും -ശൈഖ് മുഹമ്മദ് പറഞ്ഞു.ആളുകൾക്ക് നേരിട്ട് പങ്കെടുക്കാൻ കഴിയുന്ന എമിറേറ്റിലെ ആദ്യത്തെ പ്രധാന പരിപാടികളിലൊന്നാണ് ജൈടെക്സ്. കർശന കോവിഡ് സുരക്ഷ ഒരുക്കിയാണ് മേളക്ക് നഗരം ആതിഥേയത്വം വഹിക്കുന്നത്.

എക്സിബിഷനുകൾ, കോൺഫറൻസുകൾ തുടങ്ങി ബിസിനസ്, വാണിജ്യ പ്രവർത്തനങ്ങളും ദുബൈ പുനരാരംഭിച്ചെങ്കിലും മാസങ്ങൾക്ക് ശേഷമാണ് അന്താരാഷ്​ട്ര ഇവൻറിന് നഗരമൊരുങ്ങുന്നത്. കൊറോണ വൈറസ്​ വ്യാപനം നിയന്ത്രിക്കാൻ മാർച്ചിൽ ഇവൻറുകൾ മാറ്റിവെക്കുകയോ റദ്ദാക്കുകയോ ചെയ്ത് നാല് മാസത്തിന് ശേഷം ജൂലൈയിലാണ് എമിറേറ്റ്സ് ആദ്യത്തെ ബിസിനസ്​ കോൺഫറൻസ് നടത്തിയത്.ആഴ്ചകൾ നീണ്ട അണുമുക്തമാക്കൽ പൂർത്തിയാക്കിയ ശേഷമാണ് സാങ്കേതികമേള നടക്കുന്ന ദുബൈ വേൾഡ് ട്രേഡ് സെൻറർ ആഗോളതലത്തിലുള്ള സാങ്കേതിക വിദഗ്ധരെയും അതിഥികളെയും കാഴ്ചക്കാരെയും വരവേൽക്കാനൊരുങ്ങുന്നത്.