ദ്രുതനടന ചുവടുകളിൽ പ്രവാസം

ഒരു നർത്തകന്​ സൗദിയിൽ എന്ത്​ ചെയ്യാനുണ്ട്? അച്ഛൻ അയച്ച വിസയിൽ സൗദി അറേബ്യയിലേക്ക്​ വരാൻ നിർബന്ധിതനായപ്പോൾ വിഷ്​ണു ആശങ്കപ്പെട്ടത്​ ഇതാണ്​. ജീവിതത്തിലെ ആഘോഷങ്ങൾ അവസാനിക്കുകയാണോ എന്ന ഉത്​കണ്​ഠ വരിഞ്ഞുമുറുക്കി. അമ്മയെ വിസ്സമ്മതമറിയിച്ചു. അച്ഛൻ പ്രകോപിതനായി. എൻജിനീയറിങ്ങിന്​ പഠിക്കാൻ വിട്ടിട്ട്​ അത്​ പൂർത്തിയാക്കാതെ ആട്ടവും പാട്ടുമായി നടക്കുന്ന മകനെ വരുതിയിലാക്കാൻ അച്ഛൻ കണ്ട മാർഗം അതുമാത്രമായിരുന്നു, സൗദിയിലേക്കൊരു വിസ.

ഡാൻസ്​ ട്രൂപ്പും ടി.വി റിയാലിറ്റി ഷോയിലെ കോറിയോഗ്രഫിയുമായി തുള്ളിച്ചാടുന്ന ജീവിതത്തെ, ഇതൊന്നുമില്ലാത്ത സൗദിയിൽ കൊണ്ടുവന്ന്​ തളച്ചിടുന്നതോളം ക്രൂരത വേറെ എന്തുണ്ട്​ എന്ന്​ സ്വയംചോദിച്ചു. ഉറക്കെ ചോദിക്കാൻ അച്ഛനെ പേടിയായിരുന്നു. വേറെ നിവൃത്തിയുണ്ടായിരുന്നില്ല. വിമാനം കയറിയേ പറ്റൂ എന്നായപ്പോൾ, എല്ലാ മോഹങ്ങളും ഹിപ്ഹോപ്​​ ഡാൻസറുടെ വേഷത്തോടൊപ്പം വീട്ടിൽ അഴിച്ചുവെച്ച്​ പാസ്പോർട്ടും എടുത്തിങ്ങുപോന്നു. അന്ന്​ അറിഞ്ഞിരുന്നില്ലല്ലോ, കലാകാരന്മാർക്കും ഈ മണൽക്കാട്​ ഫലഭൂയിഷ്​ഠത കാത്തുവെച്ചിട്ടുണ്ടെന്ന്​.

മെക്കാനിക്കൽ എൻജിനീയറിങ്ങാണ്​ പഠിച്ചത്​. എന്നാൽ, ജീവിതത്തി​െൻറ എൻജിനീയറിങ്​ ​ശരിയായത് ഡാൻസി​െൻറ മെയ്​വഴക്കത്തിലായിരുന്നു​. ഹിപ്​ഹോപ്​ ഡാൻസിലാണ്​ ജീവിതം കരുപ്പിടിപ്പിച്ചതെങ്കിലും തുടങ്ങിയത്​ ജിംനാസ്​റ്റിക്​സിലും എയറോബിക്​സിലുമാണ്​. ഈയിനങ്ങളിൽ ഇന്ത്യയിൽ നാഷനൽ ലെവൽ​ ചാമ്പ്യൻഷിപ് മത്സരങ്ങളിൽ പ​ങ്കെടുത്ത വിഷ്​ണു അതി​െൻറ തുടർച്ചയായി തന്നെ ഹിപ്​ഹോപ്പിലേക്കും ചുവടുവെക്കുകയായിരുന്നു. അതും ഒരു കായികയിനമാണ​ല്ലോ. വിഷ്​ണുവി​െൻറ ഡാൻസ്​ ടീം ഹിപ്​ഹോപ് നാഷനൽ ലെവൽ ചാമ്പ്യൻഷിപ്പിൽ ജേതാക്കളാവുകയും ചെയ്​തു. ​

അച്ഛൻ എസ്​. വിജയൻ റിയാദിൽ ഒരു കൺസ്​ട്രക്ഷൻ കരാർ കമ്പനിയാണ്​ നടത്തിയിരുന്നത്​. ഒന്നുകിൽ അതിൽ, അല്ലെങ്കിൽ മറ്റൊരു കമ്പനിയിൽ ജോലി. അതായിരുന്നു വിസ അയക്കു​േമ്പാൾ അചച്ഛൻറ ഉദ്ദേശ്യം. റിയാദിലെത്തി കുറച്ചുകാലം ഒരു കമ്പനിയിൽ ജോലിചെയ്​തു. രണ്ടുവർഷം അങ്ങനെയങ്ങുപോയി. ഡാൻസ്​ എന്നത്​ ഗൃഹാതുര ഓർമമാത്രമായി. 2010ലാണ്​ റിയാദിലെത്തിയത്​. 2013ലാണ്​ സൗദിയിലും കലാസാംസ്​കാരിക വേദികളും ആഘോഷങ്ങളും ഡാൻസ്​ വേദികളുമുണ്ടെന്നറിയുന്നത്​. റിയാദിലെ നവോദയ കലാസാംസ്​കാരിക വേദിയുടെ വാർഷികാഘോഷ പരിപാടിയായിരുന്നു തുടക്കം.

അതോടെ മനസ്സിലെ കർട്ടന്​ പിന്നിൽ അടക്കിനിർത്തിയിരുന്ന ഡാൻസർ പുറത്തുവന്നു. ഡാൻസറെക്കാൾ കോറിയോഗ്രാഫറെയായിരുന്നു പ്രവാസത്തിലെ വേദികൾക്കാവശ്യം. അല്ലെങ്കിലും അതുതന്നെയായിരുന്നല്ലോ ത​നിക്കേറ്റവും ഇഷ്​ടമായ വേഷവും.

ബ്രേക്കിൽ തുടക്കം

2001ലാണ്​ ഹിപ്​ഹോപ് ഡാൻസ്​ രൂപം കേരളത്തിൽ അവതരിപ്പിക്കപ്പെടുന്നത്​. ആ അരങ്ങേറ്റ വേദിയിൽതന്നെ ഡാൻസറായി വിഷ്​ണു. സ്വദേശമായ തിരുവനന്തപുരത്തായിരുന്നു അരങ്ങൊരുങ്ങിയതും. ഈ ഡാൻസ്​​ പരിശീലിപ്പിച്ചത്​ സിനിമാകോറിയോഗ്രാഫറായ ഉല്ലാസ്​ മോഹനനാണ്​. സ്​കൂളിൽ പഠിക്കുന്നകാലത്ത്​ ജഗതിയിലെ വീട്ടിന്​ മുന്നിലെ റോഡിലൂടെ നടന്നുപോയിരുന്ന ഒരാൾ സവിശേഷ ശ്രദ്ധയാകർഷിച്ചു. അദ്ദേഹത്തി​െൻറ നടത്തത്തിന്​ വല്ലാത്തൊരു ആകർഷണമുണ്ടായിരുന്നു. അയൽവക്കത്തെ വീട്ടിൽ താമസിച്ചിരുന്ന അദ്ദേഹം ഒരു ബ്രേക്ക്​ ഡാൻസ്​ മാസ്​റ്ററാണെന്ന്​ അന്വേഷിച്ച്​ മനസിലാക്കി. തന്നെക്കൂടി ഡാൻസ്​ പഠിപ്പിക്കുമോ എന്ന് ഒരിക്കൽ അദ്ദേഹത്തെ വഴിയിൽ തടഞ്ഞുനിർത്തി​ ചോദിച്ചു​. അദ്ദേഹം കൂടെ കൂട്ടി. അതായിരുന്നു ആദ്യ കളരി.

കോളജിൽ പഠിക്കു​േമ്പാൾ 2003ൽ പ്രമുഖ സിനിമാ കോറിയോഗ്രാഫറായ സജ്​ന നജാമി​െൻറ തിരുവനന്തപുരത്തെ സറീന ഡാൻസ്​ കമ്പനിയിൽ അംഗമായി. ഏഷ്യാനെറ്റ്​ പ്ലസി​െൻറ ലോഞ്ചിങ്​ ചടങ്ങിലായിരുന്നു ആദ്യപരിപാടി. ടി.വി ചാനലുകളിൽ റിയാലിറ്റി ഷോകൾ പ്രത്യക്ഷപ്പെട്ടുതുടങ്ങുന്ന കാലമായിരുന്നു അത്​. അമൃത ടി.വിയിൽ സൂപ്പർ സ്​റ്റാർ സിംഗർ, ഏഷ്യാനെറ്റിൽ ഐഡിയ സ്​റ്റാർ സിംഗർ, മഴവിൽ മനോരമയിൽ മിടുക്കി തുടങ്ങിയ നിരവധി റിയാലിറ്റി ഷോകളിൽ ഡാൻസ്​ ടീമംഗവും കോറിയോഗ്രാഫറുമൊക്കെയായി. അങ്ങ​നെ 20 വർഷം തുടർച്ചയായി ചാനൽ ഷോകളിൽ ഇത്തരം റോളുകൾ കൈകാര്യം ചെയ്യുന്നു. ഡാൻസ്​ ചെയ്യുന്നതിന്​ പകരം മറ്റുള്ളവരെ അത്​ പരിശീലിപ്പിച്ച്​ സ്​റ്റേജിൽ അവതരിപ്പിക്കുക എന്ന കോറിയോഗ്രാഫറുടെ​ റോളിലേക്ക്​ മാറി. സൗദിയിലെത്തിയശേഷവും ചെറിയ ഇടവേളകളെടുത്ത്​ നാട്ടിൽ പോയി ചാനൽ ഷോകളും മെഗാ ഇവൻറുകളിലെ ഡാൻസ്​ വേദികളും കൈകാര്യം ചെയ്യുന്നു.

പോൾസ്​റ്റാറി​െൻറ ഉദയം

2009ൽ നാട്ടുകാരനായ രതീഷ്​ ‘പോൾസ്​റ്റാർ’ എന്ന ഹിപ്​​ഹോപ് ഡാൻസ്​ ക്രൂ കമ്പനി തുടങ്ങി. സറീന ഡാൻസ്​ കമ്പനിയിലും പോൾസ്​റ്റാറിലും ഒരേപോലെ ഡാൻസ്​ പരിപാടികൾ ചെയ്യാൻ തുടങ്ങി. പതിയെ പോൾസ്​റ്റാറി​െൻറ നടത്തിപ്പുകാരിൽ ഒരാളായി. സിനിമകളിലും കോറിയോഗ്രഫി നിർവഹിക്കാൻ തുടങ്ങി. തമിഴിലും മലയാളത്തിലും ഉൾപ്പെടെ സിനിമകളിൽ മെയിൻ കോറിയോഗ്രാഫറോടൊപ്പം വർക്ക്​ ചെയ്യാനായി. സൗദിയിലെത്തിയശേഷം സ്വതന്ത്രമായ കോറിയോഗ്രഫി ചെയ്​തത്​​ പ്രവാസികൾ നിർമിച്ച ‘സതി’ എന്ന സിനിമക്കാണ്​​. ‘നജ’ എന്നൊരു സിനിമക്ക്​ വേണ്ടി ഇപ്പോൾ കോറിയോഗ്രഫി ചെയ്യുന്നു. സൗദിയിൽനിന്ന്​ അവധിയെടുത്തുപോയി ചാനൽ ഷോയിൽ ഗ്രൂമറായതാണ്​ മഴവിൽമനോരമയിലെ ‘ഡി ഫോർ ഡാൻസ്​’ റിയാലിറ്റി ഷോ. അതിൽ കോറിയോഗ്രഫി ചെയ്യു​േമ്പാൾ പരിശീലിപ്പിച്ച പ്രതിഭകളിലൊരാളാണ്​ ഇപ്പോൾ ‘ഭീഷ്​മപർവം’ എന്ന സിനിമയിലെ രതിപുഷ്​പം വിടരും എന്ന പാട്ടിനൊത്ത്​ എൺപതുകളിലെ ഡാൻസ്​ ചുവടുകൾ വെച്ച്​ ​​ശ്രദ്ധേയനായ റംസാൻ.

റിയാദിലെ വേദികൾ

2013ൽ റിയാദിലെ നവോദയയുടെ വേദിയിലൂടെ വിഷ്​ണുവി​െൻറ ഡാൻസ്​ ലോകം പുതിയ ഉദയംതേടുകയായിരുന്നു. കുറെ കുട്ടികളെ ഡാൻസ്​ പഠിപ്പിച്ച്​ വേദിയിൽ അരങ്ങേറ്റംകുറിച്ച്​ പുലർന്ന ആ രാത്രിക്ക്​ ശേഷം പിന്നെ തിരിഞ്ഞുനോക്കേണ്ടിവന്നിട്ടില്ല. റിയാദി​ൽ താൽപര്യവും കഴിവുമുള്ള കുട്ടികളെ ധാരാളമായി ലഭിച്ചു. അവർക്കായി ക്ലാസ്​ തുടങ്ങി. റിയാദിലുണ്ടായിരുന്ന ഭാരതീയ കലാക്ഷേത്രം എന്ന നൃത്തവിദ്യാലയത്തിലാണ്​ ആദ്യമായി ഡാൻസ്​ പഠിപ്പിക്കാൻ തുടങ്ങുന്നത്​. അതിനുശേഷമാണ്​ പോൾസ്​റ്റാർ സ്​കൂൾ സ്വന്തമായി തുടങ്ങൂന്നത്​. നാട്ടിൽ ഇപ്പോഴും സജീവമായിരിക്കുന്ന പോൾസ്​റ്റാർ ട്രൂപ്പി​െൻറ പേര്​ തന്നെ സൗദിയിലും സ്വീകരിക്കുകയായിരുന്നു. സൗദിയിലെ വേദികളിലും ഡാൻസുകൾ അവതരിപ്പിക്കുന്നത്​ പോൾസ്​റ്റാറി​െൻറ പേ​രിൽതന്നെയാണ്​. സൗദിയിൽ പോൾസ്​റ്റാർ ഡാൻസ്​ ട്രൂപ് രൂപവത്​കരിക്കു​േമ്പാൾ തുണയായിനിന്നത്​ തിരുവനന്തപുരം സ്വദേശിയായ ജുനു ആണ്​. 20 പേരടങ്ങിയ പെർഫോമിങ്​ ക്രൂ ആണ്​ ഇന്ന്​ പോൾസ്​റ്റാറിന്​ റിയാദിലുള്ളത്​. 120ലേറെ സ്​കൂൾ കുട്ടികൾ ഡാൻസ്​ പരിശീലിക്കുകയും ചെയ്യുന്നു. ക്ലാസ്​ തുടങ്ങാൻ പ്രചോദനവും തുണയുമായത്​ ബംഗളൂരു സ്വദേശികളായ മൗനയും മുരളിയുമാണ്​.​

ആദ്യവേദി റിയാദ്​ സീസണിൽ

സൗദിയിൽ റിയാദ്​ സീസണോട്​ അനുബന്ധിച്ച്​ നടന്ന ഒരു പരിപാടിയിലാണ് കോറിയോഗ്രാഫർ എന്നനിലയിൽ ആദ്യ അരങ്ങേറ്റം. ഫ്ലവേഴ്​സ്​ ടി.വിയിലെ കോമഡി ഉത്സവത്തി​െൻറ ഭാഗമായി നടന്ന ആ പരിപാടിയിൽ പോൾസ്​റ്റാർ ക്രൂവി​െൻറ ഡാൻസ്​ അവതരിപ്പിക്കാനായി. സൗദി ആദ്യമായി ആതിഥേയത്വം വഹിച്ച ഫോർമുല-ഇ കോറാട്ട മത്സരത്തി​െൻറ ഉദ്​ഘാടനച്ചടങ്ങിലും അവസരം ലഭിച്ചു​. റിയാദിലെ പൗരാണികനഗരമായ ദറഇയയിലെ ‘ദറഇയ ഗേറ്റിലായിരുന്നു ആ വേദി.​ എന്നാൽ, പ്രവാസത്തിൽ കലാജീവിതത്തി​െൻറ വഴിത്തിരിവായത്​ ‘ഗൾഫ്​ മാധ്യമം’ 2019 നവംബറിൽ റിയാദ്​ ബൻബാനിലെ ഗ്രൗണ്ടിൽ സംഘടിപ്പിച്ച ‘അഹ്​ലൻ കേരള’ എന്ന മലയാളത്തി​െൻറ മഹോത്സവമായിരുന്നു. സൗദി അറേബ്യയിൽതന്നെ അത്തരത്തിൽ ആദ്യത്തെ ഇന്ത്യൻ കലാസാംസ്​കാരിക ഉത്സവമായിരുന്നു അത്​. അരലക്ഷത്തോളം പ്രേക്ഷകർ ഒഴുകിയെത്തിയ അഹ്​ലൻ കേരളയുടെ കൂറ്റൻ വേദിയിൽ അമ്പതോളം ഡാൻസർമാരെ അണിനിരത്തി പരിപാടി അവതരിപ്പിക്കാനായത്​ ജീവിതത്തിലെ വലിയ നേട്ടമായി മാറി. അത്​ സൗദിയിലെ ത​െൻറ കലാജീവിതത്തി​െൻറ വ്യാകരണംതന്നെ മാറ്റിയെഴുതി. മലയാളത്തി​െൻറ വാനമ്പാടി കെ.എസ്​. ചിത്രയോടൊപ്പം വേദിപങ്കിടാൻ കഴിഞ്ഞതും മലയാളസിനിമയിലെ പുതിയ താരോദയം ടൊവിനോയെ വേദിയിലേക്ക്​ ആനയിക്കുന്ന സ്വാഗതനൃത്തമൊരുക്കാൻ സാധിച്ചതുമെല്ലാം മറക്കാനാവാത്ത അനുഭവമാണ്​. ജിദ്ദ സീസൺ ആഘോഷത്തി​െൻറ ഒന്നും രണ്ടും പതിപ്പുകളിൽ ‘ഇന്ത്യൻ നൈറ്റ്​’ സെഷനിൽ കോറിയോഗ്രാഫർ എന്നനിലയിൽ കഴിവുതെളിയിക്കാനായതും വലിയ നേട്ടമായാണ്​ കാണുന്നത്​. നോക്കെത്താദൂരത്തേക്ക്​ പരന്നുകിടക്കുന്ന മരുഭൂമി ഇനിയും എത്ര വിസ്​മയങ്ങളാണ്​ ഒളിപ്പിച്ചിരിക്കുന്നത്​. അതുപോലെ പ്രവാസവും ത​െൻറ കലാജീവിതത്തിനായി ഇനിയും പലതും കാത്തുവെച്ചിട്ടുണ്ടാവും എന്ന പ്രതീക്ഷയിലാണെന്നും വിഷ്​ണു പറയുന്നു. ഏറ്റവുമൊടുവിൽ ഗൾഫ്​ മാധ്യമവും ഇന്ത്യൻ എംബസിയും ചേർന്ന്​ സംഘടിപ്പിച്ച ‘മെമ്മറീസ്​ ഓഫ്​ ലജൻഡ്​സ്​’ സംഗീത പരിപാടിയിലും ആയിഷ എന്ന സിനിമയുടെ റിയാദ്​ ലുലുവിൽ നടന്ന പ്രമോഷൻ പരിപാടിയിലും വെൽകം ഡാൻസ്​ അവതരിപ്പിച്ചു. ആയിഷയിലെ നായിക മഞ്​ജു വാര്യർ പോൾസ്​റ്റാർ കുട്ടികളോടൊപ്പം ചുവടുവെച്ചു.

അഞ്​ജുവാണ് വിഷ്​ണുവി​െൻറ ജീവിതപങ്കാളി, നഴ്​സാണ്​. ഏകമകൾ നൃത്ത. പിതാവ്​ എസ്​. വിജയൻ വർഷങ്ങൾക്ക്​ മുമ്പ്​ തന്നെ റിയാദിൽനിന്ന്​ പ്രവാസം അവസാനിപ്പിച്ച്​ മടങ്ങി. നാട്ടിലെത്തി അധികം വൈകാതെ അദ്ദേഹം മരണപ്പെട്ടു. മാതാവ്​ ഗീത നാട്ടിലാണ്​​. ജിദ്ദയിലുള്ള വിജേഷ്​ എന്ന ചന്ത്രുവും എസ്​.ബി.ഐ മാനേജർ വിജിത്തും സഹോദരങ്ങളാണ്​. വിജേഷ്​ ജിദ്ദയിൽ അറിയപ്പെടുന്ന ഗായകനാണ്​.