പുരുഷവന്ധ്യത: കാരണങ്ങളും പരിഹാരവും

ദാമ്പത്യം സാർത്ഥകമാകുന്നത്​ ഒരു കുഞ്ഞി​ന്‍റെ പിറവിയോടെയാണ്​. നിർഭാഗ്യവശാൽ വന്ധ്യതക്ക്​ മുമ്പിൽ നിരാശരായി കഴിയുന്നവരുടെ എണ്ണവും വർധിക്കുകയാണ്. ആഗോള ആരോഗ്യപ്രശ്​നങ്ങളിൽ വന്ധ്യതയും ഉൾപെടുന്നു. വന്ധ്യതക്കിടയാക്കുന്ന കാരണങ്ങളിൽ സ്​ത്രീക്കും പുരുഷനും തുല്യപങ്കാണ്​.
ഏകദേശം 30 ശതമാനത്തോളം പങ്ക്​ സ്​ത്രീക്കും പുരുഷനുമുണ്ട്​. ബാക്കി 40 ശതമാനം അറിയപ്പെടാത്ത മറ്റ്​ കാരണങ്ങളാലോ രണ്ട്​ പേരുടെയും പ്രശ്​നങ്ങൾ മൂലമോ ആകാം. ആരോഗ്യകരമായ ഭക്ഷണശീലങ്ങളിൽ നിന്ന് അകന്നതും വ്യായാമക്കുറവും വന്ധ്യതക്കിടയാക്കുന്ന പ്രധാന ഘടകങ്ങളാണ്​. തിരക്കും മാനസികസമ്മർദ്ദവും പുകവലിയും മദ്യപാനവുമെല്ലാം ജീവിതശൈലിയുടെ ഭാഗമായതും വന്ധ്യതാ നിരക്ക്​ കുത്തനെ ഉയർത്തുന്നതിൽ പ്രധാന പങ്ക്​ വഹിക്കുന്നു.

പുരുഷ വന്ധ്യതയുടെ കാരണങ്ങൾ
ബീജവുമായി ബന്ധപ്പെട്ട പ്രശ്​നങ്ങളാണ്​ പുരുഷ വന്ധ്യതക്കിടയാക്കുന്ന നിർണായക ഘടകം. ഇതിന്​ പല കാരണങ്ങളുണ്ട്​. വൃഷണത്തിലെ അണുബാധ, വൃഷണ കാൻസർ, വെരിക്കോസീൽ, അകത്തേക്കിറങ്ങിയ അവസ്​ഥയിലുള്ള വൃഷ​ണം, ജീവിത തകരാറുകൾ, വൃഷണത്തിന്​ അമിതമായി ചൂടേൽക്കുക, മൂ​ത്രദ്വാരം ലിംഗത്തി​ന്‍റെ ഒരു വശത്തേക്ക്​ മാറിയ അവസ്​ഥ തുടങ്ങി നിരവധിഘടകങ്ങൾ ബീജവുമായി ബന്ധപ്പെട്ട പ്രശ്​നങ്ങൾക്കിടയാക്കുന്നുണ്ട്​.

പ്രമേഹം, തൈറോയ്ഡ്...
മുണ്ടിനീര്​, വിളർച്ച, പ്രമേഹം, തൈറോയ്​ഡ്​ പ്രശ്​നങ്ങൾ, തുടരെയുള്ള ശ്വാസകോശ രോഗങ്ങൾ എന്നിവ പുരുഷന്‍റെ പ്രത്യുൽപാദനശേഷിയെ ബാധിക്കാറുണ്ട്​.

അണുബാധ
ശുക്ലത്തിൽ ശ്വേതാണുക്കളുടെ എണ്ണം വർധിക്കുന്നത്​ അണുബാധയുടെ ലക്ഷണമാണ്​. പ്രോസ്​റ്റേറ്റ്​ ഗ്രന്ഥിയിലും മറ്റും വരുന്ന അണുബാധയും നീർക്കെട്ടും ബീജത്തി​​​ന്‍റെ അളവിനെ പ്രതികൂലമായി ബാധിക്കും.

ചൂടുള്ള സാഹചര്യങ്ങളിലെ ജോലി
ബീജോൽപാദനത്തിന്​ ശരീരോഷ്​മാവിനേക്കാളും കുറഞ്ഞ ഉൗഷ്​മാവാണ്​ അനുയോജ്യം. അധികം ഉൗഷ്​മാവുള്ള ചുറ്റുപാടിൽ ജോലി ചെയ്യുന്നവരിൽ ബീജസംഖ്യ കുറയുന്നതായി കാണുന്നു. ഫാക്​ടറികളിലെ തീച്ചൂളകളിൽ ജോലി ചെയ്യുന്നവർ, ദീർഘദൂര വാഹനങ്ങൾ, ട്രക്കുകൾ ഇവയിലെ ഡ്രൈവർമാർ തുടങ്ങിയവർക്കെല്ലാം തൊഴിൽ സാഹചര്യങ്ങളിലെ അമിതചൂട്​ വന്ധ്യതക്കിടയാക്കാറുണ്ട്​. അതിനാൽ കർശനമായ സുരക്ഷാ മാനദണ്ഡങ്ങൾ ഇവർ സ്വീകരിക്കേണ്ടതുണ്ട്​.

ബീജങ്ങളുടെ എണ്ണം കുറവ്
​പുരുഷവന്ധ്യതാ നിർണയത്തിൽ ബീജസംഖ്യക്ക്​ വളരെ പ്രാധാന്യമുണ്ട്​. ഒരു മില്ലി ലിറ്റർ ശുക്ലത്തിൽ ഒന്നരകോടിയോളം ബീജങ്ങൾ ആരോഗ്യമുള്ള ഒരാളിൽ ഉണ്ടാകണം​. ഒരു മാസത്തി​ന്‍റെ ഇടവേളയിൽ നടത്തുന്ന രണ്ട്​ പരിശോധനഫലങ്ങൾക്ക്​ കൂടുതൽ വിശ്വാസ്യതയേറുന്നു എന്നതും ശ്രദ്ധിക്കേണ്ടതുണ്ട്​. ബീജത്തി​​​​ന്‍റെ എണ്ണം കുറയുന്നത്​ വന്ധ്യതക്ക്​ കാരണമാകും.

ബീജങ്ങളുടെ ചലനം
ബീജങ്ങൾ സദാ ചലിച്ചുകൊണ്ടിരിക്കുന്നവയാണ്​. ആകെ ബീജത്തിൽ പകുതിയെങ്കിലും നേരേ മുന്നോട്ട്​ ചലിക്കുന്നവയും അതിൽ പകുതിയെങ്കിലും ദ്രുതചലന ശേഷിയുള്ളവയുമായിരിക്കണം. ബീജത്തിന്​ ശരിയായ വേഗത്തിൽ ചലിക്കാനാകാതെ വന്നാൽ കൃത്യമായി അണ്ഡവുമായി സംയോജിക്കാനാകില്ല. ഇത് വന്ധ്യതക്കിടയാക്കും.

ബീജ ആകൃതിയും പ്രധാനം
ബീജത്തിന്​ തല, ഉടൽ, വാൽ എന്നിങ്ങനെ മൂന്ന്​ ഭാഗങ്ങളുണ്ട്​. ഏകദേശം 60 മൈക്രോൺ നീളവുമുണ്ടാകും. തലയിൽ തൊപ്പിപോലുള്ള അക്രോസോം ക്യാപ്​ ഉപയോഗിച്ചാണ്​ അണ്ഡത്തി​​​​ന്‍റെ പുറംപാളിയെ ബീജം ഭേദിക്കുന്നത്​. എന്നാൽ അസ്വഭാവിക ആകൃതിയിലുള്ള ബീജത്തിന്​ ശരിയായ ദിശയിൽ സഞ്ചരിച്ച്​ അണ്ഡവുമായി യോജിക്കാൻ കഴിയാതെ വരും.

ബീജമില്ലാത്ത അവസ്ഥ
ചിലരിൽ ശുക്ലത്തിൽ ഒട്ടും ബീജമില്ലാത്ത അവസ്​ഥയുണ്ടാകും. ഇത്​ രണ്ട്​ തരത്തിൽ വരും. ബീജം പുറത്തേക്ക്​ പോകുന്നതിൽ ജന്മനാലോ പിൽക്കാലത്തോ തടസ്സമുണ്ടാകാം. കൂടാതെ ബീജോൽപാദനം തന്നെ ഇല്ലാത്ത അവസ്​ഥയുമുണ്ടാകാം. ചെറുപ്പക്കാരിലും ബീജോൽപാദനം നിലച്ച അവസ്​ഥയുണ്ടാകുന്നുണ്ട്​. യഥാർഥ കാരണം കണ്ടെത്തി ചികിത്സിക്കേണ്ടതാണ്​.

വെരിക്കോസീൽ
വൃഷണത്തി​​​ന്‍റെ മുകളിലും വശങ്ങളിലും ഞരമ്പുകൾ തടിച്ച്​പിണഞ്ഞ്​ കിടക്കുന്നതാണ്​ വെരിക്കോസിൻ. ഇതുമൂലം ബീജ അളവിനും ചലനശേഷിക്കും ന്യൂനത വരാറുണ്ട്​. എന്നാൽ വന്ധ്യതയുടെ കാരണം ഇതാകണമെന്നില്ല. ഔഷധങ്ങളുടെ ഉപയോഗത്താൽതന്നെ വെരിക്കോസിൽ ഉള്ളവരുടെ കൗണ്ടും ചലനശേഷിയും മെച്ചപ്പെടുത്താനാകും.
കൂടാതെ ബീജത്തിനെതിരെ പ്രവർത്തിക്കുന്ന ആന്‍റിസ്​പേം ആന്‍റിബോഡിയും ബീജത്തി​ന്‍റെ എണ്ണവും ശേഷിയും കാര്യമായി കുറക്കും. ശുക്ലത്തി​ന്‍റെ സാന്ദ്രതയും അമ്ലതയും കൂടുതലായിരിക്കുക, ലൈംഗിക രോഗങ്ങൾ, ഉദ്ധാരണകുറവ്​, അന്തരീക്ഷ മലിനീകരണം, കീടനാശിനികളുമായി സ്​ഥിരമായുള്ള അടുത്തിടപഴകൽ, ഇവയും പുരുഷ വന്ധ്യതിക്കിടയാക്കും.

പുകവലിയും മദ്യപാനവും
പുരുഷ വന്ധ്യതക്കിടയാക്കുന്ന രണ്ട്​ പ്രധാന ഘടകങ്ങളാണ്​ പുകവലിയും മദ്യപാനവും. പുകവലിക്കുന്നവരിൽ ബീജസംഖ്യയും ചലനശേഷിയും കുറയാറുണ്ട്​. പുകവലിക്കാരുടെ പങ്കാളികൾക്ക്​ പരോക്ഷ പുകവലിമൂലം അണ്ഡാശയ പ്രശ്​നങ്ങളും ഉണ്ടാകാറുണ്ട്​. ശരിയായ ആകൃതിയിലുള്ള ബീജങ്ങളും പുകവലിക്കാരിൽ കുറവായിരിക്കും.
മദ്യപിക്കുന്നവരുടെ രക്​തത്തിലെ ആൽക്കഹോൾ സാനിധ്യംമൂലം ബീജോത്​പാദനവും ബീജസംഖ്യയും കുറയും. ചലനശേഷിയും ബീജത്തിന്​ കുറവായിരിക്കും. അതിനാൽ പുരുഷ വന്ധ്യത തടയാൻ പുകവലിയും മദ്യപാനവും ഒഴിവാക്കിയോതിരൂ.

മാനസിക സമ്മർദ്ദം
വന്ധ്യത ഉൾപ്പെടെ ഒ​ട്ടേറെ ഗൗരവമുള്ള രോഗങ്ങൾക്ക്​ മാനസികസമ്മർദ്ദം പ്രധാന കാരണമാണ്​. പുരുഷബീജത്തി​ന്‍റെ എണ്ണവും ഗുണവും കുറുക്കുന്നതിൽ മാനസിക സമ്മർദ്ദത്തിന്​ വലിയ പങ്കുണ്ട്​. കൂടുതെ പല ലൈംഗിക അസ്വസ്​ഥതകൾക്കും മാനസികസമ്മർദ്ദം വഴിയൊരുക്കാറുമുണ്ട്​. ജോലിസ്​ഥലത്തെ സംഘർഷങ്ങൾ അവിടെതന്നെ അവസാനിപ്പിക്കാൻ ശീലിക്കുക. പാട്ട്​, വ്യായാമം, യോഗ, വായന ഇവയും സംഘർഷം ലഘൂകരിക്കും.

മൊബൈൽ ഫോണും ലാപ്​ടോപ്പും
ഇവയിൽനിന്നുള്ള വികിരണങ്ങൾ വന്ധ്യതക്കിടയാക്കുമെന്ന്​ ചില ഗവേഷണങ്ങളിൽ കണ്ടെത്തിയിട്ടുണ്ട്​.

ബീജോത്​പാദനത്തെയും ഗുണനിലവാരത്തെയും ബാധിക്കുമെന്നതിനാൽ നിയന്ത്രിത അളവിൽ സുരക്ഷിതമായി ലാപ്​ടോപും മൊബൈലും ഉപയോഗിക്കാൻ ശ്രദ്ധിക്കണം.

ഇറുകിയ വസ്​ത്രങ്ങൾ
പതിവായി ഇറുകിടയ വസ്​ത്രങ്ങൾ ധരിക്കുന്നത്​ ഒഴിവാക്കാം. സിന്തറ്റിക്​ വസ്​ത്രങ്ങളും പരമാവധി ഒഴിവാക്കുക.

ശരിയായ ജീവിതശൈലിയിലൂടെ വന്ധ്യത തടയാം
പുതുതലമുറ ജോലികൾ പലതും രാത്രിയെന്നോ പകലെന്നോ വ്യത്യാസമില്ലാത്തവയാണ്​. അതോടെ ഭക്ഷണ സംസ്​കാരത്തിലും വലിയ മാറ്റങ്ങൾ വന്നു. ഒരു ദിവസത്തെ ഏറ്റവും പ്രധാന ഭക്ഷണമായ പ്രഭാതഭക്ഷണം പാടെ ഒഴിവാക്കി പൂരിത കൊഴുപ്പുകളടങ്ങിയ രാത്രി ഭക്ഷണം പരമാവധി അളവിൽ കഴിക്കുന്ന പുതിയ പ്രവണത, വന്ധ്യതക്ക്​ വഴിയൊരുക്കുന്നതിൽ പ്രധാനമാണ്​.
പച്ചകറികൾ, നാടൻ പഴങ്ങൾ, പയർ, പരിപ്പ്​, മുഴു ധാന്യങ്ങൾ, റാഗി, ഇവയുൾപ്പെട്ട ഭക്ഷണം വന്ധ്യത തടയാൻ ഏറെ അനുയോജ്യമാണ്​. വിരുദ്ധാഹാരങ്ങൾ, ഫാസ്​റ്റ്​ഫുഡ്​ ഇവ ഒഴിവാക്കുന്നതോടൊപ്പം അത്താഴം ലഘുവാക്കുന്നതും പുരുഷ വന്ധ്യതയെ തടയാൻ അനിവാര്യമാണ്​. കുമ്പളം, ഈത്തപ്പഴം, ഉണക്കമുന്തിരി, മുരിങ്ങക്ക, നെല്ലിക്ക, മാതളം, ഏത്തപ്പഴം, തണ്ണിമത്തൻ, പപ്പായ ഇവയും നല്ല ഫലം തരും.
തണ്ണിമത്തിനലെ ഐസോപിൻ, ബീറ്റാകരോട്ടിൻ, സിട്രുലിൻ ഇവ ലൈംഗികാരോഗ്യം മെച്ചപെടുത്തും. സിട്രുലിൻ ഉദ്ധാരണശേഷയും വർധിപ്പിക്കും. മത്തി, ചൂര, നാടൻ കോഴിയിറച്ചി, നാടൻ കോഴിമുട്ട ഇവയും ഭക്ഷണത്തിൽപെടുത്താം. പാൽ, ഉഴുന്ന്​, ഗോതമ്പ്​ നല്ല ഫലം തരും. ഉപ്പ്​ കൂടുതൽ അടങ്ങിയ ഭക്ഷണങ്ങൾ, കൃത്രിമ മധുരം, കൊഴുപ്പ്​ അടങ്ങിയ ഭക്ഷണങ്ങൾ ഇവ പൊണ്ണത്തടിക്കും വന്ധ്യതക്കുമിടയാക്കുമെന്നതിനാൽ ഒഴിവാക്കണം.

ചികിത്സ
പുരുഷവന്ധ്യതയുടെ കാരണങ്ങൾ വ്യത്യസ്തമാകയാൽ ചികിത്സയും ഓരോരുത്തരിലും വ്യത്യസ്​തമായിരിക്കും. പ്രായം, ശാരീരിക മാനസിക ആരോഗ്യം, ശീലങ്ങൾ ഇവയൊക്കെ പരിഗണിച്ചാണ്​ ആയുർവേദം ചികിത്സ നൽകുന്നത്​. ശുക്ലത്തി​​​ന്‍റെ പ്രശ്​നങ്ങൾ പരിഹരിക്കുന്ന ഔഷധങ്ങൾക്കൊപ്പം ശോധന ചികിസതകൾക്കും പുരുഷ വന്ധ്യതയിൽ ഏറെ പ്രധാന്യമുണ്ട്​.
സ്​നേഹാപാനം, സ്വേദനം, വമനം, വിരേചനം, വസ്​തി, ഉത്തരവസ്​തി, രാസായന വാജികരണ ചികിത്സകൾ... ഇവയെല്ലാം പുരുഷവന്ധ്യതക്ക് അവസ്​ഥാനുസരണം നൽകുന്നു.
മനസി​ന്‍റെ ആരോഗ്യത്തിന്​ വന്ധ്യതാചികിത്സായിൽ ഏറെ പ്രധാന്യമുണ്ട്​. മനസംഘർഷത്തിൽനിന്ന്​ അകലുന്നതോടൊപ്പം ലൈംഗികബന്ധം ആഹ്ലാദകരമാക്കാനും ദമ്പതിമാർ ശ്രദ്ധിക്കേണ്ടതാണ്​.