ഉയരം കുറവാണോ? നീളം കൂട്ടാൻ 'മാന്ത്രിക വിദ്യ'യുമായി ഡോക്​ടർ; വിഡിയോ വൈറൽ

മുംബൈ: ഉയരക്കുറവിന്‍റെ പേരിൽ അനുഭവിക്കേണ്ടിവരുന്ന മാനസിക പീഡനങ്ങൾ പലരെയും തളർത്താറുണ്ട്​. ഇത്​ അവസരമായി കണ്ട്​ മാന്ത്രിക മരുന്നുകൾ അവതരിപ്പിച്ച്​ പണം തട്ടുന്നവരും അനവധി. ഇതിനിടെയാണ്​ ആളുകളുടെ കാലുകൾക്ക്​ നീളം കൂട്ടി ഉയരം നൽകാൻ സഹാായിക്കുന്ന വിദ്യയുമായി ഒരു ഡോക്​ടർ രംഗത്തെത്തിയിരിക്കുന്നത്​.

തന്‍റെ ചികിത്സ സ്വീകരിച്ച്​ ഉയരം കൂടിയ നിരവധി പേരുടെ ചിത്രങ്ങളും വിഡിയോകളുമായാണ്​ ഡോക്​ടറുടെ വരവ്​. എല്ല്​ ശസ്​ത്രക്രിയ വിദഗ്​ധനും ടിക്​​ ടോക്​ താരവുമായ ഡോ. ശഹാബ്​ മഹ്​ബൂബിയൻ ഇതിനകം നിരവധി പേർക്ക്​ തുടയെല്ലിൽ ശസ്​ത്രക്രിയ നടത്തി ഉയരം കൂട്ടിയെന്നാണ്​ അവകാശവാദം. 10 വർഷമായി ഇതേ ശസ്​ത്രക്രിയ നടത്തുന്നുണ്ടെന്നും അദ്ദേഹം പറയുന്നു.

''കഴിഞ്ഞ കുറെ വർഷങ്ങളായി ആളുകൾക്ക്​ ഉയരം നൽകാൻ മാത്രമല്ല, എന്നിട്ട്​ പതിവു നടത്തം തുടരാനും ഞാൻ സഹായിച്ചുവരുന്നുണ്ട്​. രോഗികൾക്ക്​ ആത്​മവിശ്വാസം നൽകുന്നതിലും അവരുടെ ജീവിതസ്വപ്​നങ്ങൾ സാക്ഷാത്​കരിക്കുന്നതിലും വിജയമാണ്​. ആളുകൾക്ക്​ ഉയരം കൂട്ടാൻ സഹായമാകുന്നതിൽ കടപ്പാടുണ്ട്​''- 45കാരനായ ഡോക്​ടർ പറയുന്നു.

5.6 ഇഞ്ച്​ ഉയരം വരെ കൂട്ടാൻ തനിക്കാകുമെന്നാണ്​ അവകാശവാദം. ഇതിന്​ പക്ഷേ, ആനുപാതികമായി ചെലവ്​ കൂടും. തുടയെല്ല്​ നീട്ടാൻ 75,000 ഡോളർ വരെ ചെലവ്​ വരും. മറ്റുള്ളവക്ക്​ അതിലും കൂടും. ശസ്​ത്രക്രിയ കഴിഞ്ഞ്​ മൂന്നു നാല്​ മാസങ്ങൾക്കുള്ളിൽ പരസഹായമില്ലാതെ നടക്കാനാകുമെന്നും ആറു മുതൽ എട്ടുവരെ മാസം കഴിഞ്ഞാൽ കളി പോലുള്ള വ്യായാമങ്ങളിൽ ഏർപെടാനാകുമെന്നുമാണ്​ അവകാശവാദം. ഓരോ വർഷവും 30- 40 ശസ്​ത്രക്രിയകൾ ഈയിനത്തിൽ ചെയ്യുന്നുണ്ട്​.

10 വർഷമായി ഇതേ ജോലിയിൽതന്നെയുണ്ടെന്ന്​ ഡോക്​ടർ പറയുന്നുണ്ടെങ്കിലും പലരും ഇപ്പോഴും ഇതിന്‍റെ ശാസ്​ത്രീയത ഉറപ്പിച്ചിട്ടില്ല. ഇപ്പോൾ സുഖം ലഭിച്ചാലും പ്രായം ചെല്ലു​േമ്പാൾ ഈ കാലുകൾക്ക്​ എന്തു സംഭവിക്കുമെന്ന ആശങ്കയുള്ളവരുമേറെ.