‘ബെളുത്തിട്ട് പാറാം’ ക്രീമുകളും ഹെയർ ഡൈയും കാൻസറിന് കാരണമാകുമോ?

സൗന്ദര്യവർധക വസ്തുക്കൾ ഉപയോഗിക്കുന്നവരുടെ എണ്ണത്തിൽ വലിയ മാറ്റമാണ് ഇപ്പോൾ ഉണ്ടായിരിക്കുന്നത്. ചെറിയ കുട്ടികൾ മുതൽ ക്രീമുകളടക്കം ഉപയോഗിച്ച് തുടങ്ങിയിരിക്കുന്നു. ആയിരക്കണക്കിന്​ രാസവസ്തുക്കൾ അടങ്ങിയ ഇത്തരം വസ്തുക്കൾ മനുഷ്യശരീരത്തിൽ സൃഷ്ടിക്കുന്ന പ്രശ്നങ്ങളെക്കുറിച്ച്​ ലോകത്തെമ്പാടും നിരവധി പഠനങ്ങളും ഗവേഷണങ്ങളും നടന്നുവരുന്നുണ്ട്​. സൗന്ദര്യവർധക വസ്തുക്കൾ ആരോഗ്യത്തിന് എങ്ങിനെയാണ് ദോഷകരമാകുന്നതെന്ന് പരിശോധിക്കാം....

രാസവസ്​തുക്കളുടെ അളവ്

സോഷ്യൽ മീഡിയയിലെയും ടി.വിയിലെയും പരസ്യങ്ങൾ കണ്ട് ക്രീമുകൾ വാങ്ങി തേക്കുന്നതിന് മുമ്പ് അവയിൽ അടങ്ങിയ രാസവസ്​തുക്കളുടെ ഗുണനിലവാരം, അളവ്​ എന്നിവയെക്കുറിച്ച് അറിഞ്ഞിരിക്കണം. എന്നാൽ, ഭൂരിഭാഗം പേരും ഇവയെക്കുറിച്ചൊന്നും ബോധവാന്മാരല്ല. ഇവ തുടർച്ചയായി ഉപയോഗിക്കുന്നതുകൊണ്ടുള്ള ആരോഗ്യപ്രശ്നങ്ങളെക്കുറിച്ച്​ നിർമാതാക്കൾതന്നെ നൽകുന്ന മുന്നറിയിപ്പുകളെക്കുറിച്ചും ഭൂരിപക്ഷം പേർക്കും അറിവില്ല.

ഹെയർ ഡൈയെ സൂക്ഷിക്കണം

50 ശതമാനത്തിലധികം ആളുകളും​ ഇന്ത്യയിൽ ഹെയർ ഡൈ അല്ലെങ്കിൽ ഹെയർ കളറുകൾ ഉപയോഗിക്കുന്നുണ്ട്. ഇതിൽതന്നെ സ്​ത്രീകളാണ്​ കൂടുതൽ. മുൻവർഷങ്ങളെ അപേക്ഷിച്ച്​ കോടിക്കണക്കിന്​ ഡോളറിന്‍റെ വിപണിയാണ്​ ഇത്തരം ഉൽപന്നങ്ങൾക്ക്​ ഇന്ത്യയിലുള്ളത്​. മുടിക്ക്​ നിറം നൽകാൻ ഉപയോഗിക്കുന്ന വസ്തുക്കൾ മനുഷ്യരിൽ കാൻസറിന്​ കാരണമാകുന്നു​ണ്ടോ എന്നതിനെക്കുറിച്ച് രണ്ടു പതിറ്റാണ്ടിലധികമായി ഗവേഷകരുടെ നേതൃത്വത്തിൽ നിരവധി പഠനങ്ങൾ നടന്നുവരുന്നുണ്ട്. ഇവയിൽ പലതിലും ഹെയർ ഡൈകൾ കാൻസറിന്​ കാരണമാവുന്നുണ്ട്​ എന്ന്​ മുന്നറിയിപ്പ്​ നൽകുന്നു. ചില പഠനങ്ങളിൽ ഇതു തെളിയിക്കപ്പെടാതെയും പോയിട്ടുണ്ട്​.

‘ഇന്‍റർനാഷനൽ ഏജൻസി ഫോർ റിസർച് ഓൺ കാൻസർ’ ഇതിനെക്കുറിച്ച്​ വ്യക്തമായ മുന്നറിയിപ്പുകൾ നൽകിയിട്ടുണ്ട്​. ​ഈ ഏജൻസി നടത്തിയ പഠനത്തിൽ, കാൻസറിന്​ കാരണമാവുന്ന വസ്തുക്കളുടെ (Carcinogens) പട്ടികയിൽ ഇത്തരം ഉൽപന്നങ്ങളെ ഉൾപ്പെടുത്തിയിട്ടില്ലെങ്കിലും കാൻസർ സാധ്യതയുള്ളവയുടെ പട്ടികയിൽ ഇവയുണ്ട്​.

‘ചിലപ്പോൾ കാൻസറിന്​ കാരണമായേക്കാം’ എന്ന്​ മുന്നറിയിപ്പ്​ നൽകുന്ന വസ്​തുക്കളുടെ പട്ടികയായ ‘2A’യിൽ ഹെയർ ഡൈകൾ ഉൾപ്പെടുത്തിയിട്ടുണ്ട്. ഈ ഉൽപന്നങ്ങൾ നിരന്തരം ഉപയോഗിക്കുന്ന ഹെയർ കട്ടിങ്​ സലൂണുകൾ, ബ്യൂട്ടി പാർലറുകൾ എന്നിവിടങ്ങളിൽ ജോലിയെടുക്കുന്നവർക്ക്​ കാൻസർ വരാനുള്ള സാധ്യത വളരെ കൂടുതലാണെന്ന്​ ഐ.എ.ആർ.സി കണ്ടെത്തിയിട്ടുണ്ട്.

ഹെയർ ഡൈകൾ ഉപയോഗിച്ചാൽ കാൻസർ വരും എന്ന്​ വ്യക്​തമായി തെളിയിക്കാൻ കഴിയുന്ന ഗവേഷണ ഫലങ്ങൾ ലഭ്യമല്ലാത്തതിനാൽതന്നെ ലോകാരോഗ്യ സംഘടന ഇതുസംബന്ധിച്ച മുന്നറിയിപ്പുകൾ ഇതുവരെ പുറത്തുവിട്ടിട്ടില്ല.

ടാറ്റൂ വില്ലനാകും

യുവതീയുവാക്കളിൽ ‘പച്ചകുത്തൽ’ അഥവാ ടാറ്റൂയിങ് സാധാരണമാണിപ്പോൾ. പ്രശസ്ത ശാസ്​ത്ര പ്രസിദ്ധീകരണമായ ‘ദ ലാൻസെറ്റ്’ ജേണലിൽ പ്രസിദ്ധീകരിച്ച ശ്രദ്ധേയ പഠനത്തിൽ പച്ചകുത്തുന്നവരിൽ അത്​ ചെയ്യാത്തവരെ അപേക്ഷിച്ച്​ കാൻസർ വരാനുള്ള സാധ്യത 21 ശതമാനത്തോളം കൂടുതലാണെന്ന് കണ്ടെത്തിയിട്ടുണ്ട്​​. ഇതിൽതന്നെ ‘ലിംഫോമ’ എന്ന ഗണത്തിൽപ്പെട്ട കാൻസറാണ് കൂടുതലായി​ കണ്ടുവരുന്നത്​.

ടാറ്റൂവിന്​ വേണ്ടി ഉപയോഗിക്കുന്ന മഷികളിൽ ഉപയോഗിക്കുന്ന ഘന ലോഹങ്ങൾ, അസോ ഡൈകൾ, പോളിസൈക്ലിക് ആരോമാറ്റിക് ഹൈഡ്രോകാർബണുകൾ (PAHs) തുടങ്ങിയ ഹാനികരമായ പദാർഥങ്ങളാണ്​ അപകട സാധ്യതയുയർത്തുന്നത്. ഇവയിലധികവും കാൻസറിന്​ കാരണമാവും എന്ന്​ കണ്ടെത്തിയ രാസവസ്തുക്കളാണ്​. ചർമത്തിലൂടെ ഇത്തരം രാസവസ്തുക്കൾ ശരീരത്തിൽ പ്രവേശിച്ച്​ കാലക്രമേണ ‘കഴല’കൾ എന്ന്​ വിളിക്കുന്ന ലിംഫ് ഗ്രന്ഥികളിലും (lymph glands) മറ്റ് അവയവങ്ങളിലും അടിഞ്ഞുകൂടുകയും കാൻസർ ഉൾപ്പെടെയുള്ള ദീർഘകാല ആരോഗ്യപ്രശ്നങ്ങൾക്ക് കാരണമാവുകയും ചെയ്യും.

ടാറ്റൂകളെ കാൻസറുമായി ബന്ധിപ്പിക്കുന്ന നേരിട്ടുള്ള തെളിവുകൾ താരതമ്യേന പരിമിതമാണെങ്കിലും തൊലിപ്പുറത്ത്​ കണ്ടുവരുന്ന മെലനോമ (Melanoma), സ്ക്വാമസ് സെൽ കാർസിനോമ (Squamous cell carcinoma), ബേസൽ സെൽ കാർസിനോമ (Basal cell carcinoma) തുടങ്ങിയ കാൻസറുകൾ നിരവധി​ പേരിൽ കണ്ടെത്തിയിട്ടുണ്ട്. ഇതിന്​ പുറമെയാണ്​ ടാറ്റൂ ചെയ്യാൻ ഉപയോഗിക്കുന്ന ഉപകരണങ്ങൾ അണുമുക്തമാക്കാത്തപക്ഷം ഹെപ്പറ്റൈറ്റിസ്​- സി വരാനുള്ള സാധ്യത. ഹെപ്പറ്റൈറ്റിസ്​- സി രോഗികളിൽ ചെറുതല്ലാത്ത ശതമാനം പേരിൽ ‘ലിം​േഫാമ’ എന്ന കാൻസർ കണ്ടുവരുന്നുണ്ട്​ എന്നതും ​ഗൗരവതരമാണ്.