രാജ്യം അപകടാവസ്​ഥയിൽ; മാസ്​ക്​ ധരിക്കുന്നവരുടെ എണ്ണം കുത്തനെ കുറഞ്ഞെന്ന്​ ആരോഗ്യവിദഗ്​ധർ

ന്യൂഡൽഹി: ഇന്ത്യയിൽ മാസ്​ക്​ ഉപയോഗിക്കുന്നവരുടെ എണ്ണം കുത്തനെ കുറഞ്ഞതായി ആരോഗ്യ വിദഗ്​ധർ. കോവിഡിന്‍റെ പുതിയ വകഭേദമായ ഒമിക്രോൺ ആശങ്ക പടർത്തുന്ന സാഹചര്യത്തിൽ നാം അപകട മേഖലയിലാണെന്നും നീതി ആയോഗ്​ അംഗം ഡോ. വി.കെ. പോൾ പറഞ്ഞു.

രാജ്യത്ത്​ മാസ്​ക്​ ഉപയോഗിക്കുന്നവരുടെ എണ്ണം 60 ശതമാനത്തിൽ താഴെയായി. 2020 ഡിസംബറി​നേക്കാൾ ഏറ്റവും കുറഞ്ഞ നിരക്കാണിതെന്നും ഇത്​ രണ്ടാം തരംഗത്തിന്​ മുമ്പുള്ള ഏറ്റവും താഴ്​ന്ന നിലയാണെന്നും ​അദ്ദേഹം പറഞ്ഞു.

ഇൻസ്റ്റിറ്റ്യൂട്ട്​ ഓഫ്​ ഹെൽത്ത്​ മെട്രിക്​സിന്‍റെ കണക്കുപ്രകാരം വളരെ കുറച്ചുപേർ മാത്രമാണ്​ ഇപ്പോൾ മാസ്​ക്​ ശരിയായി ഉപയോഗിക്കുന്നതെന്ന്​ അദ്ദേഹം ചൂണ്ടിക്കാട്ടി.

കോവിഡിന്‍റെ പുതിയ തരംഗത്തിനെ ചില രാജ്യങ്ങൾ നേരിട്ടുകൊണ്ടിരിക്കുന്നു. വാക്​സിൻ സ്വീകരിച്ചവരിലും രോഗം ബാധിക്കുന്നു. പുതിയ വ​കഭേദമായ ഒമിക്രോണിന്‍റെ വ്യാപനമോ രോഗത്തിന്‍റെ ഗുരുതരാവസ്​ഥയോ സംബന്ധിച്ച കാര്യങ്ങളിൽ വ്യക്തതയില്ല. ഈ സാഹചര്യത്തിൽ ഇന്ത്യയിൽ മാസ്​ക്​ ഉപയോഗിക്കുന്നവരുടെ എണ്ണം കുത്തനെ കുറയുന്നത്​ ആശങ്കയുണ്ടാക്കുന്നുവെന്നും അദ്ദേഹം പറഞ്ഞു.