പുകവലി വിരുദ്ധ പ്രതിജ്ഞയെടുക്കാം; ഇന്ന്​ ലോക പുകയിലവിരുദ്ധ ദിനം

ഈ വര്‍ഷത്തെ പുകയില വിരുദ്ധ ദിനത്തി​​​​െൻറ പ്രമേയം ‘പുകയിലയുടെ ഉപയോഗത്തില്‍നിന്നും  പുകയില വ്യവസായശൃംഖലയുടെ ചൂഷണങ്ങളില്‍നിന്നും യുവജനങ്ങളെ സംരക്ഷിക്കുക’ എന്നതാണ്. 
പുകവലിമൂലം ഓരോ വര്‍ഷവും ലോകത്ത്​ 80 ലക്ഷം ആളുകൾ മരിക്കുന്നു. ശ്വാസകോശ കാന്‍സറി​​​​െൻറ 80 ശതമാനവും പുകവലിമൂലമാണ്​. സ്ഥിരമായി പുകവലിക്കുന്നവരിൽ കാണപ്പെടുന്ന വിട്ടുമാറാത്ത ചുമ, കഫക്കെട്ട്, കിതപ്പ്​ എന്നിവ സി.ഒ.പി.ഡി യുടെ (ക്രോണിക്​ ഒബ്‌സ്ട്രക്റ്റിവ്​ പള്‍മനറി ഡിസീസ്) ലക്ഷണങ്ങളാകാം. പുകവലി തുടരുകയും ശരിയായ ചികിത്സ തേടുകയും ചെയ്യാതിരുന്നാൽ ദൈനംദിന കാര്യങ്ങളിൽപോലും കിതപ്പ്​ അനുഭവപ്പെടുകയും ക്രമേണ ഓക്‌സിജൻപോലും ആവശ്യമായി വരുകയും ചെയ്യാവുന്ന അസുഖമാണിത്. ആസ്​ത്​മ തുടങ്ങിയ അസുഖങ്ങളും നിയന്ത്രിക്കാൻ ബുദ്ധിമുട്ടേറെ. ഹൃദ്രോഗസാധ്യതയും കൂടും. 

സിഗരറ്റ് എരിയുന്നതില്‍നിന്നു വരുന്ന പുകയും പുകവലിക്കുന്നയാൾ പുറത്തേക്ക്​ തള്ളുന്ന പുകയും ഉള്‍പ്പെടുന്ന ‘സെക്കൻഡ്​ഹാൻഡ്​ സ്​മോക്​’, പുകവലിക്കുന്ന ആളുടെ സമീപത്ത്​ നില്‍ക്കുന്ന ആള്‍ക്കാരിൽ പ്രത്യേകിച്ച്​ കുട്ടികളിലും ഗര്‍ഭിണികളിലും പുകവലിയുടെ എല്ലാ ദോഷങ്ങളും ഉണ്ടാക്കാൻ കെൽപുള്ളതാണ്. ഈ പുക ശ്വസിച്ച്​ ഒരു വര്‍ഷം 10 ലക്ഷം ആള്‍ക്കാർ മരിക്കുന്നു. വീട്ടിലിരുന്ന്​ പുകവലിക്കുമ്പോൾ പുകയും അതിലടങ്ങിയിരിക്കുന്ന കെമിക്കലുകളും കാര്‍പറ്റ്, ഭിത്തി, കളിപ്പാട്ടങ്ങള്‍, തുണി, ഗൃഹോപകരണങ്ങൾ എന്നിവയിൽ വന്നടിയുന്നു. ഇതാണ് ‘തേഡ്​ ഹാൻഡ് ​സ്​മോക്​’. ഇലക്ട്രോണിക്​ സിഗരറ്റ് (ഇ-സിഗരറ്റ്) പുകയില്ലെങ്കിലും അതിൽനിന്നു വരുന്ന സൂക്ഷ്മകണങ്ങൾ ശ്വസിക്കുന്നതിലൂടെ വിനാശകരമായ രാസപദാർഥങ്ങൾ മനുഷ്യശരീരത്തിൽ എത്തുന്നുണ്ട്.

ഇന്ന്​ ലോകജനതയെ മുഴുവനും ഭീതിയിലാഴ്ത്തിയിരിക്കുന്ന കൊറോണ വൈറസ്​ പുകവലിക്കാരിൽ കൂടുതൽ തീവ്രമായ രോഗലക്ഷണങ്ങളാണ്​ ഉണ്ടാക്കുന്നത്. ഇത്​ ന്യൂമോണിയയായി മാറാൻ സാധ്യത കൂടുതലാണെന്ന്​ പഠനങ്ങൾ തെളിയിക്കുന്നു.

പുകവലി ഉപേക്ഷിക്കുക ഈ ശീലത്തിന്​ അടിമപ്പെട്ട ഏതൊരാള്‍ക്കും  സ്വീകരിക്കാവുന്ന ആരോഗ്യപരമായ തീരുമാനമാണ്. പ്രായമോ, ഈ ശീലത്തി​​​​െൻറ കാലപ്പഴക്കമോ ഒന്നും അതിന്​ ​വിലങ്ങു തടിയല്ല. പുകവലിയുടെ ദോഷവശങ്ങൾ തിരിച്ചറിഞ്ഞ്​ ഈ ശീലം ഉപേക്ഷിക്കാനുള്ള ആഗ്രഹവും നിശ്ചയവും അവനവനിൽതന്നെ ഉണ്ടാവുന്നതാണ്​ രക്ഷനേടാനുള്ള ആദ്യപടി. അതിന്​ സഹായിക്കുന്ന ക്ലാസുകളും കൗൺസലിങ്​ സെഷനുകളും ലഭ്യമാണ്.
സ്ഥിരമായി പുകവലിക്കുന്നവർ പെട്ടെന്ന്​ പുകവലി നിര്‍ത്തുമ്പോൾ ചെറിയ തോതിലുള്ള ശാരീരിക അസ്വസ്ഥതകൾ അനുഭവപ്പെടും. തലവേദന, വിയര്‍പ്പ്, ഉറക്കക്കുറവ്, ദേഷ്യം, അധികവിശപ്പ്​ എന്നിവയാണ്​ അവയിൽ ചിലത്. അതുകൊണ്ട്​ സിഗരറ്റ്​വലിയുടെ എണ്ണം ഘട്ടംഘട്ടമായി കുറക്കുന്നതാണ്​ അഭികാമ്യം. മാത്രമല്ല, മേൽപറഞ്ഞ ലക്ഷണങ്ങൾ ക്രമേണ കുറയുകയും ഇല്ലാതാവുകയും ചെയ്യും.

പുകയിലയിൽ അടങ്ങിയിരിക്കുന്ന നിക്കോട്ടിന്‍, ച്യൂയിംഗം, ദേഹത്ത്​ ഒട്ടിക്കുന്ന പാച്ചുകൾ തുടങ്ങിയവയിലൂടെ ശരീരത്തിൽ എത്തിക്കുന്ന ചികിത്സാരീതിയാണ്​ നിക്കോട്ടിൻ റീപ്ലേസ്‌മ​​​െൻറ്​. പുകവലി നിര്‍ത്തുമ്പോള്‍, അസ്വസ്ഥതകൾ ഉണ്ടാകാതിരിക്കാനും വീണ്ടും വീണ്ടും പുകവലിക്കണം എന്ന തോന്നൽ ഉണ്ടാകാതിരിക്കാനും ഈ ചികിത്സാരീതി സഹായകമാണ്. ഇത്​ വിദഗ്ധ ഡോക്ടറുടെ നിർദേശപ്രകാരം നിശ്ചിതകാലയളവിലേക്ക് മാത്രമേ അവലംബിക്കാവൂ. ഈ ചികിത്സാരീതി 75 ശതമാനത്തോളം വിജയകരമാണ്. 

പുകവലി എന്ന ദുശ്ശീലത്തില്‍നിന്ന്​ സ്വയം രക്ഷനേടാനും ദൂരവ്യാപകമായ വിപത്തുകളില്‍നിന്നു കുടുംബാംഗങ്ങളെ സംരക്ഷിക്കാനും ഈ ദിനം പ്രതിജ്ഞാബദ്ധരാകാം. 

(കോഴിക്കോട്‌ മേയ്ത്ര ഹോസ്പിറ്റല്‍ പള്‍മനോളജി വിഭാഗത്തിൽ ഡോക്​ടർമാരാണ്​ ഇരുവരും)