കോവിഡ്​ ഭേദമായാലും കുഞ്ഞുങ്ങളെ ശ്രദ്ധിക്കണം

കോവിഡ്​ ഭീഷണി നിലനിൽക്കുന്ന മനുഷ്യരാശിക്ക്​ മുകളിൽ കൂനിന്മേൽ കുരു എന്നപോലെ പ്രത്യക്ഷപ്പെടുന്ന ആരോഗ്യപ്രശ്​നങ്ങൾ കടുത്ത ഭീഷണിയാണ്​ ഉയർത്തിയിരിക്കുന്നത്​. പോസ്​റ്റ്​ കോവിഡ്​ സിൻഡ്രം (Post-COVID Syndrome) എന്ന്​ പൊതുവിൽ വിളിക്കുന്ന രോഗങ്ങളാണ്​ കോവിഡ്​-19 ബാധിച്ച്​ സുഖപ്പെടുന്ന ചിലരിൽ ആഴ്​ചകൾക്കകം പ്രത്യക്ഷപ്പെടുന്നത്​. ഇതിൽ പ്രധാനപ്പെട്ട ഒന്നാണ്​ മൾട്ടി സിസ്​റ്റം ഇൻഫ്ലമേറ്ററി സിൻഡ്രം (multisystem inflammatory syndrome) അഥവാ ശരീരത്തിലെ വിവിധ അവയവങ്ങളിൽ നീർക്കെട്ട് ഉണ്ടാവുന്ന അവസ്​ഥ​. തുടക്കത്തിൽ രോഗനിർണയം നടത്തി വിദഗ്​ധ ചികിത്സ നൽകിയില്ലെങ്കിൽ മാരകമായിത്തീരാവുന്ന ഒരു രോഗമാണിത്​. കൂടുതലും കുട്ടികളെയാണ്​ ഈ രോഗം ബാധിക്കുന്നത്​.

നേരത്തേ ലോകത്തി​െൻറ വിവിധ ഭാഗങ്ങളിൽ 'കാവസാക്കി' എന്ന പേരിൽ പ്രത്യക്ഷപ്പെട്ട ഈ രോഗം ഇപ്പോൾ ​കോവിഡ്ബാധയോടനുബന്ധിച്ച്​ വീണ്ടും വ്യാപകമാവുകയാണ്. അവികസിത രാജ്യങ്ങളിൽ ​ഏതാനും മരണങ്ങൾ റിപ്പോർട്ട്​ ചെയ്​തതോടെയാണ്​ ആരോഗ്യപ്രവർത്തകർ ഇക്കാര്യം ഗൗരവമായെടുത്തത്​. ഇതിനുപിന്നാലെ ലോകത്ത്​ നിരവധി രാഷ്​ട്രങ്ങളിൽ ഈ രോഗം റിപ്പോർട്ട്​ ചെയ്​തു. തുടർന്ന്​ ​ലോകാരോഗ്യ സംഘടന ഇതിനെ 'മൾട്ടി സിസ്​റ്റം ഇൻഫ്ലമേറ്ററി സിൻഡ്രം ഇൻ ചിൽഡ്രൻ'(MIS-C) എന്ന്​ നാമകരണം ചെയ്​ത്​ ചികിത്സ സംബന്ധിച്ച നിർദേശങ്ങൾ പുറപ്പെടുവിച്ചിരിക്കുകയാണ്​. ​

രോഗലക്ഷണങ്ങൾ

കോവിഡ്‌മുക്തരായ കുട്ടികളിൽ അഞ്ചുദിവസത്തിൽ കൂടുതൽ നീണ്ടുനിൽക്കുന്ന പനി, കണ്ണിനുള്ളിൽ ചുവപ്പുനിറം, ശരീരത്തിൽ ചുവന്ന പാടുകൾ, വയറുവേദന, കൈകാലുകളിൽ നീർക്കെട്ട്​, ഛർദി, വയറിളക്കം, കടുത്ത ക്ഷീണം എന്നീ ലക്ഷണങ്ങൾ കാണുകയാണെങ്കിൽ എത്രയും പെ​ട്ടെന്ന്​ ഒരു ​ശിശുരോഗ വിദഗ്​ധ​െൻറ സഹായം തേടേണ്ടതാണ്​. മൾട്ടി സിസ്​റ്റം ഇൻഫ്ലമേറ്ററി സിൻഡ്രം ബാധിച്ച ചില കുട്ടികളിൽ ശ്വാസംമുട്ടൽ, ബോധക്ഷയം, ചുണ്ടിലും മുഖത്തും നീലനിറം എന്നീ ലക്ഷണങ്ങളും റിപ്പോർട്ട്​ ചെയ്​തിട്ടുണ്ട്​.

തുടക്കത്തിൽതന്നെ കൃത്യമായ ചികിത്സ ലഭിച്ചിട്ടില്ലെങ്കിൽ രോഗചികിത്സ സങ്കീർണമാവാൻ സാധ്യതയുണ്ട്​. സാധാരണയായി അഞ്ചുവയസ്സുവരെയുള്ള കുട്ടികളിൽ വിരളമായി മാത്രം കണ്ടുവന്നിരുന്ന ഈ രോഗം കോവിഡിനുശേഷം 12 വയസ്സുവരെയുള്ള കുട്ടികളിൽ റിപ്പോർട്ട്‌ ചെയ്​തിട്ടുണ്ട്​. ഹൃദയത്തിലേക്ക്‌ രക്തം എത്തിക്കുന്ന ധമനികളെവരെ ബാധിക്കുന്നതിനാൽ ചികിത്സ വൈകുന്നതിനനുസരിച്ച്​​ രോഗി അതിഗുരുതരാവസ്​ഥയിലാവുന്നു​.

കുട്ടികളിൽ കോവിഡ്​ ലക്ഷണങ്ങൾ കുറവ്​

നമ്മുടെ നാട്ടിൽ മുതിർന്നവരെ അപേക്ഷിച്ച്​ കുട്ടികളെ കുറഞ്ഞതോതിൽ മാത്രമാണ്​ കോവിഡ്​-19 ബാധിച്ചിട്ടുള്ളത്​. അതുതന്നെ താരതമ്യേന ലഘുവായ ലക്ഷണങ്ങളോടെയാണ് പല കുഞ്ഞുങ്ങളിലും ഈ രോഗം വന്നുപോയത്​. ലക്ഷണങ്ങൾ പുറത്തുകാണിക്കാത്തതിനാൽ രോഗബാധയുണ്ടായ കുട്ടികളിൽ പലരെയും രോഗികളായി കരുതുകയും ചെയ്​തിട്ടില്ല. കോവിഡ്​ പരിശോധനക്ക്​ കുട്ടികളെ കൊണ്ടുവരാത്തത്​ ഇതെല്ലാം മൂലമാണ്​.

ഈ സാഹചര്യത്തിൽ മുകളിൽ സൂചിപ്പിച്ച ലക്ഷണങ്ങളിൽ ചിലത്​ കുഞ്ഞുങ്ങളിൽ പ്രത്യക്ഷപ്പെട്ടാലും മുതിർന്നവർ അതിനെ ഗൗരവമായി കാണാനിടയില്ല. ഈ സാഹചര്യത്തിലാണ്​ രോഗത്തെക്കുറിച്ച്​ വ്യാപകമായ ബോധവത്​കരണം ആവശ്യമായി വരുന്നത്​. കേരളത്തിലെ വിവിധ നഗരങ്ങളിൽ ഇതിനകം ഇത്തരം നിരവധി കേസുകൾ റിപ്പോർട്ട്​ ചെയ്​തുകഴിഞ്ഞിട്ടുണ്ട്. രോഗം പിടിപെടുന്ന കുഞ്ഞുങ്ങളിൽ എല്ലായ്​പോഴും ​മുകളിൽ സൂചിപ്പിച്ച എല്ലാ ലക്ഷണങ്ങളും ഉണ്ടാവണമെന്ന്​ നിർബന്ധമില്ല. കുട്ടികളുടെ ശാരീരികാവസ്​ഥയനുസരിച്ച്​ ഏതെങ്കിലും ചില ലക്ഷണങ്ങൾ മാത്രമായിരിക്കും പ്രത്യക്ഷപ്പെടുക.

ആന്തരികാവയവങ്ങ​​​ളെ ബാധിക്കുന്നു

ഈ രോഗം പിടിപെട്ടുകഴിഞ്ഞാൽ ഹൃദയപേശികളിലേക്കുള്ള രക്​തക്കുഴലുകളിൽ നീർക്കെട്ടുണ്ടാവുകയും ആവശ്യത്തിന്​ രക്​തം ലഭിക്കാതെ ഹൃദയത്തി​െൻറ പ്രവർത്തനം താറുമാറാവുകയും ചെയ്യുന്നു. ഇതുപോലെത്തന്നെ ബന്ധപ്പെട്ട രക്​തധമനികളിലെ നീർക്കെട്ട്​ മൂലം വൃക്കകളുടെയും മറ്റു ആന്തരികാവയവങ്ങളുടെയും പ്രവർത്തനം തകരാറിലാവുന്നു. ഈ അവസ്​ഥകളെല്ലാം ശരീരത്തി​െൻറ പ്രവർത്തനത്തെ ഗുരുതരമായി ബാധിക്കുകയും രോഗിയുടെ ജീവൻതന്നെ അപകടത്തിലാവുകയും ചെയ്യുന്നു.

ലക്ഷണങ്ങൾ കണ്ടയുടൻ വിദഗ്​ധ ചികിത്സ ലഭ്യമാക്കിയാൽ വലിയ പ്രയാസങ്ങളില്ലാതെ രോഗം മാറ്റിയെടുക്കാൻ കഴിയുന്ന മരുന്നുകളും മറ്റു സംവിധാനങ്ങളും ഇന്ന്​ നിലവിലുള്ളതിനാൽ ഭയത്തിന്​ പകരം ഈ രോഗത്തിനും ജാഗ്രതയാണ്​ അത്യാവശ്യം.

രോഗലക്ഷണങ്ങൾ ശ്രദ്ധയിൽപ്പെട്ടാൽ

​കോവിഡ്​-19 വന്ന്​ സുഖപ്പെട്ട കുട്ടികളിലോ ​​കോവിഡ്​ ബാധയുണ്ടായ വീടുകളിലെ കുട്ടികളിലോ ​കോവിഡ്​ രോഗിയുമായി സമ്പർക്കം സംശയിക്കുന്ന കുട്ടികൾക്കോ മൾട്ടി സിസ്​റ്റം ഇൻഫ്ലമേറ്ററി സിൻഡ്രവുമായി ബന്ധപ്പെട്ട ലക്ഷണങ്ങൾ കണ്ടെത്തിയാൽ വീട്ടിലിരിക്കുന്ന മരുന്നുകൾ നൽകി പരീക്ഷണങ്ങൾക്ക്​ മുതിരാതെ ഉടൻ ഡോക്​ടറെ സമീപിക്കുകയും കോവിഡ്​രോഗബാധയുണ്ടായ വീടുകളിലെ കുട്ടികളാണെങ്കിൽ അക്കാര്യം ആദ്യംതന്നെ പ്രത്യേകമായി ഡോക്​ടറുടെ ശ്രദ്ധിയിൽപ്പെടുത്തുകയും വേണം. രോഗം വിവിധ ആന്തരികാവയവങ്ങ​​​ളെ ബാധിക്കാൻ സാധ്യതയുള്ളതിനാൽ ആധുനിക സൗകര്യങ്ങളുള്ള ചികിത്സാ കേന്ദ്രങ്ങളെയാണ്​ ഈ അവസരത്തിൽ ആശ്രയിക്കേണ്ടത്​.

(ലേഖകൻ കോഴിക്കോട്​ ആസ്​റ്റർ മിംസ്​ ഹോസ്​പിറ്റലിലെ ശിശുരോഗ വിഭാഗം സീനിയർ കൺസൾട്ടൻറാണ്​)