കോവിഡ് രണ്ടാം തരംഗത്തില്‍ മരിച്ചത് 646 ഡോക്ടര്‍മാര്‍

ന്യൂഡല്‍ഹി: കോവിഡ് മാഹാമാരിയുടെ രണ്ടാംതരംഗത്തില്‍ 646 ഡോക്ടര്‍മാര്‍ക്ക് ജീവന്‍ നഷ്ടമായതായി ഇന്ത്യന്‍ മെഡിക്കല്‍ അസോസിയേഷന്‍ (ഐ.എം.എ.). ജൂണ്‍ 5 വരെയുള്ള കണക്കാണിതെന്നും ഐ.എം.എ അറിയിച്ചു.

ഡല്‍ഹിയിലാണ് ഏറ്റവും കൂടുതല്‍ ഡോക്ടര്‍മാര്‍ കോവിഡ് ബാധിച്ച് മരിച്ചത്, 109 പേര്‍. ബിഹാര്‍ - 97, ഉത്തര്‍ പ്രദേശ് - 79, രാജസ്ഥാന്‍ - 43, ഝാര്‍ഖണ്ഡ് - 39, ഗുജറാത്ത് - 37, ആന്ധ്രാ പ്രദേശ് - 35, തെലങ്കാന - 34, പശ്ചിമബംഗാള്‍ -30 എന്നിങ്ങനെയാണ് വിവിധ സംസ്ഥാനങ്ങളില്‍ മരിച്ച ഡോക്ടര്‍മാരുടെ എണ്ണം.

കോവിഡിന്റെ ആദ്യ തരംഗത്തില്‍ രാജ്യത്ത് 748 ഡോക്ടര്‍മാര്‍ക്ക് ജീവന്‍ നഷ്ടമായിരുന്നെന്നും ഐ.എം.എ പറയുന്നു.

കഴിഞ്ഞ ദിവസം രാജ്യത്ത് 1,20,529 പേര്‍ക്കാണ് കോവിഡ് ബാധിച്ചത്. 24 മണിക്കൂറിനിടെ 3,380 കോവിഡ് മരണങ്ങളും റിപ്പോര്‍ട്ട് ചെയ്തു.