കോവിഡ്​ ബാധിതന്‍റെ മൃതദേഹം മെഡിക്കൽ പഠനത്തിന്​ നൽകി

കൊൽക്കത്ത: കോവിഡ്​ ബാധിച്ച്​ മരിച്ച 89കാരൻ മൃതദേഹം മെഡിക്കൽ പഠനത്തിന്​ വിട്ടുനൽകാൻ മരണത്തിന് മുമ്പ് സമ്മതപത്രം ഒപ്പിട്ടുനൽകി. അർബുദ രോഗിയായ നിർമൽ ദാസ്​ എന്നയാളാണ് ത​െന്‍റ​ മൃതദേഹം ഗവേഷണ പഠനങ്ങൾക്കായി മെഡിക്കൽ കോളജിന്​ ദാനംചെയ്യാൻ അനുമതി നൽകിയത്​. ഒരുപക്ഷേ, രാജ്യത്ത് ആദ്യമായിട്ടായിരിക്കാം ഇത്തരമൊരു സംഭവമെന്ന്​ മെഡിക്കൽ കോളജ്​ വൃത്തങ്ങൾ പറഞ്ഞു.

കൊൽക്കത്ത ന്യൂ ടൗൺ പ്രദേശവാസിയായ നിർമൽ ദാസ് കഴിഞ്ഞ ദിവസമാണ്​ മരിച്ചത്​. മൃതദേഹം ശനിയാഴ്ച ആർജി കാർ മെഡിക്കൽ കോളജിലെ ഫോറൻസിക് വിഭാഗത്തിന് കൈമാറുമെന്ന്​ ഉദ്യോഗസ്​ഥർ അറിയിച്ചു.

അതിനിടെ, വെള്ളിയാഴ്ച 3805 പുതിയ കോവിഡ്​ കേസുകൾ കൂടി റിപ്പോർട്ട്​ ചെയ്​തതോടെ പശ്​ചിമ ബംഗാളിൽ രോഗബാധിതരുടെ എണ്ണം 19,86,667 ആയി ഉയർന്നതായി ആരോഗ്യ വകുപ്പ് അറിയിച്ചു. കൊൽക്കത്തയിലാണ്​ ഏറ്റവും കൂടുതൽ പുതിയ കേസുകൾ -481. തൊട്ടുപിന്നാലെ 24 നോർത്ത് പർഗാനാസ് ജില്ലയിൽ 438 പുതിയ കേസുകൾ റിപ്പോർട്ട് ചെയ്തു. സംസ്ഥാനത്ത് 34 മരണങ്ങളാണ്​ ഇന്നലെ റിപ്പോർട്ട് ചെയ്തത്​. ഇതോടെ മരണസംഖ്യ 20,515 ആയി ഉയർന്നു. 24 നോർത്ത് പർഗാനാസ് ജില്ലയിൽ ഒമ്പതും കൊൽക്കത്തയിൽ എട്ടും കൊവിഡ് മരണങ്ങൾ റിപ്പോർട്ട് ചെയ്തു.