കോവിഡ്​: ആശുപത്രി മാലിന്യങ്ങൾ ആരോഗ്യത്തിനും പ്രകൃതിക്കും ഭീഷണിയാകുന്നുവെന്ന്​ ലോകാരോഗ്യ സംഘടന

ജനീവ: കോവിഡ്​ പ്രതിരോധത്തിനായി ഉപയോഗിച്ചശേഷം വലിച്ചെറിയുന്ന വസ്തുക്കൾ പ്രകൃതിക്കും ആരോഗ്യത്തിനും ഭീഷണിയാകുന്നതായി ലോകാരോഗ്യ സംഘടന. സിറിഞ്ചുകൾ, ഉ​പയോഗിച്ച ടെസ്റ്റ്​ കിറ്റുകൾ, വാക്സിൻ കുപ്പികൾ എന്നിവ പതിനായിരക്കണക്കിന്​ ടൺ മെഡിക്കൽ മാലിന്യം സൃഷ്ടിച്ചിരിക്കുകയാണെന്ന്​ ചൊവ്വാഴ്ച പുറത്തിറക്കിയ റിപ്പോർട്ടിൽ പറയുന്നു.

ഈ മാലിന്യങ്ങളിൽ കൊറോണ വൈറസിന്​ അതിജീവിക്കാൻ സാധിക്കുമെന്നതിനാൽ അത്​ പകർച്ചവ്യാധിക്ക്​ കാരണമാകാം. കൂടാതെ ആരോഗ്യപ്രവർത്തകർക്ക്​ പൊ​ള്ളലേൽക്കൽ, മുറിവേൽക്കുക, മറ്റു രോഗങ്ങൾ ഉണ്ടാവുക എന്നിവക്കും​ സാധ്യതുണ്ട്​.

മാലിന്യം കത്തിക്കുന്നത്​ വഴി അന്തരീക്ഷവും മലിനീകരിക്കപ്പെടുന്നു. ഇത്​ ആ​ പ്രദേശത്തുള്ള ജന്തുജാലങ്ങളെ മോശമായി ബാധിക്കും. കൂടാതെ വെള്ളത്തിന്‍റെ ഗുണമേന്മ നഷ്ടപ്പെടുത്തുന്നു. അസുഖങ്ങൾ പരത്തുന്ന കീടാണുക്കൾ ഉണ്ടാകാനും സാധ്യതയുണ്ട്​.

പ്രതിരോധ വസ്തുക്കൾ നിർമിക്കുമ്പോൾ പ്ലാസ്റ്റിക്കിന്‍റെ ഉപയോഗം കുറക്കാൻ റിപ്പോർട്ട്​ ആവശ്യപ്പെടുന്നു. പി.പി.ഇ കിറ്റ്​ പുനരുപയോഗിക്കാവുന്ന ഉൽപ്പന്നങ്ങൾ കൊണ്ട്​ നിർമിക്കണം.

2021 നവംബർ വരെ ഏകദേശം 87,000 ടൺ അഥവാ നൂറുകണക്കിന്​ നീലത്തിമിംഗലങ്ങൾക്ക്​ സമാനമായ പി.പി.ഇ കിറ്റുകൾ യു.എൻ പോർട്ടൽ​ വഴി മാ​ത്രം ഓർഡർ ചെയ്തിട്ടുണ്ട്​. അവയിൽ മിക്കതും ഇപ്പോൾ മാലിന്യമായി മാറി.

2,600 ടൺ പ്ലാസ്റ്റിക് മാലിന്യവും രാസമാലിന്യങ്ങളും സൃഷ്ടിക്കുന്ന 140 ദശലക്ഷം കോവിഡ്​ ടെസ്റ്റ്​ കിറ്റുകളാണ്​ ഉപയോഗിച്ചിട്ടുള്ളത്​. കൂടാതെ, ആഗോളതലത്തിൽ നൽകപ്പെടുന്ന ഏകദേശം എട്ട്​ ബില്യൺ വാക്സിൻ ഡോസ്​ ഗ്ലാസ് കുപ്പികൾ, സിറിഞ്ചുകൾ, സൂചികൾ, സുരക്ഷാ ബോക്സുകൾ എന്നിവയുടെ രൂപത്തിൽ 144,000 ടൺ അധിക മാലിന്യങ്ങൾ ഉൽപ്പാദിപ്പിച്ചതായി കണക്കാക്കുന്നു.

ലോകാരോഗ്യ സംഘടനയുടെ റിപ്പോർട്ടിൽ ഇന്ത്യയിലെ ഗ്രാമീണ മേഖലയിലെ ഔദ്യോഗിക മാലിന്യ സംസ്കരണ സംവിധനങ്ങളുടെ അഭാവത്തെക്കുറിച്ച്​ സൂചിപ്പിക്കുന്നുണ്ട്​. മഹാമാരിക്ക്​ മുമ്പ്​ തന്നെ വിവിധ മെഡിക്കൽ മാലിന്യങ്ങളുടെ മൂന്നിലൊന്ന്​ നിർമാർജനം ചെയ്യാൻ സാധിച്ചിരുന്നില്ല. ദരിദ്ര രാജ്യങ്ങളിൽ ഇത് 60 ശതമാനം വരെയായിരുന്നു.