ഇന്ത്യയിൽ ഒമിക്രോൺ ബാധിതർ 145 ആയി

ന്യൂഡൽഹി/മു​ംബൈ: യു.കെയിൽ നിന്ന്​ ഗുജറാത്തിലെത്തിയ 45 വയസുകാരനും ആൺകുട്ടിക്കും ഒമിക്രോൺ സ്​ഥിരീകരിച്ചതോടെ ഇന്ത്യയിൽ മൊത്തം ഒമിക്രോൺ ബാധിതരുടെ എണ്ണം 145 ആയി. ഞായറാഴ്ചത്തെ കണക്കാണിത്​.

മഹാരാഷ്​ട്രയിലാണ്​ ഏറ്റവുമധികം കേസുകൾ-48. കേരളത്തിൽ 11പേർക്കാണ്​ രോഗബാധ. തെലങ്കാനയിൽ ഒമിക്രോൺ എട്ടിൽ നിന്ന്​ 20 ആയി ഉയർന്നു.

ആന്ധ്ര, ഛത്തീസ്​ഗഡ്​, തമിഴ്​നാട്​, പശ്ചിമ ബംഗാൾ എന്നിവിടങ്ങളിൽ ഓരോ കേസുകളാണ്​ റിപ്പോർട്ട്​ ചെയ്​തത്​.

ഇന്ത്യയിൽ ഒമിക്രോൺ വ്യാപനം രൂക്ഷമാവാൻ സാധ്യതയുണ്ടെന്നാണ് കേന്ദ്രം മുന്നറിയിപ്പ് നൽകുന്നത്. രാജ്യത്ത് പ്രതിദിനം രോ​ഗബാധിതരുടെ എണ്ണം 14 ലക്ഷം വരെ ഉയരാൻ സാധ്യതയുണ്ടെന്ന് കോവിഡ് ടാസ്‌ക് ഫോഴ്സ് മേധാവി മുന്നറിയിപ്പ് നൽകുന്നത്. അനാവശ്യ യാത്രകൾ, തിരക്ക്, പുതുവത്സര ആഘോഷങ്ങൾ എന്നിവയിൽ ജാഗ്രത പാലിക്കണമെന്നും കോവിഡ് ടാസ്‌ക് ഫോഴ്സ് മേധാവി വി.കെ പോൾ പറഞ്ഞു.

ഈ രീതിയിൽ കടന്നുപോകുകയാണെങ്കിൽ ഒമിക്രോൺ ഡെൽറ്റയെ മറികടക്കുമെന്നാണ് വിദഗ്ധർ പറയുന്നത്. ഡെൽറ്റ വ്യാപനം കുറവായിരുന്ന ദക്ഷിണാഫ്രിക്കയിൽ അതിനേക്കാൾ വേഗതയിലാണ് ഒമിക്രോണിന്‍റെ വ്യാപനമുള്ളതെന്നാണ് ലോകാരോഗ്യ സംഘടന വ്യക്തമാക്കുന്നത്.