ചൂടുകൂടുന്നു; കരുതലും കൂടട്ടെ...ജാഗ്രത നിര്ദേശവുമായി ആരോഗ്യവകുപ്പ്
text_fieldsതിരുവനന്തപുരം: കാലാവസ്ഥ വ്യതിയാനം കാരണം അന്തരീക്ഷ ഊഷ്മാവ് ക്രമാതീതമായി ഉയരുന്ന സാഹചര്യത്തില് എല്ലാ ജില്ലകള്ക്കും ആരോഗ്യ വകുപ്പിന്റെ ജാഗ്രത നിര്ദേശം. സൂര്യാതപവുമായി ബന്ധപ്പെട്ട ആരോഗ്യ പ്രശ്നങ്ങള് യഥാസമയം കണ്ടെത്തി ശരിയായ ചികിത്സ ഉറപ്പുവരുത്തുന്നതിനായി എല്ലാ പി.എച്ച്.സി., സി.എച്ച്.സി മെഡിക്കല് ഓഫിസര്മാര്ക്കും താലൂക്ക്, ജില്ല, ജനറല് ആശുപത്രി, മെഡിക്കല് കോളജ് ആശുപത്രി സൂപ്രണ്ടുമാര്ക്കും നിര്ദേശമുണ്ട്.
സൂര്യാതപം
അന്തരീക്ഷ താപം ഒരു പരിധിക്കപ്പുറം ഉയര്ന്നാല് മനുഷ്യശരീരത്തിലെ താപ നിയന്ത്രണ സംവിധാനങ്ങള് തകരാറിലാകുകയും ശരീരത്തിലുണ്ടാകുന്ന താപം പുറന്തള്ളുന്നതിന് തടസ്സം നേരിടുകയും ചെയ്യും. ഇത് ശാരീരിക പ്രവർത്തനങ്ങളെ അവതാളത്തിലാക്കുന്ന അവസ്ഥയാണ് സൂര്യാതപം.
ലക്ഷണങ്ങള്
വളരെ ഉയര്ന്ന ശരീരതാപം, വറ്റിവരണ്ട ചുവന്ന ചൂടായ ശരീരം, ശക്തമായ തലവേദന, തലകറക്കം, മന്ദഗതിയിലുള്ള നാഡിമിടിപ്പ്, മാനസികാവസ്ഥയിലുള്ള മാറ്റങ്ങള് തുടങ്ങിയവയും ഇതിനെ തുടര്ന്നുള്ള അബോധാവസ്ഥയും സൂര്യാതപം മൂലമുണ്ടായേക്കാം. ഉടന് ഡോക്ടറുടെ സേവനം ലഭ്യമാക്കണം.
താപ ശരീരശോഷണം
സൂര്യാതപത്തെക്കാള് കുറച്ചുകൂടി കാഠിന്യം കുറഞ്ഞ അവസ്ഥയാണ് താപശരീര ശോഷണം. കനത്ത ചൂടിനെ തുടര്ന്ന് ശരീരത്തില്നിന്ന് ധാരാളം ജലവും ലവണങ്ങളും വിയര്പ്പിലൂടെ നഷ്ടപ്പെടുന്നതിനെ തുടര്ന്നുണ്ടാകുന്ന അവസ്ഥയാണിത്.
ലക്ഷണങ്ങള്
ക്ഷീണം, തലകറക്കം, തലവേദന, പേശിവലിവ്, ഓക്കാനവും ഛര്ദിയും, അസാധാരണമായ വിയര്പ്പ്, കഠിനമായ ദാഹം, മൂത്രത്തിന്റെ അളവ് തീരെ കുറയുകയും കടും മഞ്ഞ നിറമാകുകയും ചെയ്യുക, ബോധക്ഷയം എന്നിവയാണ് സൂര്യാതപത്തിന്റെ ലക്ഷണങ്ങള്. ശരിയായ രീതിയില് ചികിത്സിച്ചില്ലെങ്കില് താപശരീര ശോഷണം സൂര്യാതപത്തിന്റെ അവസ്ഥയിലേക്ക് മാറിയേക്കാം.
ചെയ്യേണ്ട കാര്യങ്ങള്
സൂര്യാതപമേറ്റതായി സംശയം തോന്നിയാല് വെയിലുള്ള സ്ഥലത്തുനിന്ന് തണുത്ത സ്ഥലത്തേക്ക് മാറി വിശ്രമിക്കണം. ധരിച്ചിരിക്കുന്ന കട്ടി കൂടിയ വസ്ത്രങ്ങള് നീക്കം ചെയ്യണം. തണുത്ത വെള്ളം കൊണ്ട് ശരീരം തുടക്കണം. ഫാന്, എ.സി എന്നിവയുടെ സഹായത്താല് ശരീരം തണുപ്പിക്കണം. ധാരാളം വെള്ളം കുടിക്കാന് നല്കണം. ആരോഗ്യ സ്ഥിതി മെച്ചപ്പെടുന്നില്ലെങ്കിലോ, ബോധക്ഷയമുണ്ടാകുകയോ ചെയ്താല് അടുത്തുള്ള ആശുപത്രിയിലെത്തിച്ച് ചികിത്സ ഉറപ്പുവരുത്തുക.
പ്രത്യേക ശ്രദ്ധ വേണ്ടവര്
പ്രായമായവര്, ചെറിയ കുട്ടികള്, ഗര്ഭിണികള്, ഗുരുതര രോഗമുള്ളവര്, വെയിലത്ത് ജോലി ചെയ്യുന്നവര് എന്നിവര് പ്രത്യേകം ശ്രദ്ധിക്കണം.
പ്രതിരോധ മാര്ഗങ്ങള്
വേനല്ക്കാലത്ത് പ്രത്യേകിച്ച്, ചൂടിന് കാഠിന്യം കൂടുമ്പോള് ദാഹം തോന്നിയില്ലെങ്കില് പോലും ധാരാളം വെള്ളം കുടിക്കണം. വെയിലത്ത് ജോലി ചെയ്യേണ്ടിവരുന്ന അവസരങ്ങളില് ഉച്ചക്ക് 12 മുതല് മൂന്നു വരെയുള്ള സമയം വിശ്രമവേളയായി പരിഗണിച്ച് ജോലി സമയം ക്രമീകരിക്കണം. കട്ടി കുറഞ്ഞതും വെളുത്തതോ, ഇളം നിറത്തിലുള്ളതോ ആയ അയഞ്ഞ വസ്ത്രങ്ങള് ധരിക്കുക. വെയിലത്ത് പാര്ക്ക് ചെയ്യുന്ന കാറിലും മറ്റും കുട്ടികളെ ഇരുത്തിയിട്ട് പോകരുത്.
മറ്റ് ചില പ്രശ്നങ്ങള്
കൂടുതല് സമയം വെയിലത്ത് ജോലി ചെയ്യുന്നവരില് നേരിട്ട് വെയില് ഏല്ക്കുന്ന ശരീരഭാഗങ്ങള് സൂര്യാതപമേറ്റ് ചുവന്നു തടിക്കുകയും വേദനയും പൊള്ളലുമുണ്ടാകുകയും ചെയ്യാം. ഇവര് ഉടനടി ചികിത്സ തേടണം. ചൂടുകാലത്ത് കൂടുതലായുണ്ടാകുന്ന വിയര്പ്പിനെ തുടര്ന്ന് ശരീരം ചൊറിഞ്ഞ് തിണര്ക്കുന്ന 'ഹീറ്റ് റാഷ്' എന്ന അവസ്ഥയുണ്ടാകാം. കുട്ടികളെയാണ് ഇത് കൂടുതല് ബാധിക്കുന്നത്. ഇങ്ങനെയുള്ളവര് അധികം വെയില് ഏല്ക്കാതിരിക്കുകയും തിണര്പ്പ് ബാധിച്ച ശരീരഭാഗങ്ങള് എപ്പോഴും ഈര്പ്പരഹിതമായി സൂക്ഷിക്കണം.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.