പഴയ പേടിയില്ല; കോവിഡ്​ സാമഗ്രികൾക്കും ആവശ്യക്കാർ കുറഞ്ഞു

തൊടുപുഴ: നിയന്ത്രണങ്ങൾ നീങ്ങി ജനജീവിതം സാധാരണ നിലയിലേക്ക് മാറിത്തുടങ്ങിയതോടെ കോവിഡിനെ പഴയതുപോലെ പേടിക്കേണ്ടെന്ന മനോഭാവത്തിലേക്ക്​ ആളുകളും. പുറത്തിറങ്ങാൻ മാസ്​ക്​ നിർബന്ധമായതിനാൽ അതിലൊതുങ്ങുന്ന ജാഗ്രതയാണ്​ ഇപ്പോൾ കോവിഡിനെതിരെ പ്രധാനമായുള്ളത്​. മറ്റ്​ കോവിഡ്​ സാമഗ്രികളുടെയെല്ലാം വിൽപന ഗണ്യമായി കുറഞ്ഞു. എന്നാൽ, ജാഗ്രത കൈവിടാറായിട്ടില്ലെന്ന മുന്നറിയിപ്പാണ്​ ആരോഗ്യവകുപ്പ്​ നൽകുന്നത്​.

കോവിഡ്​ ശക്തിപ്പെടുകയും ഇതര സാംക്രമിക രോഗങ്ങൾ കുറയുകയും ചെയ്​തതോടെ ഒന്നര വർഷത്തിലധികമായി മരുന്ന്​ വിപണിയിൽ ഏറ്റവുമധികം വിറ്റുപോയത്​ കോവിഡ്​ അനുബന്ധ സാമഗ്രികളാണ്​.

മാസ്​ക്​, സാനിറ്റൈസർ, ഗ്ലൗസ്​, പി.പി.ഇ കിറ്റ്​, വൈറ്റമിൻ ഗുളികകൾ, പൾസ് ​ഒാക്​സി മീറ്റർ എന്നിവയുടെ വിൽപനയും വിലയും കുതിച്ചുയർന്നിരുന്നു. കഴിഞ്ഞ ഏപ്രിൽ, ​േമയ്​ മാസങ്ങളെ അപേക്ഷിച്ച്​ ഇപ്പോൾ ഇവയുടെ വിൽപന 40 ശതമാനത്തിൽ താഴെയാണ്​. മുമ്പ്​ ഒരു മെഡിക്കൽ സ്​റ്റോറിൽ ഒരു ദിവസത്തെ വിൽപനയുടെ 20 ശതമാനം സാനിറ്റൈസർ ആയിരുന്നെങ്കിൽ ഇപ്പോഴത്​ അഞ്ച്​ ശതമാനമായി കുറഞ്ഞു. ഗ്ലൗസ്​, പി.പി.ഇ കിറ്റ്​ എന്നിവയുടെ ആവശ്യക്കാർ ആശുപത്രികൾ മാത്രമായി. മാസ്​ക്​ ഇപ്പോഴും നിർബന്ധമാണെങ്കിലും പഴയ വിൽപനയില്ലെന്ന്​ വ്യാപാരികൾ പറയുന്നു.

വിൽപന ഇടിഞ്ഞതോടെ പല കോവിഡ്​ സാമഗ്രികൾക്കും വിലയും കുറഞ്ഞു. 1500 രൂപക്ക്​ വിറ്റിരുന്ന പൾസ് ​ഒാക്​സി മീറ്റർ ഇപ്പോൾ 600^700 രൂപക്ക്​ കിട്ടും. 200 രൂപയിലധികം വാങ്ങി വിറ്റിരുന്ന 100 മില്ലി ലിറ്റർ സാനിറ്റൈസറിന്​ ജി.എസ്​.ടി ഉൾപ്പെടെ 50 രൂപയായി. വൈറ്റമിൻ സി, മൾട്ടി വൈറ്റമിൻ ഗുളികകൾക്കും ഏതാനും മാസം മുമ്പുവരെ ആവശ്യക്കാർ ഏറെയായിരുന്നു. അതേസമയം, മാസ്​ക്​​ ശീലമായി തുടരുന്നതിനാൽ കോവിഡ്​ ഒഴികെ സാംക്രമിക രോഗങ്ങളുടെ വ്യാപനവും ഇതുമായി ബന്ധപ്പെട്ട മരുന്നുകളുടെ വിൽപനയും ഇപ്പോഴും വളരെ കുറവാ​ണെന്ന്​ ഒാൾ കേരള കെമിസ്​റ്റ്​സ്​ ആൻഡ്​ ​ഡ്രഗ്​സ്​ അസോസിയേഷൻ സംസ്ഥാന ഭാരവാഹി പി.വി. ടോമി പറഞ്ഞു. കോവിഡ്​ ജാഗ്രത കുറഞ്ഞതോടെ ആദ്യ ഡോസ്​ വാക്​സിൻ എടുക്കാൻ കാണിച്ച ഉത്സാഹം രണ്ടാം ഡോസി​െൻറ കാര്യത്തിൽ ഇല്ലെന്നും അതിനാൽ രണ്ടാം ഘട്ടം മന്ദഗതിയിലാ​ണ്​ നീങ്ങുന്നതെന്നും​ ആരോഗ്യവകുപ്പ്​ അധികൃതരും പറയുന്നു.