പട്ടിയുടെ കടിയേറ്റാൽ ആദ്യം എന്താണ് ചെയ്യേണ്ടത്? ചികിത്സ എങ്ങനെ?

കേരളത്തിൽ മുമ്പില്ലാത്തവിധം തെരുവുനായ് ശല്യം രൂക്ഷമാവുകയാണ്. ദിവസവും നിരവധി പേർക്കാണ് തെരുവുനായ്ക്കളുടെ കടിയേൽക്കുന്നത്. പേവിഷബാധക്കെതിരായ വാക്സിൻ എടുത്തിട്ട് പോലും ആളുകൾ മരിക്കുന്നതായ സംഭവങ്ങൾ ജനങ്ങളുടെ ഭീതി വർധിപ്പിക്കുന്നുണ്ട്. ഈയൊരു സാഹചര്യത്തിൽ പേവിഷബാധക്കെതിരെ എന്തു മുൻകരുതലെടുക്കണം, പട്ടിയുടെ കടിയേറ്റാൽ എന്ത് ചെയ്യണം എന്ന് വ്യക്തമാക്കുകയാണ് ആരോഗ്യമന്ത്രി വീണ ജോർജ്.

പട്ടിയുടെ കടിയേറ്റാൽ മുറിവ് എത്ര ചെറുതാണെങ്കിലും നിസാരമായി കാണരുത്. എത്രയും വേഗം ആശുപത്രിയിലെത്തി ഡോക്ടർമാർ നിർദേശിക്കുന്ന ചികിത്സ തേടണം.

ശ്രദ്ധിക്കേണ്ട കാര്യങ്ങള്‍

• മൃഗങ്ങള്‍ കടിച്ചാല്‍ എത്ര ചെറിയ മുറിവാണെങ്കിലും അവഗണിക്കരുത്
• പ്രഥമ ശുശ്രൂഷയ്ക്കും വാക്‌സിനേഷനും അതീവ പ്രധാന്യം
• കടിയേറ്റ ഭാഗം എത്രയും വേഗം സോപ്പും വെള്ളവുമുപയോഗിച്ച് 15 മിനിറ്റോളം നന്നായി കഴുകുക
• എത്രയും വേഗം ആശുപത്രിയിലെത്തിച്ച് വാക്‌സിനെടുക്കുക
• മുറിവിന്റെ തീവ്രതയനുസരിച്ച് ആന്റി റാബിസ് വാക്‌സിനും (ഐ.ഡി.ആര്‍.വി.) ഇമ്മ്യൂണോഗ്ലോബുലിനുമാണ് എടുക്കുന്നത്.

• കൃത്യമായ ഇടവേളയില്‍ വാക്‌സിന്‍ എടുത്തെന്ന് ഉറപ്പ് വരുത്തണം
  
• കടിയേറ്റ ദിവസവും തുടര്‍ന്ന് 3, 7, 28 എന്നീ ദിവസങ്ങളിലും വാക്‌സിന്‍ എടുക്കണം
• വാക്‌സിനെടുത്ത് കഴിഞ്ഞും രോഗലക്ഷണങ്ങള്‍ കണ്ടാല്‍ ഉടനെ ചികിത്സ തേടുക
• വീടുകളില്‍ വളര്‍ത്തുന്ന നായകള്‍ക്ക് വാക്‌സിനേഷന്‍ ഉറപ്പ് വരുത്തുക
• മത്സ്യം, മാംസം തുടങ്ങിയ ആഹാരാവശിഷ്ടങ്ങള്‍ പൊതു സ്ഥലങ്ങളില്‍ വലിച്ചെറിയരുത്
• പേവിഷബാധയ്ക്ക് നിലവിലുള്ള ഏറ്റവും വലിയ പ്രതിരോധമാണ് പ്രഥമ ശുശ്രൂഷയും വാക്‌സിനേഷനും. അതിനാല്‍ അവഗണിക്കരുത്.