![2021 Force Gurkha launch today: Price expectation of Mahindra Thar rival 2021 Force Gurkha launch today: Price expectation of Mahindra Thar rival](https://www.madhyamam.com/h-upload/2021/09/27/1204970-gurkhafront.webp)
ഗൂർഖ നിരത്തിൽ, വിലയും പ്രഖ്യാപിച്ച് ഫോഴ്സ്; ഥാറിനൊപ്പം ബലാബലം പിടിച്ച് പാവങ്ങളുടെ 'കാവൽക്കാരൻ'
text_fieldsപട്ടണത്തിൽ പോയി കരാേട്ട പഠിച്ച പരിഷകാരിയെപ്പോലെയാണ് മഹീന്ദ്ര ഥാർ എങ്കിൽ, നാടൻ തല്ലും കളരിയുമായി നടക്കുന്ന ലോക്കൽ ചട്ടമ്പിയാണ് ഫോഴ്സ് ഗൂർഖ. കരാേട്ടക്കാരൻ നാട്ടിലെത്തിയപ്പോൾ അവനൊപ്പം പിടിക്കാൻ രൂപവും ഭാവവുമൊക്കെ ഒന്ന് മെനയാക്കേണ്ടിവന്നിരിക്കുകയാണ് നമ്മുടെ കളരിയാശാന്. ഥാറിെൻറ എതിരാളി എന്ന് പറഞ്ഞുപറഞ്ഞ് വലുതായ പേരാണ് ഗൂർഖ.
ഇതിലെ രസമുള്ള ട്വിസ്റ്റ് എന്താന്നുവച്ചാൽ അമേരിക്കക്കാരൻ ജീപ്പ് പറയുന്നത് ഇൗ ഥാർ ഞങ്ങളുടെ റാംഗ്ലർ റൂബിക്കോണിനെ കോപ്പിയടിച്ച് നിർമിച്ചതെന്നാണ്. അതായത് പ്രശസ്തരിൽ പ്രശസ്തനായ ഥാറിെൻറ അസ്ഥിത്വം തന്നെ സംശയാസ്പദമാണെന്നർഥം. എന്നാൽ അത്തരം ആരോപണങ്ങളിൽനിന്നൊക്കെ മുക്തനാണ് ഗൂർഖ. ഇത്രയും പറഞ്ഞത് ഫോഴ്സ് മോട്ടോഴ്സ് തങ്ങളുടെ പുതുപുത്തൻ ഒാഫ്റോഡർ, ഗൂർഖക്ക് വിലപ്രഖ്യാപിച്ചു എന്ന് വിവരം പങ്കുവയ്ക്കാനാണ്. ഒറ്റ വകഭേദമാണ് വാഹനത്തിനുള്ളത്. അതിന് 13.59 ലക്ഷം രൂപയാണ് ഫോഴ്സ് വിലയിട്ടിരിക്കുന്നത്.
മഹീന്ദ്ര ഥാറിെൻറ അടിസ്ഥാന വേരിയൻറായ എ.എക്സ് നാല് സീറ്റർ കൺവേർട്ടിബിൾ പെട്രോൾ മാനുവൽ വേരിയൻറിന് 12.78 ലക്ഷം (എക്സ്-ഷോറൂം) വിലയാണ് വരുന്നത്. എന്നാൽ ഫോഴ്സുമായി നേരിട്ട് മത്സരിക്കുന്ന ഥാറിെൻറ ഡീസൽ മോഡലിന് 13.68 ലക്ഷമാണ് വില. അങ്ങിനെനോക്കിയാൽ നേരിട്ടുള്ള ഏറ്റുമുട്ടലിൽ ഏറെക്കുറെ സമാനമാണ് കാര്യങ്ങൾ. ഗൂർഖയുടെ ബുക്കിങ് ഇതിനകം ആരംഭിച്ചിട്ടുണ്ട്. 25,000 രൂപ നൽകി ബുക്ക് ചെയ്യാം. അടുത്ത മാസം ഡെലിവറികൾ ആരംഭിക്കാനും സാധ്യതയുണ്ട്. രണ്ടാം നിരയിലെ ക്യാപ്റ്റൻ സീറ്റുകൾ, ലോക്കിങ് ഡിഫറൻഷ്യലുകളുള്ള ഫോർ-വീൽ ഡ്രൈവ് തുടങ്ങിയ പ്രത്യേകതകൾ പുതിയ എസ്.യു.വിക്കുണ്ട്.
ഡിസൈനും സവിശേഷതകളും
ഗൂർഖയുടെ ഡിസൈൻ പഴയ മോഡലിന് ഏതാണ്ട് സമാനമാണ്. എന്നാൽ വാഹനത്തിെൻറ മുഴുവൻ ബോഡി ഷെല്ലും മാറിയിട്ടുണ്ട്. പുതിയ ഗ്രിൽ, ബമ്പറുകൾ, ലൈറ്റ് ക്ലസ്റ്ററുകൾ, പിൻ യാത്രക്കാർക്കുള്ള വലിയ വിൻഡോ എന്നിവ മാറ്റങ്ങളിൽ ഉൾപ്പെടുന്നു. പനോരമിക് വിൻഡോ എന്ന് കമ്പനി വിളിക്കുന്ന വലിയ ഗ്ലാസ് ഏരിയ പിന്നിലെ ദൃശ്യപരതയെ സഹായിക്കുന്നുണ്ട്. പുതിയ ഡാഷ്ബോർഡ്, ടച്ച്സ്ക്രീൻ ഇൻഫോടെയ്ൻമെൻറ് സിസ്റ്റം, മുൻവശത്തുള്ള രണ്ടാം നിര ക്യാപ്റ്റൻ സീറ്റുകൾ എന്നിവയാണ് ശ്രദ്ധേയമായ കാബിൻ മാറ്റങ്ങൾ.
നേരത്തേ ഉണ്ടായിരുന്ന ഡ്യുവൽ-ടോൺ ക്യാബിനിൽ നിന്ന് സിംഗിൾ ടോൺ ഡാർക് ഗ്രേയിലേക്ക് മാറിയിട്ടുണ്ട്. ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവ ടച്ച് സ്ക്രീനിൽ നൽകിയിട്ടുണ്ട്. ബ്ലൂടൂത് വഴി ഫോൺ കോളുകൾ എടുക്കാനുമാകും. ടിൽറ്റ്, ടെലിസ്കോപിക് അഡ്ജസ്റ്റ്മെൻറുള്ള സ്റ്റിയറിങ്, പിൻ സീറ്റുകൾക്കുള്ള വ്യക്തിഗത ആം റെസ്റ്റുകൾ, നാല് യാത്രക്കാർക്കും യുഎസ്ബി ചാർജിങ് സോക്കറ്റുകൾ, പവർ വിൻഡോകൾ, സെൻട്രൽ ലോക്കിങ്, എയർ കണ്ടീഷനിങ്, ഡിആർഎല്ലുകളുള്ള എൽഇഡി ഹെഡ് ലാമ്പുകൾ, ഫോഗ് ലാമ്പുകൾ, കോർണർ ലാമ്പുകൾ എന്നിവയാണ് മറ്റ് സവിശേഷതകൾ.
എഞ്ചിനും സുരക്ഷയും
ബിഎസ് ആറ് നിയന്ത്രണങ്ങൾ പാലിക്കുന്നതിന് കമ്പനി പഴയ 2.6 ലിറ്റർ ഡീസൽ എഞ്ചിൻ നവീകരിച്ചു. ഈ യൂനിറ്റ് 91hp ഉം 250Nm ടോർക്കും പുറപ്പെടുവിക്കും. അഞ്ച് സ്പീഡ് മാനുവൽ ഗിയർബോക്സുമായി ജോടിയാക്കിയിരിക്കുന്നു. പഴയ ഗൂർഖ എക്സ്ട്രീമിന്റെ 140 എച്ച്പി 2.2 ലിറ്റർ ഡീസൽ എഞ്ചിൻ ഉപേക്ഷിച്ചിട്ടുണ്ട്. സ്വതന്ത്ര ഡബിൾ വിഷ്ബോണുകളും മുൻവശത്ത് മൾട്ടിലിങ്ക് സെറ്റപ്പും ഉള്ള സസ്പെൻഷൻ സെറ്റപ്പും മാറ്റമില്ലാതെ തുടരുന്നു.
ഫോർവീൽ സിസ്റ്റമുള്ള ഗൂർഖയ്ക്ക് 35 ഡിഗ്രി വരെ ഗ്രേഡുള്ള ചരിവുകളിൽ നാവിഗേറ്റ് ചെയ്യാനാകുമെന്ന് ഫോഴ്സ് അവകാശപ്പെടുന്നു.സുരക്ഷക്കായി മുന്നിലെ ഇരട്ട എയർബാഗുകൾ, എബിഎസ്, റിയർ പാർക്കിങ് സെൻസറുകൾ, ഐസോഫിക്സ് ചൈൽഡ് സീറ്റ് ആങ്കറുകൾ, ടയർ പ്രഷർ മോണിറ്ററിങ് സിസ്റ്റം എന്നിവയും നൽകിയിട്ടുണ്ട്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.