ചിലർ വഴിയേ സഞ്ചരിക്കും, മറ്റുചിലർ വഴിയില്ലെങ്കിലും സഞ്ചരിക്കും; നിസാൻ പാത്ത്​ഫൈൻഡറാണെങ്കിൽ സ്വന്തം വഴിവെട്ടി സഞ്ചരിക്കും

നിസാ​െൻറ ​െഎകോണിക്​ എസ്​.യു.വി പാത്ത്​ഫൈൻഡറി​െൻറ ഏറ്റവും പുതിയ മോഡൽ വിപണിയിൽ. 2022 മോഡൽ പാത്ത്ഫൈൻഡറാണ്​ പുറത്തിറക്കിയത്. ഇൗ വർഷംതന്നെ വാഹനം അമേരിക്കയിൽ വിൽപ്പനക്കെത്തും. പുതിയ പാത്ത്ഫൈൻഡറിന് അടിമുടി മാറ്റം സംഭവിച്ചിട്ടുണ്ട്​. എസ്​.യു.വികളുടെ പരമ്പരാഗത രൂപമാണ്​ വാഹനത്തിന്​. വലിയ ചക്രങ്ങൾ, വി-മോഷൻ ഗ്രിൽ, സി ആകൃതിയിലുള്ള ഹെഡ്​ലൈറ്റുകൾ, ഒഴുകിപ്പരന്ന മേൽക്കൂര എന്നിവ ആകർഷകമാണ്​​.

സ്റ്റാൻഡേർഡ് എൽഇഡി ഹെഡ്​ലൈറ്റുകളിൽ കനംകുറഞ്ഞ ഡിആർഎല്ലുകൾ ഉൾപ്പെടുന്നു. സി-പില്ലറിന് ഘടനാപരമായ എസ്‌യുവി രൂപമുണ്ട്. ഇരട്ട നിറങ്ങളിൽ വരുന്ന ആദ്യ പാത്ത്ഫൈൻഡറാണിത്​. പിൻവശ​െത്ത എൽഇഡി ടെയിൽ‌ലൈറ്റുകൾ മുമ്പത്തേതിനേക്കാൾ മെലിഞ്ഞതാണ്. വാഹനങ്ങളിൽ ഏറ്റവും നീളമുള്ളതെന്ന്​ വിശേഷിപ്പിക്കാവുന്ന ബാഡ്​ജിങാണ്​ പിന്നിൽ നൽകിയിരിക്കുന്നത്​. സാറ്റിൻ ക്രോം ഫിനിഷിലാണ്​ പാത്ത്​ഫൈൻഡർ എന്ന എഴുത്തുള്ളത്​. ഇൻറീരിയർ ആധുനികവും വിശാലവുമാണ്​. 12.3 ഇഞ്ച് ഡിജിറ്റൽ ഡാഷ്‌ബോർഡ്, ഡ്രൈവർക്ക് നാവിഗേറ്റ് ചെയ്യാൻ എളുപ്പമുള്ള സ്‌ക്രീൻ ഓപ്ഷനുകൾ, 10.8 ഇഞ്ച് ഹെഡ്-അപ്പ് ഡിസ്‌പ്ലേ എന്നിവ നൽകിയിട്ടുണ്ട്​. പുതിയ ഇൻസ്ട്രുമെൻറ്​ പാനലിൽ 9.0 ഇഞ്ച് കളർ ടച്ച്‌സ്‌ക്രീൻ സെൻറർ ഡിസ്‌പ്ലേ ഉയർന്ന സ്ഥാനത്ത് സ്ഥാപിച്ചിരിക്കുന്നു.

വാഹനത്തിന്​ കരുത്തുപകരുന്നത്​ 284 കുതിരശക്തിയുള്ള 3.5 ലിറ്റർ ഡയറക്ട് ഇഞ്ചക്ഷൻ വി 6 എഞ്ചിനാണ്​. 351 എൻഎം പീക്ക് ടോർക്ക് എഞ്ചിൻ ഉത്​പാദിപ്പിക്കും. പുതിയ 9 സ്പീഡ് ഓട്ടോമാറ്റിക് ട്രാൻസ്മിഷനാണ്​ ഗിയർബോക്​സ്​. 4 ഡബ്ല്യുഡി ഡ്രൈവ് വാഹനമാണിത്​. വിവിധ ടെറൈൻ മോഡ് സെലക്ടറുകളുമുണ്ട്​. സ്റ്റാൻഡേർഡ്, സ്‌പോർട്ട്, ഇക്കോ, സ്നോ, സാൻഡ്, മഡ് / റൂട്ട്, ടോവ് എന്നിവയുൾപ്പെടെ ഏഴ് ഡ്രൈവ് മോഡുകളുമായാണ്​ വാഹനം വരുന്നത്​.