ഇനി പണം നൽകാതെതന്നെ ഏഥർ വീട്ടിലെത്തിക്കാം; ഇതാണ്​ മാർഗം

ഇലക്​ട്രിക്​ ബൂമിൽ നിന്ന്​ അൽപ്പം താഴേക്ക്​ പോയിരിക്കുകയാണ്​ ഇപ്പോൾ ഇരുചക്രവാഹന വിപണി. കൗതുകത്തിനപ്പുറം ആശ്രയിക്കാവ​ുന്ന വാഹനം എന്ന ഇമേജ്​ ഇപ്പോഴും ഇ.വികൾക്കില്ല. ഈ വിൽപ്പന മുരടിപ്പിനെ മറികടക്കാൻ പലതരം പരീക്ഷണങ്ങളാണ്​ ഇ.വി നിർമാതാക്കൾ പയറ്റുന്നത്​. ഇന്ത്യയിലെ പ്രമുഖ ഇലക്​ട്രിക്​ സ്കൂട്ടർ നിർമാതാക്കളായ ഏഥർ പുതിയൊരു സ്കീം അവതരിപ്പിച്ചിരിക്കുകയാണിപ്പോൾ.

വില അധികമാണെന്ന് പറഞ്ഞ് പിന്നോട്ടു നിൽക്കുന്ന ഉപഭോക്താക്കളെ ബ്രാൻഡിലേക്ക് അടുപ്പിക്കുന്നൊരു തീരുമാനമാണ് ഏഥർ ഇപ്പോൾ എടുത്തിരിക്കുന്നത്​. ഉപഭോക്താക്കൾക്ക് 100 ശതമാനം ഓൺ-റോഡ് ഫിനാൻസ്​ അസിസ്റ്റ്​ ആണ്​ കമ്പനി വാഗ്ദാനം ചെയ്യുന്നത്​. ഇത്​ പ്രകാരം പമൊന്നും നൽകാതെതന്നെ ഇനിമുതൽ ഏഥർ ഇ.വികൾ വീട്ടിലേക്ക്​ കൊണ്ടുപോകാം. ഉപഭോക്താക്കൾക്ക് ഫിനാൻസ് സ്കീമുകൾ വാഗ്ദാനം ചെയ്യുന്നതിനായി ഇന്ത്യയിലെ ചില പ്രമുഖ റീട്ടെയിൽ ഫിനാൻസ് കമ്പനികൾ, ബാങ്കുകൾ, എൻബിഎഫ്‌സികൾ എന്നിവയുമായി ചേർന്നാണ് ഇവി ബ്രാൻഡ് പുതിയ സേവനം ലഭ്യമാക്കിയിരിക്കുന്നത്.

ഇലക്ട്രിക് വാഹനങ്ങൾക്ക്​ നൽകിയിരുന്ന സബ്‌സിഡികൾ സർക്കാർ കുറച്ചതിനുശേഷം വലിയ തോതിലാണ് ഏഥർ സ്‌കൂട്ടറുകൾക്കെല്ലാം വില കൂടിയത്. 1.45 ലക്ഷം മുതൽ 1.65 ലക്ഷം വരെയാണ് നിലവിൽ ഏഥർ 450X ഇവികളുടെ എക്സ്ഷോറൂം വില വരുന്നത്. 450X മോഡലിന്റെ വില കുറവുള്ള എൻട്രി ലെവൽ വേരിയന്റ്​ ഓഗസ്റ്റ് മൂന്നിന് പുറത്തിറക്കുമെന്നും ഏഥർ കഴിഞ്ഞ ദിവസം പ്രഖ്യാപിച്ചിരുന്നു. 450S എന്നുപേരിട്ടിരിക്കുന്ന മോഡലിന് 1.29 ലക്ഷം രൂപയാണ് വില നിശ്ചയിച്ചിരിക്കുന്നത്.