കർവ്​: ടാറ്റയുടെ ഗർവ്​

പൂച്ചെണ്ടും കല്ലേറും ഒന്നിച്ചു കിട്ടുന്ന സവിശേഷ നക്ഷത്രത്തിൽ പിറവിയെടുത്തതാണ്​ ടാറ്റ മോട്ടോഴ്​സ്​. പണ്ടു പണ്ട്​ ടാറ്റാ സിയാറയുടെ കാലം മുതൽ അതങ്ങനെയാണ്​. കാണുമ്പോഴും ഓടിക്കുമ്പോഴും പൂച്ചെണ്ട്​. വർക് ഷോപ്പിൽ കയറുമ്പോൾ കല്ലേറ്​. അതാണ്​ അതിന്‍റെ ഒരു രീതി. ഗൃഹാതുരത്വം നിറഞ്ഞ ആ കാലം ചില സമയത്തു ചില ഡീലർഷിപ്പുകളിൽ നമ്മുടെ നെക്​സോൺ പുനരാവിഷ്​കരിക്കാറുണ്ട്​.

എന്തൊക്കെ പറഞ്ഞാലും ടാറ്റക്ക്​ എല്ലാാകാലത്തും സൂപ്പർഹിറ്റായി ഓടുന്ന ചില മോഡലുകളുണ്ട്​. ഇൻഡിക്കയും സുമോയുമൊക്കെ ഉദാഹരണം. ഈ ഗർവ്​ ടാറ്റക്ക്​ എന്നുമുണ്ട്​. ഈ പട്ടികയിലേക്ക്​ കയറ്റാൻ പറ്റിയ മുതലാണ്​ കർവ്​. നെക്​സോൺ മതിയെന്നു അപ്പനും ആൾട്രോസ്​ വേണമെന്നു മക്കളും വാശിപിടിച്ചു പട്ടിണി സമരം നടത്തുന്ന കുടുംബങ്ങൾക്ക്​ പെട്ടെന്നുള്ള പ്രശ്നപരിഹാരമായിരിക്കും കർവ്​.

കർവ്​ എന്ന കാറുകൊണ്ടു ടാറ്റ വരും വരുമെന്ന്​ കേൾക്കാൻ തുടങ്ങിയിട്ട്​ കാലം കു​റേയായി. രണ്ടുവർഷം മുമ്പ്​ കൃത്യമായി പറഞ്ഞാൽ 2022 ഏപ്രിലിൽ കർവിന്‍റെ ഇലക്​ട്രിക്​ കൺസെപ്​റ്റ്​ പുറത്തുവന്നിരുന്നു. 2023 ജനുവരിയിൽ എഞ്ചിൻവെച്ച കർവിന്‍റെ കൺസെപ്​റ്റും എത്തി. പിന്നെ കാത്തിരിപ്പിന്‍റെ കാലം തുടങ്ങി. കർവുണ്ടാക്കാൻ ടാറ്റ ചിലവാക്കിയ ഭാവനയെക്കാൾ ഭാവന ടാറ്റയുടെ ആരാധകരും പുറത്തെടുത്തു. ഒടുവിൽ ഇപ്പോൾ കർവ്​ യാഥാർഥ്യമായിട്ടുണ്ട്​.

പണ്ടു കണ്ട കൺസെപ്​റ്റിൽ നിന്നു വലിയ വ്യത്യാസമൊന്നും കർവ്​ കൂപ്പെ എസ്​.യു.വിക്ക്​ ഉണ്ടായിട്ടില്ല. മുന്നിൽ ബോണറ്റിലേക്ക്​ ഇറങ്ങിക്കിടന്ന ​ഡി.ആർ.എൽ അപ്രത്യക്ഷമായി, പിന്നിലെ ഇരട്ട സ്​പോയിലറുകൾ ഒരെണ്ണമാക്കി, പിൻകാഴ്ചകൾ കാണാൻ വെച്ചിരുന്ന കാമറകൾക്ക്​ പകരം റിയർവ്യൂ മിററുകളായി എന്നതൊക്കെയാണ്​ പറയാവുന്ന മാറ്റം. മുന്നിൽ നിന്നു നോക്കുമ്പോൾ നെക്​സോണിനെ ഓർമ വരുന്നുണ്ടെങ്കിൽ യാദൃശ്ചികമല്ല. ഈ ഓർമ പോകണമെങ്കിൽ കർവിനെ വശങ്ങളിൽ നിന്നു നോക്കിയാൽ മതി.

എഞ്ചിനുള്ളതും ഇലക്​ട്രിക്​ മോട്ടോറുള്ളതുമായ കർവുകൾക്ക്​ കാഴ്ചയിൽ കുറച്ചു വ്യത്യാസങ്ങളുണ്ട്​. ​ലോവർ ബമ്പറിലെ സ്റ്റൈലിങുകളിലൊക്കെ ഇതു വ്യക്തമാണ്​. അടുത്തമാസം ആദ്യ ആഴ്ചയിൽ കർവിന്‍റെ കറണ്ടുവണ്ടി നിരത്തിലെത്തിയേക്കും. തൊട്ടുപിന്നാലെ പെട്രോൾ, ഡീസൽ വകഭേദങ്ങളും വരും. വില നെക്​സോണിനേക്കാൾ കൂടുതലായിരിക്കും. കുറച്ചുകാലമെങ്കിലും ടാറ്റയുടെ അഭിമാനമായിരിക്കും ഈ കർവ് എന്നാണ്​ ആരാധകരുടെ അഭിപ്രായം.