ഇനി വൈദ്യുതി തൂണിൽനിന്ന്​ വൈദ്യുതി വണ്ടികൾ ചാർജ്​ ചെയ്യാം! പുതിയ പദ്ധതിയുമായി കെ.എസ്​.ഇ.ബി

തിരുവനന്തപുരം: കുതിച്ചുയരു​ന്ന പെട്രോൾ, ഡീസൽ വില താങ്ങാനാവാതെ വൈദ്യുതി വാഹനങ്ങളിൽ അഭയം പ്രാപിക്കുന്നവരുടെ എണ്ണം നാൾക്കുനാൾ കൂടുകയാണ്​. എന്നാൽ, ​ഓടിക്കൊണ്ടിരിക്കെ ചാർജ്​ തീർന്നാൽ എന്തുചെയ്യും എന്നതാണ്​ ഇവ​രെ അലട്ടുന്ന മുഖ്യ പ്രശ്​നം. അതിന്​ പരിഹാരവുമായി നമ്മുടെ സ്വന്തം കെ.എസ്​.ഇ.ബി രംഗത്ത്​ വന്നിരിക്കുകയാണ്​. വൈദ്യുതി തൂണുകളിൽ ചാർജിങ്​ പോയിന്‍റുകളൊരുക്കിയാണ്​ പുതിയ പരീക്ഷണം.

ആദ്യഘട്ടം നവംബറിൽ പൂർത്തിയാകും

ഓട്ടോറിക്ഷ, ഇരുചക്രവാഹനങ്ങള്‍ എന്നിവ ഇവിടെ നിന്ന്​ ചാർജ്​ ചെയ്യാം. സംസ്ഥാനത്തുടനീളം ബൃഹത്തായ ചാര്‍ജിങ്​ ശൃംഖല സ്ഥാപിക്കുന്നതിന്‍റെ ഭാഗമായാണ്​ പുതിയ നീക്കം. കെ.എസ്.ഇ.ബിയുടെ തൂണുകളിൽ ചാര്‍ജിങ്​ പോയിന്‍റുകള്‍ സ്ഥാപിക്കുന്ന പൈലറ്റ്‌ പ്രോജക്റ്റ്‌ നവംബറോടെ പൂർത്തിയാകും.

പണം അടക്കാൻ മൊബൈൽ ആപ്പ്​

വാഹനങ്ങൾ ചാർജ്​ ചെയ്യാൻ മുൻകൂർ പണം നൽകണം. ഇതിനായി മൊബൈല്‍ ആപ്ലിക്കേഷൻ സജ്ജമാക്കും. പ്രീ പെയ്ഡ് സംവിധാനം വഴി പണമടച്ച് ചാര്‍ജ് ചെയ്യുന്ന തരത്തിലാണ് ഈ പദ്ധതി വിഭാവനം ചെയ്തിരിക്കുന്നത്.

തുടക്കം കോഴിക്കോട്​ നഗരത്തിൽ

ഇ-ഓട്ടോറിക്ഷ ഏറ്റവും കൂടുതല്‍ പ്രചാരത്തിലുള്ള കോഴിക്കോട്‌ നഗരത്തിലാണ്‌ 10 ചാര്‍ജ്‌ പോയിന്‍റുകൾ ഉള്‍പ്പെടുന്ന പൈലറ്റ്‌ പദ്ധതി നടപ്പാക്കുന്നത്‌. ഇതിന്‍റെ പ്രവര്‍ത്തനം വിലയിരുത്തിയതിനു ശേഷം സംസ്ഥാനത്തുടനീളം വ്യാപിപ്പിക്കാനാണ്‌ ഉദ്ദേശിക്കുന്നതെന്ന്​ കെ.എസ്​.ഇ.ബി അധികൃതർ അറിയിച്ചു.

ചാര്‍ജിങ്​ സ്റ്റേഷനുകള്‍ എല്ലാ ജില്ലകളിലും

2020 നവംബറിൽ ആറ്​ കോര്‍പറേഷന്‍ ഏരിയകളിൽ കെ.എസ്.ഇ.ബി സ്വന്തം സ്ഥലത്ത് വൈദ്യുതി വാഹന ചാര്‍ജിങ്​ സ്റ്റേഷനുകള്‍ പൊതുജനങ്ങൾക്കായി തുറന്നിരുന്നു. ഈ നവംബറോടെ എല്ലാ ജില്ലകളിലും ചാര്‍ജിങ്​ സ്റ്റേഷനുകള്‍ പ്രവര്‍ത്തനക്ഷമമാകുമെന്നും കെ.എസ്.ഇ.ബി അറിയിച്ചു. ഇത്തരത്തിൽ 56 സ്റ്റേഷനുകളുടെ നിർമാണമാണ്​ പുരോഗമിക്കുന്നത്​. ഇതില്‍ 40 എണ്ണമെങ്കിലും നവംബറില്‍ പൂര്‍ത്തീകരിക്കാന്‍ സാധിക്കുമെന്നാണ് കെ.എസ്.ഇ.ബിയുടെ കണക്കുകൂട്ടൽ.

ഇന്ന് വിപണിയില്‍ ലഭ്യമായ എല്ലാ വൈദ്യുത കാറുകളും ഓട്ടോറിക്ഷ, ഇരുചക്രവാഹനങ്ങള്‍ എന്നിവയും ചാര്‍ജ് ചെയ്യാനുള്ള സംവിധാനം ഈ സ്റ്റേഷനുകളില്‍ ഉണ്ടാകും.