52,000 രൂപ കുറച്ചുതരും; മാരുതി കാറുകൾ വേണമെന്നുള്ളവർക്ക്​ വാങ്ങാം

ഇന്ത്യയിലെ ഒട്ടുമിക്ക വാഹന കമ്പനികളും ഉത്സവകാല ഒാഫറുകൾ പ്രഖ്യാപിച്ചിരിക്കുകയാണ്​. രാജ്യത്തെ ഏറ്റവുംവലിയ നിർമാതാക്കളായ മാരുതിയും ഇതിൽ നിന്ന്​ ഭിന്നമല്ല. തങ്ങളുടെ വാഹനനിരക്ക്​ മികച്ച ഡിസ്​കൗണ്ടുകളാണ്​ സീസണിൽ കമ്പനി നൽകുന്നത്​​. നെക്​സ്,​ അരീന മോഡൽ നിരയിലുടനീളം 52,000 രൂപ വരെ കിഴിവുകളും ആനുകൂല്യങ്ങളും കമ്പനി നൽകും. വിവിധ മോഡലുകളെ ആശ്രയിച്ച്, വാങ്ങുന്നവർക്ക് ക്യാഷ് ഡിസ്​കൗണ്ട്, കോർപ്പറേറ്റ് ഡിസ്​കൗണ്ട് അല്ലെങ്കിൽ എക്സ്ചേഞ്ച് ബോണസ്, നവരാത്രി ബുക്കിങ്​ ഓഫർ എന്നിവ ലഭിക്കും. എക്​സ്​എൽ 6, സെലെറിയോ, എർട്ടിഗ എന്നിവയ്ക്ക് ഈ ഉത്സവ സീസണിൽ ഒാഫറുകൾ ഒന്നും നൽകുന്നില്ല എന്നതും എടുത്തുപറയേണ്ടതാണ്​.

നെക്​സ ഡിസ്​കൗണ്ടുകൾ

നിലവിലെ തലമുറ ബലേനോയ്ക്ക് ഏകദേശം ആറ് വർഷം പ്രായമുണ്ട്​. എന്നാൽ പുതിയതും ആധുനികവുമായ എതിരാളികളെ വിൽപ്പനയിൽ മറികടക്കാൻ ഇപ്പോഴും ബലേനോക്കാവും​. കാഷ് ഡിസ്​കൗണ്ട്, കോർപ്പറേറ്റ് ഡിസ്​കൗണ്ട്, എക്സ്ചേഞ്ച് ബോണസ് എന്നിവ ഉൾപ്പെടുന്ന 36,200 രൂപയുടെ ആനുകൂല്യങ്ങൾ ബലേനോയ്ക്ക്​ മാരുതി പ്രഖ്യാപിച്ചിട്ടുണ്ട്​. .

സിയാസിന്​ 52,490 രൂപ വരെയുള്ള ആനുകൂല്യങ്ങളാണ്​ കമ്പനി നൽകുന്നത്​. എസ്-ക്രോസിലെ ആനുകൂല്യങ്ങൾ 45,000 രൂപ വരെ നീളുന്നു, അതിൽ 15,000 രൂപയുടെ ക്യാഷ് ഡിസ്​കൗണ്ടും അധിക എക്സ്ചേഞ്ച് ബോണസും കോർപ്പറേറ്റ് ഡിസ്​കൗണ്ടുകളും ഉൾപ്പെടും. ഇഗ്നിസിന്​ 31,700 രൂപയാണ്​ കുറച്ചുനൽകുന്നത്​. മാരുതിയുടെ നെക്​സ ലൈനപ്പിലെ ഏറ്റവും താങ്ങാവുന്ന മോഡലാണ് ഇഗ്നിസ്.

അരീന ഡിസ്​കൗണ്ടുകൾ

മാരുതി സുസുകി ആൾട്ടോ 800ന്​ 43,000 രൂപ വരെയുള്ള ആനുകൂല്യങ്ങൾ പ്രഖ്യാപിച്ചിട്ടുണ്ട്​. രാജ്യത്ത് ഏറ്റവും കൂടുതൽ വിൽക്കപ്പെടുന്ന കാറുകളിൽ ഒന്നാണ് ആൾട്ടോ. ക്വിഡ് അല്ലെങ്കിൽ റെഡിഗോ പോലുള്ള എതിരാളികളുമായി താരതമ്യപ്പെടുത്തുമ്പോൾ ആൾട്ടോയുടെ പ്രധാന ആകർഷണം അതി​െൻറ താങ്ങാനാവുന്ന വിലയാണ്. 48 എച്ച്പി, 0.8 ലിറ്റർ പെട്രോൾ എഞ്ചിനാണ് ആൾ​േട്ടാക്ക്​ കരുത്തുപകരുന്നത്. സിഎൻജി കിറ്റിലും വാഹനം ലഭ്യമാണ്. ക്യാഷ് ഡിസ്​കൗണ്ട്, എക്സ്ചേഞ്ച് ബോണസ്, കോർപ്പറേറ്റ് ഡിസ്​കൗണ്ട് എന്നിവ ഉൾപ്പെടുന്ന 43,000 രൂപ വരെയുള്ള ആനുകൂല്യങ്ങൾ ആൾട്ടോയിൽ മാരുതി വാഗ്ദാനം ചെയ്യുന്നു. സി.എൻ.ജി വേരിയന്റുകൾക്ക് ക്യാഷ് ഡിസ്​കൗണ്ട് ലഭിക്കില്ല.

മാരുതിയുടെ ബജറ്റ് ഹാച്ച്ബാക്ക് എസ് പ്രസ്സോയ്ക്ക് 48,000 രൂപ വരെ ആനുകൂല്യങ്ങൾ ലഭ്യമാണ്. വാഗൺആറിന്​ 17,500 രൂപ വരെയുള്ള കിഴിവുകളാണ്​ ലഭിക്കുക. മാരുതി സുസുക്കി സ്വിഫ്റ്റിന്​ 24,500 രൂപ ആനുകൂല്യങ്ങൾ പ്രഖ്യാപിച്ചിട്ടുണ്ട്​. രാജ്യത്ത് ഏറ്റവുമധികം വിറ്റഴിക്കപ്പെടുന്ന ഹാച്ച്ബാക്കുകളിലൊന്നാണ്​ സ്വിഫ്റ്റ്​. 19,500 രൂപ വരെ ആനുകൂല്യങ്ങളോടെ ഡിസയർ ലഭ്യമാണ്. വിറ്റാര ബ്രെസ്സക്ക്​ 17,500 രൂപ വരെയുള്ള ആനുകൂല്യങ്ങളാണ്​ പ്രഖ്യാപിച്ചിരിക്കുന്നത്​.