സ്​പെയർ ടയർ ഒഴിവാക്കി ഇക്കോസ്​പോർട്ട്​ എസ്​.ഇ വേരിയന്‍റ്​ വിപണിയിൽ; വില 10.49 ലക്ഷം

ഫോർഡ്​ ഇക്കോസ്​പോർടിന്‍റെ തനത്​രൂപത്തിൽ അലിഞ്ഞിരിക്കുന്ന ഒന്നായിരുന്നു പിന്നിൽ പിടിപ്പിച്ചിരുന്ന സ്​പെയർവീൽ. വാഹനത്തിന്​ കൂടുതൽ വലുപ്പവും ഗാംഭീര്യവും നൽകുന്നതിനും വീൽ കാരണമായിട്ടുണ്ട്​. എന്നാൽ ഈ വീൽ ഉള്ളതുകൊണ്ടുമാത്രം ഇക്കോസ്​പോർട് വാങ്ങാത്തവരും ഉണ്ട്​. അത്തരക്കാർക്കായി എസ്​.ഇ എന്ന പേരിൽ കമ്പനി പുതിയൊരു വേരിയന്‍റിനെ അവതരിപ്പിച്ച​ു​. പെട്രോൾ വേരിയന്‍റിന് 10.49 ലക്ഷം രൂപയും ഡീസലിന് 10.99 ലക്ഷം രൂപയുമാണ് ഇക്കോസ്പോർട്ട് എസ്ഇയുടെ വില ആരംഭിക്കുന്നത്.

എസ്.ഇയുടെ പ്രധാന മാറ്റം ടെയിൽ‌ഗേറ്റ് രൂപകൽപ്പനയിലാണ്. യൂറോപ്പ്, വടക്കേ അമേരിക്ക തുടങ്ങിയ അന്താരാഷ്ട്ര വിപണികളിൽ വിൽക്കുന്ന പതിപ്പിന് സമാനമാണ് ഇത്. സ്​പെയർ വീൽ പൂർണമായും ഒഴിവാക്കിയാണ്​ പുതിയ വേരിയന്‍റ്​ വിപണിയിൽ എത്തുക​. വീലിനുപകരം ടയർ പഞ്ചർ റിപ്പയർ കിറ്റുമായാണ്​ വാഹനം വരിക. അടുത്ത കാലത്ത്​ കേന്ദ്ര സർക്കാർ കൊണ്ടുവന്ന നിയമം അനുസരിച്ച്​ ട്യൂബ്​ലെസ്​ ടയറുകളുള്ള എം-വൺ കാറ്റഗറി വാഹനങ്ങൾക്ക്​ സ്​പെയർ ടയർ ഒഴിവാക്കാവുന്നതാണ്​.​

ഡ്രൈവറുൾപ്പടെ ഒമ്പത്​ പേർക്ക്​ വരെ സഞ്ചരിക്കാവുന്നതും മൂന്നര ടണ്ണിലധികം ഭാരമില്ലാത്തതുമായ വാഹനങ്ങളാണ്​ എം-വൺ കാറ്റഗറിയിൽ വരിക. ​​സ്​പെയർ ടയറുകൾക്ക്​ പകരം പഞ്ചർ ഒട്ടിക്കാൻ​ ആവശ്യമായ ടയർ റിപ്പയർ കിറ്റും ടയർ പ്രഷർ മോനിറ്ററിങ്​ സംവിധാനവും വാഹനങ്ങളിൽ ഉൾപ്പെടുത്തണമെന്നാണ്​ നിയമം പറയുന്നത്​. ഉപഭോക്താക്കളുടെ പ്രതികരണംകൂടി കണക്കിലെടുത്തശേഷമാണ്​ പുതിയ വാഹനം ഇന്ത്യ ലൈനപ്പിൽ ചേർക്കാൻ തീരുമാനിച്ചതെന്ന്​ ഫോർഡ് അധികൃതർ പറയുന്നു.

സവിശേഷതകൾ

നേരത്തേയുള്ള ഇക്കോസ്​പോർട്​ ടൈറ്റാനിയം വേരിയന്‍റുമായി ബന്ധപ്പെട്ട എല്ലാം വാഹനം പങ്കിടുന്നുണ്ട്​. പക്ഷേ വില ഏകദേശം 70,000 രൂപ കൂടുതലാണ്. 122 എച്ച്പി, 1.5 ലിറ്റർ പെട്രോൾ, 100 എച്ച്പി, 1.5 ലിറ്റർ ഡീസൽ എഞ്ചിൻ ഓപ്ഷനുകൾ എന്നിവ ഇതിൽ ഉൾപ്പെടുന്നു. അഞ്ച്​ സ്പീഡ് മാനുവൽ ഗിയർബോക്‌സാണ് നൽകിയിരിക്കുന്നത്​. എബി‌എസ് വിത്ത് ഇബിഡി, റിയർ ക്യാമറ, റിയർ വൈപ്പർ, ഡീഫോഗർ എന്നിവ പോലുള്ള സുരക്ഷാ സവിശേഷതകൾ എസ്ഇ വേരിയന്‍റിലുണ്ട്​. 16 ഇഞ്ച് അലോയ്കൾ, പ്രൊജക്ടർ ഹെഡ്ലൈറ്റുകൾ, എൽഇഡി ഡിആർഎൽ, കീലെസ് എൻട്രി ആൻഡ് ഗോ, 9.0 ഇഞ്ച് ടച്ച്സ്ക്രീൻ ഇൻഫോടെയ്ൻമെന്‍റ്​ സിസ്റ്റം, ഫോർഡ് പാസ് ഇൻ കാർ കണക്റ്റിവിറ്റി ടെക്, പവേർഡ് സൺറൂഫ്, ടയർ പ്രഷർ മോനിറ്റർ, ഡ്യുവൽ ഫ്രണ്ട്, സൈഡ്, കർട്ടൻ എയർബാഗുകൾ, ഇ.എസ്.സി, ട്രാക്ഷൻ കൺട്രോൾ, ഹിൽ-സ്റ്റാർട്ട് അസിസ്റ്റ്, ഓട്ടോ എച്ച്.ഐ.ഡി ഹെഡ്ലൈറ്റുകളും വൈപ്പറുകളും, ക്രൂയിസ് കൺട്രോൾ, ആൻഡ്രോയിഡ് ഓട്ടോ, ആപ്പിൾ കാർപ്ലേ കോംപാറ്റിബിളിറ്റിയുള്ള ഫോർഡിന്റെ സി.എൻ.സി 3 8.0 ഇഞ്ച് ഇൻഫോടെയ്ൻമെന്റ് സിസ്റ്റം എന്നിവ വാഹനത്തിലുണ്ട്​.

എതിരാളികൾ

പുതുതായി വന്ന റെനോ കൈഗറും നിസ്സാൻ മാഗ്​നൈറ്റും മുതൽ കിയ സോനെറ്റ്, ഹ്യുണ്ടായ് വെന്യു, മാരുതി സുസുക്കി വിറ്റാര ബ്രെസ്സ എന്നിവരാണ് ഈ വിഭാഗത്തിലെ പ്രധാന എതിരാളികൾ. ടൊയോട്ട അർബൻ ക്രൂയിസർ, മഹീന്ദ്ര എക്സ് യു വി 300, ടാറ്റ നെക്സൺ എന്നിവയാണ് ഈ വിഭാഗത്തിലെ മറ്റ്​ പ്രധാന വാഹനങ്ങൾ.