ചിപ്പ്​ ക്ഷാമം: ഇടപെടുമെന്ന്​ കേന്ദ്രം; 'ആത്മനിർഭർ' ആയാൽ പ്രതിസന്ധി അവസാനിക്കുമെന്നും വിലയിരുത്തൽ

ആഗോള വാഹന വ്യവസായത്തെ പ്രതിസന്ധിയിലാക്കിയ ചിപ്പ്​ ക്ഷാമം പരിഹരിക്കാൻ ഇടപെടുമെന്ന്​ കേന്ദ്രം. മാരുതി സുസുകി, ടൊയോട്ട തുടങ്ങിയ വമ്പൻ കമ്പനികൾ പ്രതിസന്ധിയിലായതോടെയാണ്​ കേന്ദ്രം വിഷയത്തിൽ ഇടപെടുന്നത്​. അർധചാലക വ്യവസായം ഇന്ത്യയിൽ സജീവമാക്കുകയാണ്​ കേന്ദ്രം ലക്ഷ്യമിടുന്നത്​. സർക്കാരി​െൻറ ആത്മനിർഭർ സംരംഭത്തെ മുന്നോട്ട് കൊണ്ടുപോകാൻ പുതിയ നീക്കം സഹായിക്കുമെന്ന് കേന്ദ്രമന്ത്രി പീയുഷ് ഗോയൽ പറഞ്ഞു.

'ലോകവ്യാപകമായി അർധചാലകങ്ങളുടെ ക്ഷാമം രൂക്ഷമാണ്​. അർധചാലക വ്യവസായം ഇന്ത്യയിലേക്ക് കൊണ്ടുവരുന്നതിന്​ സർക്കാർ വേണ്ട നടപടി എടുക്കും. രണ്ട് മേഖലകളെയും പിന്തുണയ്ക്കാൻ സർക്കാർ പ്രതിജ്ഞാബദ്ധമാണ്'-പീയുഷ്​ ഗോയൽ പറഞ്ഞു. അർധചാലക നിർമാണത്തിലേക്ക്​ പ്രവേശിക്കുന്നതിനെക്കുറിച്ച് ആലോചിക്കുന്നതായി ടാറ്റ ഗ്രൂപ്പ് അടുത്തിടെ പറഞ്ഞിരുന്നു. ഇതിന്​ പിന്നാലെയാണ് ആഗോള ചിപ്പ് പ്രതിസന്ധിയോടുള്ള ഗോയലി​െൻറ പ്രതികരണം.

നിർമാണം കുറച്ച്​ ടൊയോട്ട

സെമി കണ്ടക്​ടർ ക്ഷാമം കാരണം ആഗോളതലത്തിൽ വാഹന നിർമാണം 40 ശതമാനം കുറക്കുമെന്ന്​​ ടൊയോട്ട മോ​േട്ടാഴ്​സ്​ കഴിഞ്ഞ ദിവസം പ്രഖ്യാപിച്ചിരുന്നു. ലോകത്തിൽ ഏറ്റവും കൂടുതൽ വാഹനങ്ങൾ നിർമിക്കുന്ന കമ്പനിയാണ്​ ടൊയോട്ട. സെപ്റ്റംബറിൽ 900,000 വാഹനങ്ങൾ നിർമിക്കാൻ കമ്പനി പദ്ധതിയിട്ടിരുന്നു. എന്നാൽ ഇത്​ സാധ്യമാകില്ലെന്നാണ്​ നിലവിലെ റിപ്പോർട്ടുകൾ. ടൊയോട്ടയുടെ ഓഹരികളിൽ നാല് ശതമാനത്തിലധികം ഇടിവ് സൃഷ്​ടിക്കാനും ഇത്​ കാരണമായിട്ടുണ്ട്​. 2018 ഡിസംബറിന് ശേഷമുള്ള ഒരു ദിവസത്തെ ഏറ്റവും വലിയ ഇടിവാണിത്.

പ്രതിസന്ധി കാരണം നിരവധി ഫാക്​ടറികളുടെ പ്രവർത്തനം നിർത്തിവയ്ക്കാനും ടൊയോട്ട നിർബന്ധിതമായിട്ടുണ്ട്​. വടക്കേ അമേരിക്ക, ചൈന, യൂറോപ്പ് എന്നിവിടങ്ങളിലേയും ജപ്പാനിലെ 15 ടൊയോട്ട ഫാക്​ടറികളിലും നിർമാണം പ്രതിസന്ധിയിലാണ്​. കൊറോള, പ്രയുസ്, കാമ്രി, ലെക്​സസ് തുടങ്ങിയ മോഡലുകളെയെല്ലാം പ്രതിസന്ധി ബാധിക്കും. നിലവിലെ പ്രശ്​നങ്ങൾ ടൊയോട്ടയുടെ ഇന്ത്യയിലെ കച്ചവടത്തെ എങ്ങിനെ ബാധിക്കുമെന്ന്​ ഉറപ്പായിട്ടില്ല.

ഒാഗസ്​റ്റിൽ നിരവധി മോഡലുകളുടെ നിർമാണം ഭാഗികമായി തടസപ്പെടുമെന്ന്​ മാരുതി സുസുകി ഇന്ത്യ അധികൃതർ നേരത്തേ പറഞ്ഞിരുന്നു. ക്ഷാമം ഏറ്റവും കൂടുതൽ ബാധിച്ചത്​ മാരുതിയുടെ ഗുജറാത്തിലെ നിർമാണശാലയിലാണ്​. ഓഗസ്റ്റ് 7, 14, 21 തീയതികളിൽ ഇവിടെ വാഹന നിർമാണം നിർത്തിവയ്​ക്കാനും മാരുതി തീരുമാനിച്ചിട്ടുണ്ട്​. ചില ഉത്​പ്പാദന ലൈനുകൾ രണ്ടിനുപകരം ഒരു ഷിഫ്റ്റിലേക്ക് വെട്ടിക്കുറക്കാനും നീക്കമുണ്ട്​.

ആധുനികമായ ഒരു വാഹനത്തിൽ ഏകദേശം 1000 അർധചാലകങ്ങൾ ഉപയോഗിക്കുന്നതായാണ്​ കണക്ക്​. ആഗോളതലത്തിൽ വാഹനവ്യവസായത്തെ അർധചാലക ക്ഷാമം പ്രതിസന്ധിയിലാക്കിയിട്ട്​ ഏറെക്കാലമായി. കോവിഡ് -19​െൻറ പശ്​ചാത്തലത്തിൽ വ്യക്തിഗത കമ്പ്യൂട്ടറുകൾക്കും ടാബ്‌ലെറ്റുകൾക്കും സ്മാർട്ട്‌ഫോണുകൾക്കുമുള്ള വർധിച്ച ആവശ്യകതയാണ്​ പ്രശ്​നത്തിന് കാരണമായത്. ചിപ്പ്​ നിർമാതാക്കൾ വാഹനവ്യവസായത്തിലേക്ക്​ കൂടുതൽ സപ്ലെ നൽകുന്നതിൽ താൽപ്പര്യം കാണിക്കാത്തതാണ്​​ പ്രശ്​നം രൂക്ഷമാക്കുന്നത്​​.