പെട്രോൾ ലിറ്ററിന്​ 160 രൂപ!; രാജ്യത്തെ ശുദ്ധമായ ഇന്ധനം 'ഒക്​ടേൻ 100' കൊച്ചിയിലും

​രാജ്യത്ത്​​ ലഭ്യമായ ഏറ്റവും ശുദ്ധമായ പെട്രോൾ ഇനിമുതൽ കൊച്ചിയിലും. ഒക്​ടേൻ 100 പ്രീമിയം പെട്രോളായ എക്​സ്​ പി 100 ആണ്​ സ​​ംസ്​ഥാനത്ത്​ ആദ്യമായി ​കൊച്ചിയിൽ ലഭ്യമായി തുടങ്ങിയത്​. തേവരയിലും വൈറ്റിലയിലുമുള്ള ഇന്ത്യൻ ഓയിൽ കോർപ്പറേഷൻ പമ്പുകളിലാണ്​ ഒക്​ടേൻ 100 വിൽപ്പനക്കുള്ളത്​. ലിറ്റിന്​ 160 രൂപയാണ്​ വില.

സ്​പോർട്​സ്​ കാറുകളിലും ആഢംബര വാഹനങ്ങളിലും ഉപയോഗിക്കുന്ന ഇന്ധനമാണ്​ എക്​സ്​ പി 100. സൂപ്പർ കാറുകൾക്കും ഹൈപ്പർ കാറുകൾക്കും നിർമാതാക്കൾ പ്രിഫർ ചെയ്യുന്ന ഇന്ധനമാണിത്​. കൊച്ചികൂടാതെ ഡൽഹി, ഗുഡ്ഗാവ്, നോയിഡ, ആഗ്ര, ജയ്പൂർ, ചണ്ഡിഗഡ്​, ലുധിയാന, മുംബൈ, പൂനെ, അഹമ്മദാബാദ് തുടങ്ങിയ നഗരങ്ങളിൽ 100 ഒക്​ടേൻ പെട്രോൾ ലഭ്യമാണ്​.

എന്താണീ ഒക്​ടേൻ 100 പെട്രോൾ

ഇന്ത്യയിൽ നിലവിൽ ലഭ്യമായ ഇന്ധനങ്ങളുടെ ഏറ്റവും കുറഞ്ഞ ഒക്ടേൻ റേറ്റിങ്​ 87 ആണ്. രാജ്യത്തെ ഏതൊരു നഗരത്തിലും ലഭ്യമാകുന്ന സാധാരണ ഇന്ധനത്തിന് ഒക്​ടേൻ റേറ്റിംഗ് 87 ആണെന്ന്​ സാമാന്യമായി പറയാം (ബി.എസ്​ ആറ്​ എമിഷൻ മാനദണ്ഡങ്ങൾ പ്രകാരം ഇന്ധനങ്ങളുടെ ഏറ്റവും കുറഞ്ഞ ഒക്​ടേൻ റേറ്റ്​​ 91 എങ്കിലും ആകണമെന്നാണ്​ നിയമം). എക്‌സ്ട്രാ പ്രീമിയം, സ്പീഡ്, പവർ തുടങ്ങിയ പ്രീമിയം ഇന്ധനങ്ങളുടെ ഒക്​ടേൻ റേറ്റ്​ കൂടുതലാണ്​. പ്രീമിയം പെട്രോളുകളുടെ ഒക്​ടേൻ റേറ്റ്​ 91 ആണ്​. അതിന്​ മുകളിൽ രാജ്യത്ത്​ ഇതുവരെ രണ്ട്​ ഇന്ധനങ്ങൾ മാത്രമാണ്​ ലഭ്യമായിരുന്നത്​. ഇന്ത്യൻ ഓയിൽ കോർപ്പറേഷന്‍റെ 93 ഒക്ടേൻ, ഭാരത് പെട്രോളിയത്തിൽ നിന്നുള്ള സ്പീഡ് 97 എന്നിവയാണവ. ഇപ്പോൾ ലഭ്യമായിരിക്കുന്ന ഒക്​ടേൻ 100 നെ രാജ്യത്തെ ഏറ്റവും ശുന്ധമായ ഇന്ധനം എന്ന്​ വിശേഷിപ്പിക്കുന്നതും അതിനാലാണ്​.

പൂർണമായും കത്തിത്തീരുകയും മാലിന്യം പരമാവധികുറച്ച്​ ഉത്​പാദിപ്പിക്കുകയും ചെയ്യുകയാണ്​ പ്രീമിയം ഇന്ധനങ്ങളുടെ സവിശേഷത. അസമിലെ ഡിഗ്‌ബോയിയിലെ രാജ്യത്തെ ഏറ്റവും പഴയ ഓപ്പറേറ്റിങ് റിഫൈനറിയിൽ നിന്നാണ്​ എക്സ്പി 100 പെട്രോൾ ഉത്​പാദിപ്പിക്കുന്നത്​. ഫെറാരി, ലംബോർഗിനി, മാസരട്ടി, ഡ്യൂക്കാട്ടി തുടങ്ങിയ കമ്പനികളുടെ സ്​പോർട്​സ്​ കാറുകൾക്ക്​ ഒക്​ടേൻ 100 നിലവാരമുള്ള പെട്രോൾ നിർബന്ധമാണ്​.