ജാഗ്വാറിന്‍റെ വിസ്​മയ വാഹനം ഐ പേസ്​ വിൽപ്പന തുടങ്ങി; ഒറ്റ ചാർജിൽ 480 കിലോമീറ്റർ, 0-100 കിലോമീറ്റർ 4.8 സെക്കന്‍റിൽ

സമ്പൂർണ വൈദ്യുത എസ്.യു.വി ജാഗ്വാർ ഐ പേസിന്‍റെ ഇന്ത്യയിലെ വിൽപ്പനക്ക്​ തുടക്കമായി. ലോകത്തിലെ ഏറ്റവും മികച്ച വൈദ്യുത കാർ എന്ന ഖ്യാതിയുള്ള വാഹനമാണ്​ ജാഗ്വാർ ഐ പേസ്​. 19 നഗരങ്ങളിൽ 22 ഒൗട്ട്​ലെറ്റുകൾ വഴിയാണ്​ വാഹനം വിറ്റഴിക്കുക​. ഏറ്റവും മികച്ച വൈദ്യുത കാർ, യൂറോപ്പിലെ ഏറ്റവും മികച്ച കാർ, ജർമനിയിലെ കാർ ഓഫ്​ ദി ഇയർ, വേള്‍ഡ് ഗ്രീന്‍ കാര്‍ ഓഫ് ദ ഇയര്‍, വേള്‍ഡ് കാര്‍ ഡിസൈന്‍ ഓഫ് ദ ഇയര്‍ തുടങ്ങി നിരവധി പുരസ്​കാരങ്ങൾ സ്വന്തമാക്കിയ വാഹനമാണ്​ ജാഗ്വാർ ഐ പേസ്​. പ്രീമിയം ഓള്‍-ഇലക്ട്രിക് പെര്‍ഫോമന്‍സ് എസ്‌യുവിയായ ഐ-പേസിനെ ഇന്ത്യയിൽ ജാഗ്വാര്‍ ലാന്‍ഡ് റോവറിന്‍റെ വൈദ്യുതീകരണ യാത്രയിലെ സുപ്രധാന നാഴികക്കല്ലായാണ്​ വിലയിരുത്തപ്പെടുന്നത്​. ഇത്രയൊക്കെ പ്രത്യേകതകൾ ഉള്ളതുകൊണ്ടുതന്നെ വാഹനത്തിന്‍റെ വിലയൽപ്പം കൂടുതലാണ്​. ഒരു കോടി ആറ്​ ലക്ഷം രൂപയാണ്​ ഇന്ത്യയിലെ എക്​സ്​ഷോറൂം വില.

കരുത്തൻ ബാറ്ററി

90 കിലോവാട്​സ്​ ലിഥിയം അയൺ ബാറ്ററിയാണ്​ ഐ പേസിന്​ കരുത്തുപകരുന്നത്​​. 395 പി‌എസ്​ കരുത്തും 696 എൻ‌എം ടോർക്കും വികസിപ്പിക്കുന്ന ഇരട്ട ഇലക്ട്രിക് മോട്ടോറുകളാണ് വാഹനത്തിന്‍റെ ഹൃദയം​. ഒറ്റ ചാർജിൽ 480 കിലോമീറ്റർ സഞ്ചരിക്കും​. മൂന്ന് വേരിയന്‍റുകളിലും (എസ്, എസ്ഇ, എച്ച്എസ്ഇ) 12 നിറങ്ങളിലും ഐ പേസ്​ ജാഗ്വാർ വാഗ്ദാനം ചെയ്യുന്നുണ്ട്​. ബാറ്ററിക്ക് 8 വര്‍ഷം അല്ലെങ്കില്‍ 1,60,000 കിലോമീറ്റര്‍ വാറൻറിയുണ്ട്. പുതിയ അറ്റ്ലസ് ഗ്രേ ഗ്രിൽ ടിപ്പ് ഫിനിഷാണ്​ എക്സ്റ്റീരിയറിന്​. പുത്തൻ അലോയ്,​ ആഢംബരം നിറഞ്ഞ ബ്രൈറ്റ് പാക്​ ഓപ്ഷൻ എന്നിവയും ഉപയോക്താക്കൾക്ക് ലഭിക്കും. ക്യാബിൻ എയർ അയോണൈസേഷനിൽ ഇപ്പോൾ പി.എം 2.5 ഫിൽട്ടറേഷൻ ഉണ്ട്. യാത്ര ആരംഭിക്കുന്നതിന് മുമ്പ് ഐ-പേസിന് അതിന്‍റെ ക്യാബിൻ വായു ഫിൽട്ടർ ചെയ്യാൻ സാധിക്കും. ഐ-പേസി​െൻറ ബുക്കിങ്​ നേരത്തേ ആരംഭിച്ചിരുന്നു. 5 വര്‍ഷത്തെ സേവന പാക്കേജ്, 5 വര്‍ഷത്തെ ജാഗ്വാര്‍ റോഡ്‌സൈഡ് അസിസ്റ്റന്‍സ്, 7.4 കിലോവാട്ട് എസി വാള്‍ മൗണ്ടഡ് ചാര്‍ജര്‍ എന്നിവയും ഐ-പേസ് ഉപഭോക്താക്കള്‍ക്ക് ലഭിക്കും.നവീനമായ പിവി പ്രോ ഇൻഫോടെയ്മെൻറ് സംവിധാനം ലഭ്യമാക്കുന്ന ഇന്ത്യയിലെ ആദ്യ ജാഗ്വാർ വാഹനമാണ് ഐ-പേസ്.

ഓവർ ദ എയർ സാങ്കേതികവിദ്യ

ഡ്രൈവർക്ക് പരമാവധി സുരക്ഷയും സഹായവും നൽകുന്നവിധം ഡിജിറ്റൽ ടെക്നോളജികൾ ഉൾക്കൊള്ളിച്ചാണ് വാഹനം രൂപകൽപ്പന ചെയ്തിരിക്കുന്നത്. 360 ഡിഗ്രി കാഴ്ച ലഭിക്കാൻ ചുറ്റും കാമറകളുമുണ്ട്​. ക്ലിയർ സൈറ്റ് റിയർ വ്യൂ മിറർ കാഴ്ച്ചയും സൗകര്യവും വർധിപ്പിക്കുന്നു. ഓവർ ദ എയർ സാങ്കേതികവിദ്യ അടങ്ങിയതാണ് വാഹന സോഫ്റ്റ് വെയർ. ഇൻഫോടെയ്മെൻറ്, ബാറ്ററി മാനേജ്മെൻറ്, ചാർജിങ് തുടങ്ങിയവ റിമോട്ടായി അപ്ഡേറ്റ് ചെയ്യാൻ സോഫ്റ്റ്​വെയർ ഓവർ ദി എയർ സംവിധാനം സഹായിക്കുന്നു.

വാഹനം ചാർജ് ചെയ്യുന്നതിന് ഹോം ചാർജിങ് കേബിളോ 7.4 കെഡബ്ല്യു ഏസി വാൾ മൗണ്ടഡ് ചാർജറോ ലഭിക്കും. ടാറ്റാ പവർ ലിമിറ്റഡ് ഈ ചാർജർ ഉപഭോക്താവിന്‍റെ വീട്ടിൽ സ്ഥാപിച്ച് നൽകും. ജാഗ്വാർ റീട്ടെയിലർമാർ മുഖാന്തിരം ചാർജർ സ്ഥാപിക്കാനുള്ള നടപടികൾ കൈകൊള്ളാം. ഉപഭോക്താക്കൾക്ക് ടാറ്റാ പവറിന്‍റെ ഇഇസെഡ് ചാർജിങ് നെറ്റ്​വർക്കും പണം നൽകി ഉപയോഗിക്കാവുന്നതാണ്. രാജ്യത്താകമാനം 200 ചാർജിങ് പോയിൻറുകളാണ് ഇത്തരത്തിൽ ലഭ്യമാകുന്നത്. മെഴ്‌സിഡസ് ഇക്യുസിയെ ഓഡി ഇ-ട്രോൺ തുടങ്ങിയവയാണ്​ ജാഗ്വാർ ഐ-പേസിന്‍റെ പ്രധാന എതിരാളികൾ.