'തെറ്റ് ചെയ്യാത്തവർ പേടിക്കേണ്ടതില്ല ഗോപൂ'; കേരള പൊലീസ്​ പങ്കുവച്ച വീഡിയോ വൈറൽ

'തെറ്റു ചെയ്യാത്തവർ പേടിക്കേണ്ടതില്ല ഗോപൂ' എന്ന തലവാചകത്തോടെ കേരള പൊലീസ്​ പങ്കുവച്ച വീഡിയോ വൈറൽ. ട്രാഫിക് ബോധവൽക്കരണവുമായി ബന്ധപ്പെട്ടാണ്​ ഫേസ്ബുക് പേജിൽ വീഡിയോ പങ്കുവച്ചിരിക്കുന്നത്​. മൂന്നു പേർ സഞ്ചരിക്കുന്ന ബൈക്ക് പൊലീസിനെ കണ്ട് നിർത്തി തിരികെ പോവുന്നതാണ് സംഭവം. വാഹനത്തിൽ നിന്ന് ഇറങ്ങി നടന്നയാളുടെ മുമ്പിൽ പൊലീസ് ജീപ്പ് വന്നു നിൽക്കുന്നതും വീഡിയോയിൽ കാണാം.

വീഡിയോയ്ക്ക് ബാക്ക് ഗ്രൗണ്ടായി നൽകിയ ശബ്ദവും ബി.ജി.എമ്മും ശ്രദ്ധപിടിച്ചു പറ്റിയിട്ടുണ്ട്​. 'ഞാനപ്പൊഴേ പറഞ്ഞ്, ഇപ്പോ കേറല്ലേ, കേറല്ലേ എന്ന്...നില്ല് സമാധാനപ്പെട് ഇപ്പോ രക്ഷപ്പെടുത്താം... അതേ, വ്യക്തമായിട്ട് പ്ലാനെന്താന്നു പറഞ്ഞിട്ടു പോയാ മതി, ഞാൻ മാത്രമല്ല, അവരെല്ലാവരും' ഇങ്ങനെ പോകുന്നു സിനിമകളില്‍ നിന്നെടുത്ത രസകരമായ സംഭാഷണം. വീഡിയോക്ക്​ ആയിരക്കണക്കിന്​ ലൈക്കും ഷെയറും ലഭിച്ചിട്ടുണ്ട്​.

നിരവധിപേർ വീഡിയോയെ അനൂകുലിച്ചും പ്രതികൂലിച്ചും രംഗത്ത്​ എത്തിയിട്ടുണ്ട്​. 'പാവപ്പെട്ടവന്‍റെ മുകളിൽ കുതിര കയറാൻ ഉള്ള പോലീസ് സാറന്മാരുടെ പതിവ് ശ്രമം വീണ്ടും ആവർത്തിക്കുന്നു. സ്വയം ട്രോളി പരുവമായി നിൽക്കുന്ന നിങ്ങൾ ഈ ട്രോൾ കൊണ്ട് എന്താണ് ഉദ്ദേശിക്കുന്നത്. പ്രിയ സാറന്മാരെ ധൈര്യമുണ്ടെങ്കിൽ കഴിഞ്ഞ ഇലക്ഷൻ കാലത്ത് കേരളത്തിലെ രാഷ്ട്രീയ നേതാക്കന്മാർ കാണിച്ച നിയമലംഘനത്തിന്‍റെ ട്രോൾ വീഡിയോ ഇടൂ. അതാണ് ഹീറോയിസം. മെയ് രണ്ടിന് നിരോധനാജ്ഞ പ്രഖ്യാപിക്കാൻ ഈ നാട്ടിലെ ഏതെങ്കിലും അധികാരികൾക്ക് ചങ്കൂറ്റം ഉണ്ടോ. കളക്ടർമാരെ ദയവായി വാഴപ്പിണ്ടി മാറ്റി നട്ടെല്ലു പകരം വെക്കു'-ഒരാൾ കുറിച്ചു.

'കൂടുതൽ പിഴ അടപ്പിക്കണം. ഇനി അവര്‍ത്തിക്കരുത്. ശരിയായ രീതിയിൽ മാസ്ക് വെച്ചാൽ വെള്ളതുണിയിൽ പൊതിയപ്പെടില്ല. അ ഭയം ഉണ്ടാവണം'-മ​െറ്റാരാൾ കുറിക്കുന്നു. 'പെട്രോൾ വില കൂടിയത്കൊണ്ട് മൂന്ന്​ ബൈക്ക്​ എടുക്കുന്നതിലും നല്ലത് മൂന്നാളും ഒരു ബൈക്കിൽ പോകുന്നതല്ലേ' എന്ന്​ ചോദിച്ചവരും കമന്‍റ്​ ബോക്​സിലുണ്ട്​.