സ്​കോർപ്പിയോ എൻ പിക്കപ്പ്​ അവതരിപ്പിച്ച്​ മഹീന്ദ്ര; ലക്ഷ്യം ആഗോള മാർക്കറ്റ്​

ആഗോള സ്വപ്നങ്ങളുമായി പുതിയൊരു വാഹനം അവതരിപ്പിച്ച്​ മഹീന്ദ്ര. പതിവുപോലെ സ്വാതന്ത്ര്യ ദിനമായ ഓഗസ്റ്റ്​ 15 നായിരുന്നു അവതരണം. ഇത്തവണപക്ഷെ ചടങ്ങുകൾ നടന്നത്​ ഇന്ത്യയിലല്ല, അങ്ങ്​ ദക്ഷിണാഫ്രിക്കയിലാണെന്നുമാത്രം. സ്​കോർപ്പിയോ പിക്കപ്പ് എന്നാണ്​ മഹീന്ദ്ര പുതിയ വാഹനത്തെ വിളിക്കുന്നത്​.

അടുത്ത തലമുറ ലാഡർ-ഫ്രെയിം ഷാസിയിലാണ്​ പുതിയ പിക്കപ്പ്​ മഹീന്ദ്ര ഒരുക്കുന്നത്​. വരാനിരിക്കുന്ന ഥാർ 5-ഡോറും ഇതേ പ്ലാറ്റ്ഫോമായിരിക്കും ഉപയോഗിക്കുക. മഹീന്ദ്ര ഇന്ത്യ ഡിസൈൻ സ്റ്റുഡിയോയിൽ (MIDS) ആണ് പിക്കപ്പ്​ രൂപകൽപ്പന ചെയ്തത്. വളരെ റഫ്​ ലുക്കിൽ തീർത്തിരിക്കുന്ന വാഹനം ഓഫ്​റോഡ്​ ശേഷികൾ ഉള്ളതാണ്​.

ഇസഡ്​ 121 എന്ന കോഡ്‌നാമമുള്ള പുതിയ പിക്കപ്പ് ട്രക്ക് സ്റ്റാൻഡേർഡ് സ്‌കോർപിയോ എൻ എസ്‌.യു.വിയേക്കാൾ അധികം വീൽബേസിലാണ്​ നിർമിച്ചിരിക്കുന്നത്​. ഇത് പിന്നിലെ കാർഗോ ഡെക്ക് വർധിപ്പിച്ചിട്ടുണ്ട്​. മഹീന്ദ്ര സ്കോർപിയോ ക്ലാസിക്കിന് 2,600 മില്ലീമീറ്റർ വീൽബേസ് ഉണ്ട്. അതേസമയം പുതിയ പിക്കപ്പ് പതിപ്പിന് 3,000 മില്ലീമീറ്ററിലധികം വീൽബേസാവുമുള്ളത്. സ്കോർപിയോ N പിക്കപ്പ് സിംഗിൾ, ഡബിൾ ക്യാബ് ബോഡി ശൈലികളിൽ എത്തും.

ഫ്യൂച്ചറിസ്റ്റിക്​ എന്നതുപോലെ, ഗ്ലോബൽ പിക്ക് അപ് സവിശേഷതകളും സാങ്കേതികവിദ്യയും നിറഞ്ഞതാണ്​ പുതിയ വാഹനം. ലെവൽ 2 ഓട്ടോണമസ് ഡ്രൈവിങ്​, സെമി-ഓട്ടോമാറ്റിക് പാർക്കിങ്​, സൺറൂഫ്, 5 ജി അധിഷ്ഠിത കണക്റ്റിവിറ്റി സവിശേഷതകൾ എന്നിവയെല്ലാം വാഹനത്തിലുണ്ട്​.

പുതിയ പിക്കപ്പിന് ജെൻ 2 ഓൾ-അലൂമിനിയം എം ഹോക്ക്​ ഡീസൽ എഞ്ചിൻ കരുത്ത് പകരും. ഇത് 6-സ്പീഡ് മാനുവൽ അല്ലെങ്കിൽ ഐസിൻ-സോഴ്‌സ്ഡ് 6-സ്പീഡ് ഓട്ടോമാറ്റിക്​ ഗിയർബോക്സുമായിട്ടാകും വരിക. മഹീന്ദ്ര ഗ്ലോബൽ പിക്ക് അപ്പ് ഫോർവീൽ, ഷിഫ്റ്റ്-ഓൺ-ദി-ഫ്ലൈ സവിശേഷതയോടെയാണ് വരുന്നത്. നോർമൽ, ഗ്രാസ്-ഗ്രാവൽ-സ്നോ, മഡ്-റട്ട്, സാൻഡ് എന്നിങ്ങനെ നാല് ഡ്രൈവ് മോഡുകളും ഓഫറിലുണ്ട്. ദക്ഷിണാഫ്രിക്ക, ഇന്ത്യ, ഓസ്‌ട്രേലിയ, ആസിയാൻ രാജ്യങ്ങൾ എന്നിവിടങ്ങളിലെ വിപണിയാണ്​ പിക്കപ്പിലൂടെ മഹീന്ദ്ര ലക്ഷ്യമിടുന്നത്​.