എം.ജി കുടുംബത്തിൽ നിന്ന്​ ലോകത്തിലെ ആദ്യ ഫൈവ്​​​ ജി കാർ, പേര്​ 'റോവ്​ മാർവൽ ആർ​'

മാർവൽ ആർ​ എന്ന പേരിൽ ലോകത്തിലെ ആദ്യ ഫൈവ്​ ജി കാർ ചൈനയിൽ പുറത്തിറക്കി. മാർവൽ എക്​സ്​ എന്ന കോഡ്​ നെയിമിൽ കഴിഞ്ഞവർഷം ഡൽഹി ഓ​ട്ടോ എക്​സ്​പോയിൽ എം.ജി അവതരിപ്പിച്ച വാഹനത്തിന്‍റെ പിൻഗാമിയായാണ്​ ​മാർവൽ ആർ​ എത്തുന്നത്​. ഒരു വൈദ്യുത എസ്​.യു.വിയാണ്​ മാർവൽ ആർ​. യഥാർഥത്തിൽ എം.ജി എന്ന ബ്രാൻഡിലല്ല ചൈനയിൽ മാർവൽ ആർ ഇറങ്ങുന്നത്​.

എം.ജിയുടെ ഉടമസ്​ഥരായ സായികിന്‍റെ സബ്​സിഡിയറിയായ റോവ്​ എന്ന ബ്രാൻഡിലാണ്​ വാഹനം ചൈനയിൽ എത്തുന്നത്​. 5 ജി കണക്റ്റിവിറ്റി ലഭിക്കുന്ന ലോകത്തിലെ ആദ്യത്തെ വാഹനമാണിത്. സി-വി 2 എക്സ് (സെല്ലുലാർ വെഹിക്കിൾ‌ ടു എവരിതിംഗ്) കമ്മ്യൂണിക്കേഷൻ ടെക് ലെവൽ ആണ്​ വാഹനത്തിൽ പ്രവർത്തിക്കുന്നത്​. ഓ​ട്ടോണമസ്​ ഡ്രൈവിങ്​ സംവിധാനങ്ങളും വാഹനത്തിൽ ഉൾപ്പെടുത്തിയിട്ടുണ്ട്​.

പ്രത്യേകതകൾ

മാർവൽ ആറിൽ 5 ജി കണക്റ്റിവിറ്റി നൽകുന്നത്​ വാവേയുടെ ബലോങ്​ 5000 മൾട്ടി-മോഡ് ചിപ്‌സെറ്റാണ്. വെഹിക്കിൾ ടു എവരിതിംഗ് (വി 2 എക്സ്) ആശയവിനിമയങ്ങളെ പിന്തുണയ്ക്കുന്ന ലോകത്തിലെ ആദ്യത്തെ മൾട്ടി മോഡ് ചിപ്‌സെറ്റാണിത്. വി 2 എൻ (വെഹിക്കിൾ ടു നെറ്റ്‌വർക്ക്), വി 2 ഐ (വെഹിക്കിൾ ടു ഇൻഫ്രാസ്ട്രക്ചർ), വി 2 പി (വെഹിക്കിൾ ടു പെഡസ്​ട്രിയൻ (കാൽനട യാത്രക്കാരൻ), വി 2 വി (വെഹിക്കിൾ ടു വെഹിക്കിൾ) ആശയവിനിമയങ്ങൾ നടത്താൻ വാഹനത്തിനാകും.

ലെവൽ 3 ഓട്ടോണമസ് ഡ്രൈവിങിനായി ഇലക്ട്രിക് എസ്‌യുവിയിൽ 28 സെൻസറുകൾ പിടിപ്പിച്ചിട്ടുണ്ട്​. 69.9 കിലോവാട്ട്സ് ബാറ്ററി പായ്ക്കിൽ നിന്നാണ്​ റോവ്‌ മാർവൽ ആർ വൈദ്യുതി എടുക്കുന്നത്​. 505 കിലോമീറ്റർ ആണ്​ റേഞ്ച്​. ബാറ്ററിയുടെ സ്റ്റാൻഡേർഡ് ചാർജിങ്​ സമയം 12 മണിക്കൂർ ആണ്​. ഫാസ്റ്റ്​ ചാർജർ ഉപയോഗിച്ച് 30 മിനിറ്റിൽ ബാറ്ററി 80 ശതമാനംവരെ ചർജ്​ ചെയ്യാനാകും. രണ്ട്​ മോട്ടോറുകൾ വഴിയാണ് പവർ ഡെലിവറി നടക്കുന്നത്. 184 എച്ച്പി, 410 എൻഎം ടോർക്ക് എന്നിവ വാഹനം സൃഷ്​ടിക്കും.

0-100 കിലോമീറ്റർ വേഗത 7.9 സെക്കൻഡിൽ മാർവൽ കൈവരിക്കും. അടിസ്ഥാന വേരിയന്‍റിന് 24.7 ലക്ഷം ഇന്ത്യൻ രൂപ വിലവരും. പ്രോ വേരിയന്‍റിന് 27 ലക്ഷം വിവരും. 5 ജി കണക്റ്റിവിറ്റിയും സി-വി 2 എക്സ് കമ്മ്യൂണിക്കേഷൻ ടെക്കും ഒരു ഓപ്‌ഷണൽ ആർ പൈലറ്റ് പാക്കേജും ഈ​​ വേരിയന്‍റുമുതൽ ലഭ്യമാകും.