ആദ്യ വി 6 എഞ്ചിൻ അവതരിപ്പിച്ച്​ ഫെരാരി; ബെർലിനേറ്റ 296 ജി.ടിബി പുറത്തിറക്കി

ഫെരാരിയുടെ ആദ്യ വി 6 എഞ്ചിൻ മോഡലായ 296 ജി.ടി.ബി സൂപ്പർ കാർ പുറത്തിറക്കി. ഫെരാരിയുടെ ആദ്യത്തെ മിഡ് എഞ്ചിൻ രണ്ട് സീറ്റർ ബെർലിനേറ്റ(ലിറ്റിൽ സലൂൺ) യാണ് 296 ജിടിബി. ഹൈബ്രിഡ്​ സാ​േങ്കതികവിദ്യയോടൊപ്പമാണ്​ വാഹനം നിരത്തിലെത്തിയത്​. ഇലക്​ട്രിക്​ മോ​േട്ടാറുമായി ചേർന്ന്​ പ്രവർത്തിക്കുന്ന എഞ്ചിൻ 654 എച്ച്​.പി കരുത്ത്​ പുറത്തെടുക്കും. നാല് ​ഡ്രൈവിങ് മോഡുകളും വാഹനത്തിലുണ്ട്​. ​എസ്‌എഫ്‌ 90, ലാ ഫെരാരി എന്നിവയ്‌ക്ക് ശേഷം ആദ്യമായാണ്​ ഫെരാരി ഹൈബ്രിഡ് സാ​​േങ്കതികവിദ്യ തങ്ങളുടെ ഒരു വാഹനത്തിൽ ഉപയോഗിക്കുന്നത്​.

122 കിലോവാട്ട് (165 ബിഎച്ച്പി) വൈദ്യുത മോട്ടോർ ഉപയോഗിച്ച് പ്രവർത്തിക്കുന്ന 654 ബിഎച്ച്പി, വി 6 പവർട്രെയിനാണ് പുതിയ ഫെരാരിയുടെ ഏറ്റവും വലിയ പ്രത്യേകത. 8,000 ആർ‌പി‌എമ്മിൽ 819 ബിഎച്ച്പിക്ക് അടുത്ത്​ കരുത്ത്​ പുറത്തെടുക്കാൻ പുതിയ സംവിധാനത്തിനാകും. 6,250 ആർ‌പി‌എമ്മിൽ 740 എൻ‌എം ടോർക്കും വാഹനത്തിനുണ്ട്​. ഇലക്ട്രിക് മോഡിൽ കാറിന് 25 കിലോമീറ്റർ വരെ സഞ്ചരിക്കാനാകും. എഞ്ചിനും ഗിയർ‌ബോക്‌സിനും ഇടയിൽ സ്ഥാപിച്ചിരിക്കുന്ന ഇലക്ട്രോണിക്-ഡിഫറൻഷ്യൽ, എം‌ജി‌യു-കെ എന്നിവയുള്ള എട്ട്​ സ്​പീഡ് ഡിസിടിയാണ്​ ഗിയർബോക്​സ്​.

റോമ, പോർട്ടോഫിനോ, എം എസ്എഫ് 90 സ്ട്രഡേൽ, എസ്എഫ് 90 സ്പൈഡർ തുടങ്ങിയ ഫെരാരി കാറുകളിലും ഈ ട്രാൻസ്​മിഷൻ കാണാം. 2.9 സെക്കൻഡിൽ 0-100 കിലോമീറ്റർ വേഗത ആർജിക്കാൻ ഇൗ സൂപ്പർ കാറിനാകും. 0-200 കിലോമീറ്റർ വേഗത 7.3 സെക്കൻഡിനുള്ളിലും വാഹനം കൈവരിക്കും. നാല് ഡ്രൈവിങ്​ മോഡുകളും സ്റ്റിയറിങ്​ വീലിൽ ഒരു 'ഇ-മെനെറ്റിനോ' സ്വിച്ചും നൽകിയിട്ടുണ്ട്​.

ഓരോ ഡ്രൈവ്​ മോഡിലും വ്യത്യസ്​ത അളവിലുള്ള ഇലക്ട്രിക് മോട്ടോർ ഇടപെടലും പുനരുൽപ്പാദന-ബ്രേക്കിങ്​ പ്രവർത്തനവും ഉപയോഗിച്ച്​ വ്യത്യസ്​തമാക്കിയിട്ടുണ്ട്​. 296 ജിടിബിക്കായി 6 സെൻസറുകളുള്ള പുതിയ ബ്രേക്കിങ്​ സിസ്റ്റം (ഇവിഒ സിസ്റ്റം) ഫെരാരി വികസിപ്പിച്ചിരുന്നു. ഇത് ബ്രേക്ക് ഡിസ്​റ്റൻസ്​ 10 ശതമാനം കുറയ്ക്കുന്നു. പുതിയ മോഡൽ ഇന്ത്യയിൽ എന്ന്​ എത്തിക്കുമെന്ന്​ ഫെരാരി പ്രഖ്യാപിച്ചിട്ടില്ല.